“Wa’an ya n zɛ’an na, yamam sɛba n taregɛ ge zɛ zeero ge n wan basɛ ti la ana ya mama. Dekɛ ya n yɔka la zɛ yamea ge tɔɣesa ya mam, se’ere n sɔi la mam dela nɛra mama ge siregera n mea n suuren ge ya wan nyɛ vo’osego bo yamea. Se’ere n sɔi la mam yɔka la ka tibegɛ, ti mam zeero la me fakɛ.”​—Matu 11:28-30, New World Translation.

 “Wa’an ya n zɛ’an na, yamam sɛba n taregɛ ge zɛ zeero ge n wan bo ya vo’osego. Dekɛ ya n yɔka la zɛ yamea ge tɔɣesa ya mam, se’ere n sɔi la mam ani la baalam ge siregera n mea n suure poan ge ya wan nyɛ vo’osego bo yamea. Se’ere n sɔi la mam yɔka la ka tibegɛ, ti mam zeero la me fakɛ.”​—Matu 11:28-30, New International Version.

 Yezu yuun pee puurɛ beem a kɛleseriba la ti ba wa’an a zɛ’an na. A yuun basɛ ti ba baŋɛ ti ba san dɔla a pa’alegɔ la, la wan ana ba mama ge ti ba nyɛ vo’osego.

 “Wa’an ya n zɛ’an na, yamam sɛba n taregɛ ge zɛ zeero.” Sɛba ti Yezu yuun pee puurɛ beem ba la yuun zɛ la “zeero” se’ere n sɔi la, ba pu’usegɔ nɛŋadoma yuun pɛregɛ ba mɛ ti ba dɔla lɔɔ la malema yɛla. (Matu 23:4; Mark 7:7) Nɛreba la me yuun tari la putɛyiila se’ere n sɔi la, ba yuun ni tum la tuunkpe’eŋo taregɛ la wan eŋɛ se’em ti ba nyɛ sɛla basɛ ba nɔɔren.

 “N wan basɛ ti la ana ya mama.” Yezu yuun pu’ulum biŋe ti sɛba n to’e a beeŋo la, a wan basɛ ti la ana ba mama bii a bo ba vo’osego. A yuun soŋɛ nɛreba wa doose la eŋa n yuun basɛ ti ba bɔkɛ Naayinɛ n sirum boti ba ita sɛla. (Matu 7:24, 25) Ban yuun mi wana la yuun soŋɛ ba mɛ ti pumpɔreŋɔ pu’usegɔ yɛla la malema yɛla yuun ka le daana ba. (Yon 8:31, 32) La boi bim ti ho zamesa ge dɔla Yezu pa’alegɔ la daɣɛ naana ge ba yuun san eŋɛ bala, la wan ana ba mama.

 “Dekɛ ya n yɔka la zɛ yamea ge tɔɣesa ya mam.” Baabule saŋa la, tuuntuneba zo’e zo’e ni dekɛ la dɔɔ yɔka yɔɣɛ bamea ta zɛɛra zeero n tibegɛ. Bala la, yelebire la n de “yɔka” la vuurɛ dela ho siregera homea ge dɔla sɛba n de kpɛ’ɛndoma pa’alegɔ. (Malema 26:13; Isaiah 14:25; Yeremia 28:4) Yele la n de “tɔɣesa ya mam” la vuurɛ ta’an dɛna “dɛna ya mam podɔleba (zamesegɔdoma).” Bala Yezu yuun kpemese a kɛleseriba la giila ti ba dɛna a podɔleba doose la ban wan dɔla en ge tɔɣesa a makesonɛ la.​—Yon 13:13-15; 1 Peter 2:21.

 “Ya wan nyɛ vo’osego bo yamea.” Yezu yuun kɔ’ɔn ka dekɛ vo’osego bo la, lan wuni sɛba la bilam bilam. Ge eŋa n yuun eŋɛ sɛla dela a soŋɛ a kɛleseriba la ti ba nyɛ subuɣelegɔ la beere sa’am puti’irɛ. (Matu 6:25-32; 10:29-31) Nɛresɛba n yuun de a podɔleba ge sakɛ bo en la yuun baŋɛ ti, hon pu’useri Naayinɛ daɣɛ zeero ge ho san ita bala, la wan sirum bo ho pupeelum.​—1 Yon 5:3.

 “Se’ere n sɔi la mam yɔka la ka tibegɛ, ti mam zeero la me fakɛ.” Pu’usegɔ nɛŋadoma la yuun ka ani wuu Yezu n yuun sirege amea ge tɔɣera mama la. (Yon 7:47-49) A yuun ka tãseri ba bii a pɛregera ba. Ge a yuun tari la itisoŋɔ ge ti a lɛŋa me ka tɔna. A yuun boti la a podɔleba la tum paɛ ba paŋa beene. (Matu 7:12; Mark 6:34; Luke 9:11) A yuun le pa’alɛ ba ban wan eŋɛ se’em ta’an nyɛ nyuurɔ Naayinɛ nimbɔzore la poan ge ti ba tara putɛkeeŋa n ani soŋa ti la ana ba mama. (Matu 5:23, 24; 6:14) Yezu halesoma la yeen ka basɛ ti nɛreba lɛna en ma’a ge la yuun basɛ ti ba to’e a yɔka la mɛ ge me dɛna a podɔleba.

 Se’em ma’a ti Yezu yuun mɔɔla yelesoma la Galilee tiŋa yuun 31 Y.B. poan la ti a yuun tɔɣɛ yelese’a n boi Matu 11:28-30 la. Sɛba n gulesɛ Yelesoma la, tuuntuna Matu ma’a n de se’em n gulesɛ Yezu beeŋo la yele. Eŋa n yuun de Yuda nɛra ge dɛna mina n tabelɛ to’ose lampo la zuo, a yuun mi Aromdoma lampo yɔa la Yudadoma pu’usegɔ poan ti fãɛ bɔna bim la n yuun basɛ ti la wuna nɛreba la se’em. Bala la, nɔkpe’ene kai ti a giila yuun kpemese mɛ se’em ma’a ti a yuun nyɛ ti Yezu tari kpe’eŋo la ti a Sɔ Yehowa a dekɛ bo en la bɛɛna nɛresɛba n sirege bamea ti la wuna ba la ti, ba wa’an a zɛ’an na.​—Matu 11:25-27.

 Matu Yelesoma la basɛ ti to baŋɛ halesoma ti Yezu, ti ba yuun pu’ulum biŋe ti a wan dɛna Mɛzaaya la beere sa’am Naayinɛ na’am la naba la tara.​—Matu 1:20-23; Isaiah 11:1-5.

 Bisɛ vidiyo gi’a wa nyɛ Matu gɔŋɔ la yelekpina.