Ho san wan ta’an baŋɛ Naayinɛ soŋa soŋa, la nari ti ho zamesɛ baŋɛ a yɛla ge ita eŋa n boti sɛla. Bala wan basɛ ti a “vurege” lɛm hɔ. (Yames 4:8) Baabule la yeti, “Yenɛ ka zaaɛ la to.”​—Tooma 17:27.

•  Ton wan eŋɛ se’em ta’an baŋɛ Naayinɛ

•  Nɛreba n ti’isɛ Naayinɛ yele se’em

 Kaala Baabule la

•  Baabule la n tɔɣɛ sɛla: “Yenɛ n daa bahe te nɛreba golehɛ a yetɔgom la woo.”​—2 Timoti 3:16.

•  Vuurɛ: Naayinɛ n basɛ ti ba gulesɛ Baabule la. Nɛreba la yuun ka dekɛ bamea puti’irɛ gulesɛ. Naayinɛ doose la Baabule la poan basɛ ti to baŋɛ a puti’irɛ. A le basɛ ti to baŋɛ la a hala n de wuu nɔŋerɛ, tontɔɔ tuuma la a nimbɔ̃zore.​—Yɛhega 34:6; Tɛɛnhegɔ 32:4.

•  Hon wan ta’an eŋɛ sɛla: Kaala Baabule la daarewoo. (Yosua 1:8) Ti’isa taɣesa hon kaali sɛla la. Ni soke homea yeti: Wana wa pa’alɛ mam ti Naayinɛ ani la wani?​—Yooma 77:12.

   Makerɛ, kaalɛ Yeremia 29:11 ge soke homea yeti: ‘Naayinɛ boti la n tara suma’asum bii daaŋɔ? A boti la, la beere ta ana mam soŋa?’

 Bisera naaŋɔ lɔɣɔrɔ

•  Baabule la n tɔɣɛ sɛla: “Ge se’em ma’an te Yenɛ n daa maalɛ teŋa la ta paɛ zina beere wa, teŋa wa nɛreba nyɛ Yenɛ la a paŋa n ani se’em yɛhera la sɛla woo te a maalɛ la.”​—Arom 1:20.

•  Vuurɛ: Nɛra san maalɛ lɔkɔ ti ho bisɛ lɔkɔ la, la ni basɛ ti ho baŋɛ la eŋa n ani se’em. Bala mea nɔɔ ti Naayinɛ naaŋɔ lɔɣɔrɔ la basɛ ti to baŋera a hala la. Makerɛ, Naayinɛ n maalɛ to zuputo se’em ti to ta’an tɛ̃ra yɛla ge tuna tuunkiresi se’em la pa’alɛ ti Naayinɛ tari la yɛm. Yintule, la ŋmarebɛa n tari paŋa se’em la pa’alɛ ti Naayinɛ tari la paŋa.​—Yooma 104:24; Isaiah 40:26.

•  Hon wan ta’an eŋɛ sɛla: Ni ɛ saŋa bisera naaŋɔ lɔɣɔrɔ ta’an zamesɛ yɛla zo’e zo’e. Ni soke homea yeti, ‘Naaŋɔ lɔkɔ wa pa’alɛ mam ti Naayinɛ ani la wani?’ a Naayinɛ yɛla ase’a boi ti naaŋɔ lɔɣɔrɔ kan ta’an pa’alɛ tɔ. Bala n sɔi ti a dekɛ Baabule la bo to.

 Yi’ira Naayinɛ yu’urɛ la

•  Baabule la n tɔɣɛ sɛla: “N nɔŋɛ mam la zuo, n wan gura en, n wan zɛnkɛ en, en mi mam yu’urɛ la zuo.”​—Yooma 91:14, 15.

•  Vuurɛ: Naayinɛ se’em yu’urɛ n de Yehowa la puti’irɛ boi la sɛba n bo’ori a yu’urɛ la gilema ge tara tuna tuuma la. b (Yooma 83:18; Malaki 3:16) Naayinɛ basɛ ti to baŋɛ eŋa n de mina la eŋa n pa’alɛ to a yu’urɛ la. A yeti: “Mam ma’an yu’urɛ n de [Yehowa].”​—Isaiah 42:8.

•  Hon wan ta’an eŋɛ sɛla: Ho san tɔɣera Naayinɛ yele, yi’ira a yu’urɛ la.

 Zusa Yehowa

•  Baabule la n tɔɣɛ sɛla: “Na’ayenɛ lɛm mɛ la se’em woo n wan kaahɛ bo en.”​—Yooma 145:18.

