Kɔbega poan, nɛreba piyoobe n tuni leregere tuuma la, ba ka tuni tigere yile la n boi zɛ’an la ge ba boi la kinkɛleŋa leregere zɛ̃’ɛsi bii RTO. Zɛ̃’ɛsi wa soŋeri to la wani? Leregeredoma la nari ti ba tara la bem lɔɣɔrɔ ta’an tuna soŋa soŋa leregere zɛ̃’ɛsi wa poan? Ge leregeredoma la n boi zɛ’an tuna ba tuuma la soŋeri tuuma la ti la kena soŋa soŋa la wani?

 RTO soŋeri mɛ ti leregeredoma la bɔna zɛsɛka ti ba tɔɣera yetɔɣum la. Karin n leregere Low German yetɔɣum la yeti: “Tomam n keŋɛ ta kɛ’ɛra RTO la n boi Cuauhtémoc, Chihuahua, Mexico la, tomam la to leregere tadaandoma ni kɔ’ɔn sɔsera la Low German yetɔɣum la poan. Yetɔɣum wa mea poan ti to dita sɛɛra na’am mɔɔlegɔ poan la se’em ma’a ti to bɔna da’a poan. Tomam la nɛresɛba n tɔɣeri yetɔɣum la n kɔ’ɔn laɣum bɔna. Bala, to ni wuna la yelebɛa ase’a ti la yue ti to ka wum dɛ. La me basɛ ti to mina la nɛreba la n tari yelebɛa se’a tɔɣera.”

 James n tuni Frafra leregere zɛ’an la n boi Ghana la yeti, saŋa ase’a eŋa ni bɔta la a naɛ la Betel yizuo la tuna tigere yile la poan ge a me le yeti: “Mam nɔŋɛ n tuna RTO poan mɛ. Mam san mɔɔla to yetɔɣum la poan ge nyɛ nɛreba n keleseri yelesoma la se’em la, mam suure ni sukɛ mɛ.”

 Mabiisi la ni eŋɛ la wani ta’an loe kinkɛleŋa leregere zɛ̃’ɛsi (RTO) wa? Joseph n tuni Tingole Wa Za’a Mɛa Tuuma Wele la n boi Warwick, New York, U.S.A la yeti: “Yeledaaŋɔ ayima n paari tɔ dela, zɛ̃’ɛsi ase’a ni ka tara ko’om bii light bii intanɛt n wan soŋɛ ba ti ba tuna leregere tuuma la soŋa. Bala la, to san yeti to mɛ kinkɛleŋa leregere zɛ’an bo yetɔɣum busebo, to ni bisɛ la zɛ̃’ɛsi zo’e zo’e ti ba tɔɣera yetɔɣum la bim ta’an loe zɛ̃soŋa.”

 Sɛla n de naana ge ka ba’ɛ eŋɛ ligeri dela, to maalɛ kinkɛleŋa leregere zɛ̃’ɛsi ti la bɔna Na’am Pu’usegɔ Deo poan bii Laɣesegɔ Zɛ’an bii na’am yetɔɣum yalegerɛdoma n kɛ’ɛri zɛ’an, ti leregeredoma la ta’an kena bim tuna. Ge zɛ̃sena wa za’a san ka bɔna, to ta’an bo mabiisi la yɔ’ɔ ti ba da yire kɛ̃’ɛra bim la deo n yalegɛ ti ba ze’ele yire kena lɛregera bim. Leregeredoma la tuuma san tee, ba ta’an koose ban daa boi zɛ’an la ge tee dekɛ ligeri la tum tuunse’ere yele n ba’ɛ pakɛ.

 Yuun 2020 na’am tuuma yuunɛ la poan, to dekɛ la ligeri n paɛ dollars (U.S.) tusa tusa pia la batã soŋɛ RTO n boi tingole wa za’a poan. Sɛba n boi RTO wa poan tuna la, lɔɣɔse’a yele n pakɛ ba la dela, kompiita, software n boi de to’ore, lɔɣɔse’a ti ba wan ta’an dekɛ rekɔɔdɛ kɔ̃a yetɔɣum la intanɛt. Kompiita la ka lɔɣɔrɔ woo ti nɛra ayina wan dekɛ tuna, ligeri ta’an paɛ dollars (U.S.) kɔbesiyopɔi la pinuu (750). Kompiita bamam wa tari la software ti ba yɔɔra saŋa woo, la Watchtower Translation System n soŋeri leregeredoma wa ti ba tigese ba tuuma la soŋa soŋa. Ka me tari la gɔnɔ zo’e zo’e n soŋeri leregeredoma wa ti ba ta’an ita viisegɔ.

