Be yé nyɔ́ lěxe wɛkɛ lɔ kpó ogbɛ̀ kpó wá aimɛ ɖó ya? Eyeo. Mɛɖélɛ lɛnɖɔ wenywɛtɔ xe nɔ dindóna wɛkɛ lɔ lɛ nyɔ́ lěxe wɛkɛ lɔ wá aimɛ ɖó. Amɔ́, wenywɛtɔ Marcelo Gleiser xe nɔ dindónanu dó sunhwlɛvu lɛ jí bo nɔ kplɔ́nnumɛ to wexɔmɛ alavɔ tɔn to Dartmouth College bosɔ tindó ayixaawe enyí Mawu tíin ɖɔmɔ: “Mǐ ma ko mɔdóna nuɖékpókpé gandó lěxe wɛkɛ lɔ wá aimɛ ɖó go.”

Onǔ mɔnkɔ ɖé wɛ xósɔ́ linlinwe ɖé tɔn dóxya: “É vɛawu tawun nadó nyɔ́ lěxe ogbɛ̀ wá aimɛ ɖó to Ayigba jí: Susu osé kpó onǔ dóglɔ tɔn xe yè ná dó nyɔ́ lěxe ogbɛ̀ bɛ́jɛeji ɖó to Ayigba jí lɛ kpó tɔn wɛ ko bu é ma kpɔ́.” (Science News) Oxó voovo exelɛ dóxya ɖɔ wenywɛtɔ lɛ ma nyɔ́ lěxe wɛkɛ lɔ kpó ogbɛ̀ kpó wá aimɛ ɖó.

Amɔ́, a gán to kinkanse ɖewe ɖɔ, ‘Enyí mɛdatɔ ɖé wɛ zɔ́n bɔ nutogbɛ̀ lɛ dó tíin to ayigba jí, mɛnu wɛ mɛlɔ lo?’ Kpóɖɔ a gán ko kàn kanbyɔ́ exelɛ sè kpɔ́n: ‘Enyí Mɛdatɔ nunywɛtɔ xe sɔ́ nyí owǎnyinɔ ɖé tíin, naegbɔ̌n bɔ é dó jo gbɛtɔvi xe é dá lɛ dó bɔ yé to yaji? Naegbɔ̌n bɔ sinsɛ̀n lɛ dó gbɔn kámɛ-gòmɛ? Naegbɔ̌n bɔ mɛxe nɔ sɛ̀n Mawu lɛ dó to nuylankan wà sɔmɔ, bɔ é ma ka nɔ yí nuɖé wà?’

É hɔnwun ɖɔ wenywɛtɔ lɛ ma gán ná gblɔndó kanbyɔ́ enɛlɛ tɔn. Amɔ́, exe ma dóxya ɖɔ gblɔndó xe sɔgbe lɛ ma tíin. Mɛsusu ko mɔ gblɔndó xe jɛ lɛ to Biblu mɛ.

Enyí a jlo ná nyɔ́ nǔxe zɔ́n bɔ wenywɛtɔ xe yí hwenu dó kplɔ́n Biblu ɖélɛ dó yise ɖɔ Mɛdatɔ ɖé tíin, yì nɔtɛn Intɛnɛt tɔn lɔ jw.org jí. Enɛgodo, dǐn adà lɔ “kpɔ́ndóhlan lɛ gandó bɛ́jɛeji ogbɛ̀ tɔn go.”