•  Vuurɛ: Yehowa lɛm la sɛba n yi’iri en yelemɛŋɛrɛ poan. Zusega pa’asɛ to pu’usegɔ poan mɛ. La pa’alɛ la ton bo’ori Naayinɛ gilema se’em.

•  Hon wan ta’an eŋɛ sɛla: Zusa Naayinɛ daarewoo. (1 Tesalonika 5:17) Yele en lan ani ho se’em.​—Yooma 62:8. c

 Tara sakerɛ Naayinɛ poan

•  Baabule la n tɔɣɛ sɛla: “Nɛra me ka boe wan ta’an eŋɛ Yenɛ suunre nyɛlom a han ka nam Yenɛ.”​—Hebru 11:6.

•  Vuurɛ: To san wan ta’an vurege lɛm Naayinɛ, la nari ti to tara sakerɛ. Baabule la poan, sakerɛ ka pa’alɛ ti to yeen mina ti Naayinɛ boi mɛ ma’a. Ge la pa’alɛ la ton wan dekɛ tomea delum Naayinɛ, a pa’alegɔ, la a pu’ulumbiŋ’a la. To san wan ta’an tara bɔnsoŋa la Naayinɛ, la nari ti to tara sakerɛ.

•  Hon wan ta’an eŋɛ sɛla: To san wan tara sakerɛ, la nari ti to mina Naayinɛ. (Arom 10:17) To san zamesɛ Baabule la, la wan soŋɛ tɔ ti to dekɛ tomea delum Naayinɛ la a pa’alegɔ la. Yehowa Sɛɛradoma puurɛ wan pee ti ba zamesɛ hɔ Baabule la. d

 Ita sɛla n wan basɛ ti Naayinɛ puurɛ pee

•  Baabule la n tɔɣɛ sɛla: “To nɔŋɛ Yenɛ vɔnrɛ dela to nana a nɔɔrɛ la.”​—1 Yon 5:3.

•  Vuurɛ: Yehowa lɛm mɛ la sɛba n nɔŋɛ en ge me tiregera dɔla a nɔɔrɛ la.

•  Hon wan ta’an eŋɛ sɛla: Ho san zamesa Baabule la, bisɛ Naayinɛ n boti sɛla la eŋa n ka boti sɛla. Soke homea yeti, ‘Mam wan eŋɛ la bem teere ta’an basɛ ti n Naaŋɔdaana la puurɛ pee.’​—1 Tesalonika 4:1.

 Dekɛ Naayinɛ pa’alegɔ la tum tuuma ge nyɛ eŋa n wan soŋɛ ho se’em

•  Baabule la n tɔɣɛ sɛla: “Wa’ana lem bisɛ, Naayinɛ n ani soŋa se’em.”​—Yooma 34:8, The Bible in Basic English.

•  Vuurɛ: Naayinɛ beem ho ti ho wa’ana baŋɛ eŋa n ani soŋa se’em. Ho san baŋɛ Naayinɛ n nɔŋɛ ho se’em la, la wan basɛ ti ho vurege lɛm en.

•  Hon wan ta’an eŋɛ sɛla: Ho san kaala Baabule la ge tara Naayinɛ pa’alegɔ tuna tuuma, ho wan nyɛ nyuurɔ zo’e zo’e. (Isaiah 48:17, 18) Naayinɛ soŋɛ la nɛreba zo’e zo’e ti ba ta’an tee ba vom ge ti bamam la ba deodoma nyaa tara pupeelum. Ho ta’an tɔɣesɛ ba makesonɛ la ti la soŋɛ hɔ. e

 Nɛreba n ti’isɛ se’em: To kan ta’an bɔkɛ Naayinɛ n ani se’em.

 Yelemɛŋɛrɛ: La kpe’em mɛ ti to bɔkɛ Naayinɛ yɛla ase’a wuu eŋa n de vo’osum la. Ge to wan ta’an kelum baŋɛ en. Baabule la yeti la nari ti to baŋɛ Naayinɛ ta’an nyɛ daarewoo nyɔvore. (Yon 17:3) Baabule la kɔ’ɔn basɛ ti la niɛ peelumi ti to baŋɛ to Naaŋɔdaana la n ani se’em, eŋa n tari putɛse’a bɔ’ɔra nɛresaala la tingɔŋɔ wa, la a pa’alegɔ la. (Isaiah 45:18, 19; 1 Timoti 2:4) Wuu ton puɣum nyɛ se’em la, Baabule la le basɛ ti to baŋɛ la Naayinɛ yu’urɛ. (Yooma 83:18) Bala la, to wan ta’an baŋɛ Naayinɛ ge le vurege lɛm en.​—Yames 4:8.