Aayi. Baabule la ka yeti ligeri dela bunbɛ’a bii ligeri n ta’aseri be’em woo. Nɛreba n ni yeti “ligeri n ta’aseri be’em woo” la, daɣɛ bala ti Baabule la yele. Baabule la yeti “ligeri nɔŋerɛ n basɛ ti be’em woo bɔna.” a​—1 Timoti 6:10, King James Version, emphasis ours.

•  Baabule la tɔɣɛ ligeri yele la wani?

•  Beni n sɔi ti Baabule la kaɣɛ tɔ ti to da nɔŋɛ ligeri?

•  Baabule la n tɔɣɛ ligeri yele se’em la wan soŋɛ to la wani?

•  Baabule kaalegɔ zɛ’ɛsi n tɔɣeri ligeri yele

 Baabule la yeti to san tara ligeri tuna tuuma soŋa soŋa la wan ta’an dɛna “te’elego” bo to. (Pa’ala 7:12) Leyɛ’ɛsa, Baabule la pɛɣɛ nɛresɛba n ni dekɛ ba ligeri la ba lɔɣɔrɔ bɔ’ɔra yɛri yɛri mɛ.​—Magaha 11:25.

 Baabule la ka’am tɔ ti to da basɛ ti to puti’irɛ kɔ’ɔn bɔna ligeri poan. Ku yeti: “Da ba’ɛ kɔ’ɔn ti’isɛ ya la ligeri ma’a yele. Tari ya pupeelum la sɛla ti ya nyɛ.” (Hebru 13:5) To zamesɛ sɛla dela to mina ligeri tarega ge da ɛɛra taresum. To tuɣum basɛ ti sɛla ti to tara la seke tɔ n de wuu dia, lɔɣɔyɛɛtɔ la ga’aregɔ zɛ’an.​—1 Timoti 6:8.

 Punya’andoma kan nyɛ daarewoo nyɔvore. (Epesus 5:5) Sɛla n sɔi la, punya’anɛ laɣum dɛna la baɣakaabegɔ bii pumpɔreŋɔ pu’usegɔ. (Kolose 3:5) Leyɛ’ɛsa, punya’andoma ni zaɣesɛ Baabule naresum yɛla la mɛ la wan eŋɛ se’em ti ba ta’an nyɛ ba boti sɛla la. Magaha 28:20 yeti, ‘se’em n ziɣeri ti a dɛna dakãrɛ tɔtɔ tɔtɔ wan namesɛ.’ La ta’an ta mɔbegɛ ba gaŋɛ ti ba bɔta ti ba tum be’o n de wuu vuusego, fãa, kinkisum, zuura nɛreba, bii kuura ba.

 Hali ligebɔrɛ san ka basɛ ti nɛra tum be’em, la ta’an kelum daam en. Baabule la yeti “nɛreba basɛba boti ti ba tara mɛ, bala me n ne ta’asɛ ti pa’abe’ero kena na la bɛ̃regɔ nyɔgɛ ba.”​—1 Timoti 6:9.

 To san ka basɛ ti ligeri pã’asɛ tɔ ge kelum tara sarum soŋa ita Naayinɛ n boti sɛla, to puurɛ wan pee ge ti a me wan soŋɛ tɔ. Naayinɛ yele sɛba n boti ba eŋɛ sɛla ti a puurɛ pee la yeti: “Mam kan malum basɛ hɔ, n me kan malum zaɣesɛ hɔ.” (Hebru 13:5, 6) A le yeti “se’em n de yelemɛŋɛrɛdaana wan to’e yɔɔre zo’e.”​—Magaha 28:20.