Zaseŋɔ yele wa poan

•  Lɛka vuurɛ?

•  Hon seke ho lɛɣɛ nɛra?

 Nɛreba basɛba ti’isɛ ti lɛka yeen dɛna la buraa la pɔka n sɔseri la taaba. Ge zaseŋɔ yele wa poan, to san yeti “lɛka,” la ze’ele bo la sansɛka ti buraa la pɔka ni dekɛ baŋɛ nyaa ba wan ta’an di taaba. Bala, nɛra san lɛɣera pɔka bii buraa, a ti’iseri la sɛla yele. La daɣɛ ti ba yeen naɛ taaba sɔsera ti ba puurɛ pee.

 Nɛreba san lɛɣera taaba, pooren, la dela ba kɔ’ɛ ba puti’irɛ nyaa ba wan di taaba bii ba wan basɛ taaba. Ho san pɔsɛ lɛɣera nɛra, kɔ’ɔn maasum gura ba se’em sa’am.

 Yelekpine: Ho san bisɛ ti ho seke lɛka, ho yi seke ho di pɔɣa bii ho ele sira.

 Nɛreba san lɛɣera taaba, ba ta’an ta di taaba mɛ. Bala, la wan ana soŋa ti ho geele hon tari halese’a soŋa soŋa. Makerɛ, ho ta’an geele yele ana wa bisɛ:

•   Hon ani se’em la ho deodoma. Saŋa zo’e zo’e la, hon iti ho dɔɣereba la ho suurɔ se’em, yele yele wuu tɔregɔ san paɛ hɔ n wan pa’alɛ ho wan ta ita ho pɔɣa bii ho sira se’em.

   Baabule naresum yele: ‘Yese ya, ya poan sɛla woo n de daaŋɔ, sunsɔa, sunsɔkiilega, nyabega, la yetɔɣepɔ̃’ɔsa la sɛla woo n pɔɣeleni.’​—Epesus 4:31.

   Soke homea yeti: ‘Mam dɔɣereba la mam suurɔ wan yeti mam bo’ori ba gilema? Mam la ba poan ayima san ka bɔkɛ taaba, mam ni ma’ɛ la n mea ti to sɔsɛ de yele, bii mam ni eŋɛ la sunsɔa?’

•   Da ti’isa ho ma’a yele. Ho san ta di pɔɣa bii ele sira, la wan nara ti ho ni geele ho luɣerɛ kpɛ’a la n boti sɛla. Saŋa zo’e zo’e la, la me wan dɛna ti ho doose sɛla ti eŋa bɔta la.

   Baabule naresum yele: ‘Basɛ ya ti nɛra woo ɛɛra a tadaana n boti sɛla ge daɣɛ amea ma’a n boti sɛla.’​—1 Korint 10:24.

   Soke homea yeti: ‘Mam ni kɔ’ɔn bɔta la nɛreba doose mam n boti se’em la? Nɛreba geele mam ti n dela mina n ti’iseri nɛreba me yele? Bem yɛla ti mam eŋɛ ti la pa’alɛ ti n ti’iseri la nɛreba yele gana mam mea yele?’

•   Sirege n mea. Pɔɣesonkɔ bii siresonkɔ san tue, a ni sakɛ ti a tue mɛ ge yeti gaafara.

   Baabule naresum yele: ‘To za’a waabi tuuri mɛ saŋa zo’e zo’e.’​—Yames 3:2.

   Soke homea yeti: ‘Mam san tue, mam ni sakɛ n tuure, bii mam ni bo n mea la buurɔ? Nɛra san pa’alɛ mam sɛla ti la nara ti n tee, mam ni eŋɛ la sunsɔa?’

•   Ligeri yɛla. Ligeri yɛla sa’am pɔɣedire zo’e zo’e mɛ. Bala la, ho san mina ho wan zãla ligeri se’em, la wan soŋɛ hɔ, ho san ta di pɔɣa bii ele sira.

   Baabule naresum yele: ‘Ani n boi ya poan n wan bɔta ti a mɛ yikãtɛ ge kan te’ele zi’ire kɛkɛ sanɛ la bisɛ nyaa a tari paŋa n wan ta’an mɛ de ba’asɛ?’​—Luke 14:28.

   Soke homea yeti: ‘Mam tã n mea tara lɔɣɔrɔ da’a poan, bii mam diti la sama saŋa woo? Mam eŋɛ la bem ti la pa’alɛ ti mam tã zãla ligeri?’

•   Vo’osum poan yɛla. Ho san dɛna Yehowa Sɛɛradaana, la nari ti ho eŋɛ maaseŋɔ zamesa Baabule la ge me kena Kristakɔma zamesegɔ saŋa woo.

   Baabule naresum yele: ‘Pupeelum boi mɛ la sɛba n ti’iseri ba vo’osum poan yɛla.’​—Matu 5:3.

   Soke homea yeti: ‘Mam tiregɛ ita yelese’a n wan basɛ ti n bĩ vo’osum poan? Mam basɛ ti vo’osum poan yɛla deŋɛ nɛŋa n vom poan bii mam basɛ ti yɛla ase’a yele n tuɣum pakɛ mam gaŋɛ?’

 Yelekpine: Hon wan di bii ele mina la kɔ’ɔn ɛɛra la siresonkɔ bii pɔɣesonkɔ. Ho san tiregɛ ti ho ta’an ta dɛna siresonkɔ bii pɔɣesonkɔ, ho ta’an ta seke mina n me tiregera bala mea nɔɔ.