Yuun 2024 Olympics la, ba geele baŋɛ ti nɛreba n paɛ wuu tuse tuse tusa banuu n wan bisɛ. Sɛba n wan de’em de’eŋo la ze’ele la tisi 206 poan. Thomas Bach n de International Olympic Committee president la yeti: “To laɣum ita la sɛla n wan basɛ ti suma’asum bɔna tingɔŋɔ wa poan. Basɛ ya ti to sakɛ to suuren ge mina ti Olympics la wan basɛ ti asaala woo tara suma’asum la nɔyinɛ hali la ton boi tɔka tɔka la.”

 Olympics la wan ta’an basɛ ti ba puti’irɛ wa tum? Suma’asum la nɔyinɛ wan ta’an bɔna?

 Yuunɛ wa Olympics la ka yeen basɛ ti nɛreba ti’isa la de’eŋo yele ma’a. Ge la me basɛ ti nɛreba puti’irɛ bɔna la yelese’a n iti la nalɛɣerɛ yɛla n basɛ ti yelego bɔna se’em la. Yele ana wa ase’a dela nɛreba n tari yɔ’ɔ se’em, nɛreba nɛ’ɛsegɔ, yelesego n boi pu’usegɔ poan la nɛreba n ka nani taaba la.

 Tisi n ni naɛ taaba dɛ’ɛna maɣesɛ wuu Olympics la basɛ ti nɛreba tara la pupeelum. Ge la basɛ ti nɛreba ita pa’ala ti ba boi la ba to’ore ti yelesego bɔna gana la wan tuɣum basɛ ti suma’asum la nɔyinɛ bɔna la.

 Baabule la tɔɣɛ halese’a n wan basɛ ti la kpe’em ti nɔyinɛ bɔna yele mɛ. (2 Timoti 3:1-5) Ho san bɔta ti ho zamesɛ Baabule yetɔɣebiŋ’a wa pa’asɛ, kaalɛ zaseŋɔ yele la zuo n de “Did the Bible Predict the Way People Think and Act Today?”

 Baabule la basɛ ti to tara la beere sa’am puti’irɛ ti suma’asum la nɔyinɛ wan bɔna. La pu’ulum biŋe ti “Na’ayenɛ Sɔɔlom la” poan, nɛresaaleba wan naɛ taaba bɔna la nɔyinɛ​—Luke 4:43; Matu 6:10.

 Yezu Krista n de Na’am la Naba wan basɛ ti suma’asum bɔna tingɔŋɔ wa zɛ’an woo. Baabule la yeti:

•   “Tontɔɔ vom, la sunma’ahom [wan] bɔna zan’an woo.”​—Yooma 72:7.

•   “Nahadoma han ne yi bo en, a ne fan’ ba bahɛ mɛ. . . A fan’ ba vom la namehegɔ, la muguhego poan bahɛ.”​—Yooma 72:12, 14.

 Hali la zina beere wa, Yezu pa’alegɔ la basɛ ti nɛreba tusa tusa n boi tisi 239 poan tara la nɔyinɛ. Yehowa Sɛɛradoma n de Kristakɔma la zamesɛ mɛ mina ban wan tara suma’asum se’em la nɛreba. Ho san bɔta ti ho baŋɛ ban iti bala se’em, kaalɛ Watchtower magazine la zuo n de “Breaking the Cycle of Hatred.”