Ɛɛ, a wan lebese. Baabule la, la zi’irego poan yɛla pa’alɛ ti Naayinɛ leregere zusega mɛ. Baabule la yeti: ‘A [Naayinɛ] bo’ori sɛba n zoti en sunboolum mɛ, a keleseri ba kaasega mɛ ge faara ba basa.’ (Yooma 145:19) Ge Naayinɛ san wan lerege ho zusega, la nyaa dela hon la eŋa tiŋasuka n ani se’em.

Yelese’a n pakɛ Naayinɛ

•   La nari ti to zusa la Naayinɛ daɣɛ Yezu, Mari, saints, malesi bii wɔ̃sum. Yehowa Naayinɛ ma’a n de ‘Se’em n keleseri zusega.’​​—Yooma 65:2.

•   La nari ti to zusa ti la dɔla Naayinɛ n boti sɛla ti la bɔna Baabule la poan la.​​—1 Yon 5:14.

•   La nari ti to zusa dɔla Yezu yu’urɛ poan ti la pa’alɛ ti to tari gilema bɔ’ɔra a kpe’eŋo la. Yezu yuun yeti: ‘Nɛra ka boi wan ta’an wa’an Sɔ la zɛ’an na san daɣena a doose la mam poan.’​​—Yon 14:6.

•   La nari ti to tari sakerɛ to san zusa ge me zusera ti to sakerɛ malum pa’asa.​​—Matu 21:22; Luke 17:5.

•   La nari ti to siregeri tomea ge tara yelemɛŋɛrɛ. Baabule la yeti: ‘Yehowa boi la zuin sa ge bisera tarendoma.’​​—Yooma 138:6.

•   La nari ti to kɔ’ɔn zusa saŋa woo. Yezu yuun yeti: ‘kɔ’ɔn sokeri ya ge ya wan to’e.’​​—Luke 11:9.

Yelese’a n ka pakɛ Naayinɛ

•   Ho buuri bii hon ze’ele tinsɛka. ‘Naayinɛ ka gãseri ge tinsɛka woo poan nɛresɛka n zoti en ge ita sɛla n ani soŋa a ni to’e en mɛ.’​​—Tooma 10:34, 35.

•   Hon wan ana se’em ge zusa ka ba’ɛ pakɛ en. Ho ta’an zusa ho san zi’a, ho nyiɣini mɛ, ho kpa la duma bii ho zɛ mɛ.​​—1 Yelebiŋ’a 17:16; Nehemia 8:6; Daniel 6:10; Mark 11:25.

•   La ka pakɛ la hon pu’useri ti la yɛsera bii ho pu’useri la ho suure poan. Naayinɛ puɣum ni lerege la zusega sɛka ti to zusera to suure poan ti nɛreba ka baŋera.​​—Nehemia 2:1-6.

•   La ka pakɛ la yeledaaŋɔ la zo’e mɛ bii la pɔɛ mɛ. Naayinɛ kpemese ho giila ti ‘dekɛ [ho] putɛyiila bo en se’ere n sɔi la a fabeli [ho] yele mɛ.’​—1 Peter 5:7.