Nuxewutu A Ðóná Nywɛ Enyí Mɛdatɔ ɖé Tíin
Onǔ titewungbe wɛ é nyí nadó nywɛ enyí Mɛdatɔ ɖé tíin kavǐ é ma tíin. Etɛ́wutu? Enyí a kudeji ɖɔ Jixwéyɛxwe gǎnhunǔkpótɔ́ ɖé tíin nǔgbó, vlavo a ná jlo nadó dǐn kunnuɖenu xe dóxya ɖɔ ewɔ wɛ dówatɔ Biblu tɔn. Kpóɖɔ enyí a ɖejidó Biblu go, be a gán ɖuale etɔn to adà exelɛ mɛ.
A ná ɖó ayǎjɛ dógɔ́ to gbɛ̀mɛ
BIBLU ÐƆMƆ: ‘Jixwéyɛxwe wà ɖagbe, bo nɔ ná mì jikun sɔ́n olɔn kpóɖɔ ojlɛ̌ sínsɛ́n susugégé lɛ tɔn bosɔ nɔ yí núɖùɖù dó kpékɔna mì bo nɔ yí ayǎjɛ dó gɔ́ ahun mìtɔn.’—Owalɔ lɛ 14:17.
NǓXE É ZƐƐMƐDÓ: Jixwéyɛxwe wɛ dá nuɖagbe xe a to vivi etɔn ɖù to ogbɛ̀ lɔ mɛ lɛkpó. A ná nɔ dókpɛ́ dógɔ́ enyí a wá mɔnukúnnujɛemɛ ɖɔ owǎnyi xe Jihweyɛhwe ɖó ná we wɛ zɔ́n bɔ ewɔ dó ná we onǔ enɛlɛ.
A gán mɔ ayinamɛ ɖagbe lɛ nadó zán ogbɛ̀ towe
BIBLU ÐƆMƆ: “Hyɛ ná mɔnukúnnujɛ nǔxe dǒdówiwa, hwɛdida dódó kpó nǔxe sɔgbe kpó zɛɛmɛdó mɛ, yèɖɔ zɛɛmɛ gǐgɔ́ nuɖagbe lɛkpó tɔn.”—Xóhwinhwɛ́n lɛ 2:9.
NǓXE É ZƐƐMƐDÓ: Jixwéyɛxwe wɛ dá we bo nyɔ́ nǔxe sín hudó a ɖó nadó ɖó ayǎjɛ. Biblu xixya ná gɔ́alɔna we nadó nyɔ́ lěxe a ná zán ogbɛ̀ towe ɖó.
A ná mɔ gblɔndó ná kanbyɔ́ xe nɔ ɖuahunmɛna we lɛ
BIBLU ÐƆMƆ: ‘A ná mɔ onywɛ Jihweyɛhwe tɔn.’—Xóhwinhwɛ́n lɛ 2:5.
NǓXE É ZƐƐMƐDÓ: Enyí a mɔnukúnnujɛemɛ ɖɔ Mɛdatɔ ɖé tíin nǔgbó, é ná bɔawuna we nadó mɔ gblɔndó ná kanbyɔ́ titewungbe tayiɖi exelɛ: Naegbɔ̌n mǐ dó to ogbɛ̀ lɔ mɛ? Naegbɔ̌n yajiji dó sù sɔmɔ? Etɛ́wɛ nɔ jɔ to okú godo? Gblɔndó Biblu tɔn lɛ gán gɔ́alɔna we susu.
A ná nɔ kpɔ́n sɔgódo hlán kpó ayǎjɛ kpó
BIBLU ÐƆMƆ: “‘Yɛn nyɔ́ nǔxe lɛn n’te gandó mì go lɛ ganji,’ wɛ Jehovah ɖɔ, ‘yèɖɔ linlɛn jijɔxo tɔn lɛ bɔ é ma nyí nugbajɛmɛji tɔn lɛ, ná mìwlɛ nidó tindó sɔgodo ɖagbe ɖé kpó toɖiɖo ɖé kpó.’”—Jelemia 29:11.
NǓXE É ZƐƐMƐDÓ: Jixwéyɛxwe dókpà ɖɔ zanɖe din, emi ná ɖé kannyiylan, yajiji kpó okú lɔsu kpó sɛ̀. Jiɖiɖe dó oxó Jihweyɛhwe tɔn enɛlɛ go ná gɔ́alɔna we nadó nɔ ɖoakɔnna nuxahun gbɛ̀mɛ tɔn lɛ.
