Yezu lua bunɔ la n faaɛ sɛba n tari sakerɛ la basɛ. (Matu 20:28) Bala la, Baabule la yi’iri Yezu la “teŋa wa zuo faanra.” (1 Yon 4:​14) La me yeti: “Yesu ma’an n wan ta’an fan ya bahɛ ge Yenɛ daa ka bahɛ te nɛra ayema bɔna teŋa wa zuo te nɛra wan yi a yu’urɛ te a fan en bahɛ.”​—Tooma 4:​12.

 Yezu ‘yuun ki bo la nɛresɛba woo’ n tari sakerɛ bɔ’ɔra en la. (Hebru 2:9; Yon 3:​16) Bala pooren, “Yenɛ daa bahɛ en te a ihege a kum poan” nyaa lebe saazuo ta dɛna vo’osum nɛra. (Tooma 3:​15) Bilam, Yezu wan ta’an “fan nɛresɛba n wan doohe enŋa zen’en paɛ Yenɛ zen’en. Se’ere n sɔe la, a dela se’em n vɔe wuuha sohora Yenɛ bɔ’ɔra ba.”​—Hebru 7:​25.

Beni n sɔi ti la nara ti Yezu bɛlena bɔ’ɔra tɔ?

 To za’a dela be’emdoma. (Arom 3:​23) Be’em n sa’am tomam la Naayinɛ tiŋasuka bɔŋa ge me basɛ ti to kiira. (Arom 6:​23) Ge Yezu n de sɛba n tari sakerɛ lua bunɔ la poan la “nu’poŋmɛ’ɛra.” (1 Yon 2:1, footnote) Yezu n beleni Naayinɛ bɔ’ɔra ba ti a kɛlesa ba zusega ge me dɔla Yezu kum la poan dita suguri bɔ’ɔra ba. (Matu 1:21; Arom 8:​34) Naayinɛ keleseri Yezu beleŋo wa mɛ se’ere n sɔi la, la makɛ mɛ la Eŋa n boti sɛla. Naayinɛ yuun tum Yezu ti a wa’an tingɔŋɔ wa zuo na dɛna asaala woo “faanra.”​—Yon 3:​17.

La dela to yeen sakɛ bo Yezu ma’a ta’an nyɛ fãarɛ?

 Aayi. La boi ti la nari ti to sakɛ bo Yezu ta’an nyɛ fãarɛ ge sɛla n le pa’asɛ. (Tooma 16:30, 31) Baabule la yeti: “Nɛra han yeti enŋa sakɛ mɛ ma’an ge ka eta etesoŋɔ, a sakerɛ la dela yoo. La ane wo nɛra vo’ohom n ba’ahɛ te a ki se’em la.” (Yames 2:​26) To san wan nyɛ fãarɛ la nari ti to:

•   Zamesɛ Yezu la a Sɔ Yehowa yɛla.​—Yon 17:3.

•   Tara sakerɛ ba poan.​—Yon 12:44; 14:1.

•   Nana ba nɔya la ti la pa’alɛ ti to tara sakerɛ. (Luke 6:46; 1 Yon 2:​17) Yezu yuun yeti daɣɛ nɛra woo n yi’iri en “Daana” n wan nyɛ fãarɛ “ge sɛba ma’an n ete sɛla te [eŋa] Sɔ n boe saazuo ha la bɔta.”​—Matu 7:​21.

•   Kelum tara sakerɛ hali la wuŋerɛ poan. Yezu yuun basɛ ti bala niɛ peelum mɛ la eŋa n yuun yeti: “Se’em n sɛ ze’ele yelemɛŋɛrɛ la poan wa paɛ teŋa ba’ahegɔ poan wan ta nyɛ faanrɛ.”​—Matu 24:13.