Yele #1: Ho san bɔ’ɔra nɛreba, ba me wan lebese bo ho!
Nɛreba wan baŋɛ ti ho bo’ori la yɛri yɛri. Bala zuo la, ba me wan bɔ’ɔra hɔ. Baabule la pa’alɛ ti:
‘Kɔ’ɔn bo’ori ya ge nɛreba me wan bo ya. Yan makeri se’em bɔ’ɔra la, ba me wan makɛ bala bo ya.’—Luke 6:38.
‘Hon bo’ori nɛreba se’em la, ba me bo’ori ho la bala nɔɔ.’—Luke 6:38, Contemporary English Version.
Yele #2: Ho san soŋera nɛreba, ho soŋeri la homea!
Ho san soŋera nɛreba la bo’ori ho la gilema ge basɛ ti la ana ho mama la hon bo’ori la. Baabule la pa’alɛ ti:
‘Ho wan tara pupeelum zo’e zo’e ho san bɔ’ɔra gana hon to’oseri.’—Tooma 20:35.
‘Ho san yeti ho yi nɛreba ho yire na, yi nasedoma la kɔɔrenɔ la wɔbesi la fɔɔsi; Ho san eŋɛ bala, Naayinɛ wan kã bo ho. Se’ere n sɔi la, sɛba ti ho yi la kan ta’an me yi ho ti ho lerege ho sanɛ.’—Luke 14:13, 14.
Bunbilipaalesi n fabeli nɛreba yele
Bunbilipaalesi n fabeli nɛreba yele boi zɛ’an woo mɛ! Geele makerɛ wa bisɛ.
“Saŋa ase’a mam san ni zi’ire ti n bisɛ TV, mam ni tiɛ la mam ma la mam sɔ n tuni la, la ban wan taregɛ se’em ba san wa’an yire na la yele. Bala la, mam ni isige mɛ duuse, pee laasɛ ge piisɛ sɔɣɔrɔ. Mam ni le eŋɛ la coffee, se’ere n sɔi la mam dɔɣereba nɔŋɛ coffee mɛ. Mam ma san ni paɛ yire a ni yeti, ‘Wai, kalam maalɛ soŋa mɛ! Mam wum la dia nyuuŋo. N bisoŋa wa, n pu’usɛ ya!’ Mam san ni eŋɛ sɛla n ani soŋa bala bo mam ma la mam sɔ, la ni basɛ ti mam puurɛ pee mɛ.”—Casey.
“Mam dɔɣereba kɔ’ɔn soŋera mam mɛ, bɔ’ɔra mam sɛla n pakɛ mam. Bala la, ba loore n yuun sa’am yuunse’ere n tole la, mam yuun bo ba la ligeri zo’e zo’e ti ba dekɛ maalɛ loore. La boi bim ti ba yuun zaɣesɛ mam laɣehɔ la mɛ ge mam me yuun ka sakɛ. Mam dɔɣereba nari yelese’a n gani wana mɛ. Mam me n yuun bo ba sɛla la yuun basɛ ti mam puurɛ pee mɛ.”—Holly.
Hon mi? Bunbilipaalesi zo’e zo’e n de Yehowa Sɛɛradoma puurɛ pee mɛ la ban soŋeri nɛreba ge pa’ala ba Baabule la. Hali, basɛba keŋɛ la zɛ’an n eeri soŋerɛ ta mɔɔlɛ Baabule yelesoma la.
“Mam yuun basɛ America tiŋa ge keŋɛ la Mexico tiŋa ti n ta soŋɛ ti to mɔɔlɛ Baabule yelesoma la. Saŋa ase’a, la ni kpe’em mɛ ti n dekɛ laɣehɔ bii sɛla bo nɛra se’ere n sɔi la mam mea puɣum ka tara mɛ. Ge mam baŋɛ ti mam san dekɛ n saŋa la n paŋa tuna na’am mɔɔlegɔ tuuma la, bala ba’ɛ dɛna la yelesonɛ gana mam tari lɔɣɔrɔ bɔ’ɔra.”—Evan.
N wan soŋɛ nɛreba la wani?
Ho wan bɔta ti ho baŋɛ ho san ni soŋɛ nɛreba, la ni ana se’em? Hon wan ta’an eŋɛ yelese’a n wana.
Soŋɛ ho deodoma:
Da basɛ ti ba yele ho ge ti ho nyaa piisɛ, pee laasi bii ho duuse bɔ’ɔ
Duɣera dia
Ni gulesɛ sɛla bo ho dɔɣereba ti la pa’alɛ ti ho nini tiɣɛ mɛ la ba
Soŋɛ ho suɔ ti a tum a sukuu tuuma
Soŋɛ sɛba n daɣɛ ho deodoma:
Gulesɛ gɔŋɔ ta bo se’em n bɛ̃’ɛri
Soŋɛ se’em n de bunkutɛ ti a tum a yire tuuma
Kaɛ se’em n bɛ̃’ɛri ge ka ta’an yɛsera bisɛ
Da sɛla bo se’em n boi biɣi biɣi poan
Sɛla n wan soŋɛ: Tiregɛ eŋɛ yɛla ase’a ti homea bɔta ti ho eŋɛ. Nyaa tiregɛ ti ho soŋɛ nɛra ayima bakwai wa poan. Ho puurɛ n wan pee se’em la wan eŋɛ ho pakerɛ!
“Ho san soŋera nɛreba ho puurɛ ni pee mɛ. La ni ana ho wuu ho tum la tuunɛ ba’asɛ ti nɛreba puurɛ pee. Ho puurɛ wan pee la hon eŋɛ bala la, la boi bim ti yia la ho daa ka ti’isɛ ti la wan ana bala. Ho san eŋɛ sɛla bo nɛra, nyuurɔ la ni gaŋɛ sɛla ti ho dekɛ tisɛ la mɛ.”—Alana.
