Baabule la yeti tomea ni ti’isɛ bo bo’olum ge tara putɛsonɛ ita bala. Ku pa’ali ti la daɣɛ mina n to’ori la ma’a n wan nyɛ nyuurɔ ge mina n bo’ori la me nyɛti nyuurɔ mɛ. (Magaha 11:25; Luke 6:​38) Yezu yeti: “Ho wan tara pupeelum zo’e zo’e ho san bɔ’ɔra gana hon to’oseri.”​​—Tooma 20:35.

•  Bɔ’a kani taaba n ani soŋa?

•  Bɔ’a kani taaba n ka ani soŋa?

•  Baabule kaalegɔ zɛ’ɛsi n tɔɣeri bɔ’a yele

 Nɛra mea san ti’isɛ bo, bala n ani soŋa. Baabule la yeti, “Basɛ ti nɛra woo yese a suure poan bo, a da nyɔna bii a ita wuu ba pɛregɛ en mɛ se’ere n sɔi la Naayinɛ nɔŋɛ la nɛra n bo’ori la pupeelum.”​—2 Korint 9:7, tiŋanɔɔrɛ yelesum.

 To san yese to suure poan bɔ’ɔra nɛreba Naayinɛ boti la bala, la me laɣum pa’asɛ “pu’usegɔ seko n ani filam” poan mɛ. (Yames 1:​27, tiŋanɔɔrɛ yelesum) Naayinɛ puurɛ wan pee la nɛresɛka n bo’ori yɛri yɛri soŋera nasedoma, a me geele bo’olum bumɔ ti ho dekɛ pɛŋe en mɛ. (Magaha 19:17) Baabule la yeti Naayinɛ wan yɔ nɛresɛka n bo’ori la.​—Luke 14:12-​14.

 Nɛra san bo ge ti’isa eŋa n wan nyɛ sɛla la zuo. Yɛla ase’a dela:

•   A eŋɛ ti nɛreba pɛɣɛ en.​—Matu 6:2.

•   A eŋɛ ti ba me bo lebese en.​—Luke 14:12-14.

•   A eŋɛ bala nyɛ faarɛ.​—Yooma 49:6, 7.

 Nɛra san bo bo’olum soŋɛ yelese’a ti Naayinɛ ka bɔta. Makerɛ n wana, la ka nari ti ho dekɛ laɣehɔ bo nɛra ti a tari ta ŋmɛ kɛkɛ bii tara vɔla tiyooro bii nyuura daam. (1 Korint 6:​9, 10; 2 Korint 7:1) Bala mea nɔɔ ti la ka nara ti ho dekɛ bo’olum bo nɛra n wan ta’an tum diise amea ge dɛna zinyaka.​—2 Tesalonika 3:​10.

 To san bɔ’ɔra nɛreba basɛba ge tamɛ to deodoma yele. Baabule yeti deo zuodoma nari ti ba bisera ba deodoma. (1 Timoti 5:8) La ka nari ti deo zuodaana bɔ’ɔra nɛreba ge tamɛ a deodoma yele ti la wuna ba. Bala mea nɔɔ ti Yezu yuun zɛregɛ nɛresɛba n zaɣesɛ ti ba kan bisa ba dɔɣereba la ge yeti bamam lɔɣɔrɔ la “dela sɛla te [ba] wan dekɛ bo Na’ayenɛ.”​—Mark 7:​9-​13.