 Leregeredoma la le tara la lɔɣɔse’a ti ba tara rekɔɔdera kɔ̃a yetɔɣum ba ɔfisi la poan. Lɔɣetuna wa daa soŋɛ mɛ paa se’em ma’a ti COVID-19 bã’a la daa pɔsɛ la. Se’ere n sɔi la, leregeredoma la zo’e zo’e yuun tari lɔɣe-ana wa kule la ba yɛa, tara ba lɛregera gɔnɔ ge rekɔɔdera vidiyodoma.

 Mabiisi n boi RTO la n boi zɛ’an la ni keŋɛ ta soŋɛ maalɛ zɛ’an la mɛ. Basɛba me ni to’e gɔnseto ti leregeredoma la lerege la bisɛ a poan nyaa, ban lerege sɛla la niɛ ya. Cirstin n tuni Afrikaans RTO n boi Cape Town, South Africa la yeti: “Na’am mɔɔlegɔdoma la tɛm woo sore ŋmɛ’adoma zo’e zo’e keni kalam tuna mɛ.”

 Sɛba n keni soŋera la puurɛ ni pee mɛ la yɔ’ɔ wa ti ba tara la. Mabipɔka ayima n keni soŋera RTO ayima yeti: “Ho san tuna bim, la ni ana ho la mama.” Mabiisi basɛba me ni dekɛ la ba kũusi laɣum rekɔɔdɛ kɔ̃a yetɔɣum la soŋera. Juana n tuni Totonac RTO la n boi Veracruz, Mexico la yeti: “Ton nyaa lɛm zɛ’an ti ba tɔɣera yetɔɣum la basɛ ti la ana la naana ti mabiisi zo’e zo’e laɣum soŋɛ rekɔɔdɛ kɔ̃a yetɔɣum la vidiyodoma.”

 Ge leregere zɛ̃’ɛsi wa la sirum soŋeri mɛ ti ba ta’an lɛregera soŋa soŋa yoi? Ho san soke nɛresɛba n kaali to gɔnɔ la, ba zo’e zo’e wan yeti, nananawa la nyaa ani la gam. Cédric soŋeri mɛ ti ba lɛregera Kongo yetɔɣum n boi Democratic Republic of Congo. A yeti: “Mabiisi la yuun san ni kaala gɔnseto ti to lerege Kongo yetɔɣum poan la, ba yuun ni yeti la dela ‘Watch Tower Kongo’ se’ere n sɔi la, nɛreba ka tɔɣeri Kongo yetɔɣum bala. Ge nananawa ba ni yeti, to nyaa leregeri to gɔnɔ la mɛ wuu nɛreba n tɔɣeri Kongo yetɔɣum se’em la.”

 Andile n soŋeri ti ba lɛregera Xhosa yetɔɣum South Africa tiŋa poan me tɔɣɛ la bala mea nɔɔ. A yeti: “Nɛreba zo’e zo’e ni yɛta to ti to leregere la nyaa tee mɛ. Hali kɔma la n nɔŋɛ ba kaala solemiine Pigera Zontua La, nyaa boti la ba kaala Xhosa yetɔɣum Pigera Zontua La. Yele ayima me n pee ba puurɛ dela, ban malum demese New World Translation la Xhosa yetɔɣum poan ti la kaalegɔ dɛna naana ge niɛ peelumi se’em la.”

 Ligese’a ti nɛreba ni yese ba suuren bo ti la soŋɛ tingole wa za’a tuuma la, ase’a ti to ni dekɛ mɛ leregere zɛ̃’ɛsi wa. To me ni dekɛ ase’a maalɛ la zɛ’an la ge soŋɛ sɛba n soŋeri leregere tuuma la. Nɛreba basɛba me ni doose la donate.dan124.com poan bo ligeri laɣum soŋɛ.