Nɛnɛra ka tabelɛ nyɛ Naayinɛ la a nini. (Yɛhega 33:20; Yon 1:​18; 1 Yon 4:​12) Baabule la yeti ‘Naayinɛ dela vo’osum,’ vom sebo ti nɛresaala kan ta’an dekɛ a nini nyɛ.​​—Yon 4:24; 1 Timoti 1:​17.

 Malesi la nyɛti Naayinɛ mɛ se’ere n sɔi la ba dela vo’osum. (Matu 18:10) Leyɛ’ɛsa, nɛreba basɛba wan ki ti ba isige ba keŋɛ saazuo dɛna vo’osum ge me wan ta’an nyɛ Naayinɛ.​​—Filipi 3:​20, 21; 1 Yon 3:2.

 Baabule la ni dekɛ ton nyɛti sɛla makɛ la sɛla n wan ta niɛ peelumi. (Isaiah 6:​10; Yeremia 5:21; Yon 9:​39-​41) Bala mea nɔɔ ti nɛra wan ta’an nyɛ Naayinɛ nananawa la a nini a san yu’ɛ a ‘puti’irɛ,’ doose la eŋa n wan tara sakerɛ, mina En ge me nɔŋɛ A hala la. (Epesus 1:​18) Baabule la pa’alɛ ton wan ita yelese’a ta’an nyɛ sakerɛ kaŋa taaba.

•   Doose naaŋɔ lɔɣɔrɔ poan zamesɛ Naayinɛ hala maɣesɛ wuu nɔŋerɛ, yɛri yɛri bɔ’a, a yɛm la a paŋa. (Arom 1:​20) Yob n yuun nyɛ Naayinɛ naaŋɔ lɔɣɔrɔ la, la yuun ani en wuu a nyɛ Naayinɛ mɛ la a nini.​​—Yob 42:5.

•   Zamesɛ Baabule la ta’an baŋɛ Naayinɛ. Baabule la basɛ ti to tara suure lua ti, ‘ho san ɛ Naayinɛ a wan basɛ ti ho nyɛ en.’​​—1 Yelebiŋ’a 28:9; Yooma 119:2; Yon 17:3.

•   Zamesɛ Yezu vom yɛla ta’an baŋɛ Naayinɛ. Yezu n yuun tari a Sɔ, Yehowa Naayinɛ hala la zuo ti a yuun ta’an yeti: ‘Hon se’em nyɛ mam la nyɛ Sɔ la mɛ.’​​—Yon 14:9.

•   Vɔna vom sebo n wan basɛ ti Naayinɛ puurɛ pee ge bisɛ eŋa n wan soŋɛ ho se’em. Yezu yuun yeti: ‘Pupeelum boi mɛ la pupɛɛleba, se’ere n sɔi la ba wan nyɛ Naayinɛ.’ Wuu ton puɣum baŋɛ se’em la, nɛreba basɛba boi mɛ ti Naayinɛ puurɛ pee la ba. A wan isige ba kum poan ti ba keŋɛ saazuo ta ‘nyɛ Naayinɛ.’​​—Matu 5:8; Yooma 11:7.

 Baabule gulesegɔ ase’a ni tɔɣɛ yele la ti la ana wuu nɛreba tabelɛ nyɛ Naayinɛ la ba nini. Ge yelesum la ni pa’alɛ ti maleka n ni soe Naayinɛ tɔɣera bii lilige amea pa’alɛ.

 Malesi.

Diimi sa la, Naayinɛ yuun ni tum la malesi ti ba keŋɛ nɛreba zɛ’an ta tɔɣɛ a yu’urɛ poan. (Yooma 103:20) Makerɛ, Naayinɛ yuun doose la tuntuo n diti poan tɔɣɛ bo Moses. Baabule la yeti, ‘Moses pĩ la a nɛŋa se’ere n sɔi la dabeem n daa tari en ti a bisɛ yelemɛŋɛrɛ Naayinɛ la.’ (Yɛhega 3:​4, 6) Moses yuun ka nyɛ Naayinɛ la a nini ge yelesum la pa’alɛ ti a yuun tuɣum nyɛ la ‘Yehowa maleka.’​​—Yɛhega 3:2.

 Bala mea nɔɔ ti Baabule la san yeti Naayinɛ ‘yuun ze mɛ tɔɣera bɔ’ɔra Moses,’ la pa’alɛ ti Naayinɛ yuun tɔɣeri la a puti’irɛ n de se’em bɔ’ɔra Moses. (Yɛhega 4:​10, 11; 33:11) Moses yuun ka nyɛ Naayinɛ la a nini se’ere n sɔi la, Naayinɛ ‘yuun doose la malesi poan’ pa’alɛ en yɛla. (Galatia 3:​19; Tooma 7:​53) Ge Moses yuun tari la sakerɛ n kpe’em Naayinɛ poan. Baabule la pa’alɛ ti a yuun nyɛ la ‘Se’emdaana ti to ka nyɛta la.’​​—Hebru 11:27.

 Wuu Naayinɛ n yuun doose malesi poan tɔɣɛ bo Moses se’em la, bala mea nɔɔ ti a yuun doose malesi poan tɔɣɛ bo Abraham. Nɔkpe’ene ka ti, ho san yeen kaala Baabule la ge ka ti’isa de yele, la ta’an ana wuu Abraham yuun nyɛ Naayinɛ mɛ la a nini. (Pin’ileŋɔ 18:​1, 33) Ge Baabule la pa’alɛ ti ‘buraasi sitã’ n yuun keŋɛ Abraham zɛ’an la yuun dela malesi ti Naayinɛ tum ba. Abraham yuun baŋɛ ti ba dela Naayinɛ tuuntuneba. A me yuun tɔɣɛ bo ba mɛ wuu a tɔɣeri bɔ’ɔra la Yehowa mea.​​—Pin’ileŋɔ 18:​2, 3, 22, 32; 19:1.

 Liligere.

Naayinɛ me yuun le doose la liligere poan tɔɣɛ bo nɛreba bii a basɛ ti nɛra nyɛ sɛla a puti’irɛ poan. Makerɛ, Baabule la n yeti Moses la Israeldoma la ‘yuun nyɛ la Israel Naayinɛ la,’ ba yuun sirum ‘nyɛ la liligere n pa’alɛ yelemɛŋɛrɛ Naayinɛ la yele.’ (Yɛhega 24:​9-​11) Bala mea nɔɔ ti Baabule la yeti saŋa ase’a nɔdɛ’ɛseba la yuun ‘nyɛ Naayinɛ’ mɛ. (Isaiah 6:1; Daniel 7:9; Amos 9:1) Yele woo poan, gulesegɔ la pa’alɛ ti ba yuun nyɛ Naayinɛ mɛ liligere poan ge daɣɛ ba ninin.​​—Isaiah 1:1; Daniel 7:2; Amos 1:1.