1 Ahọlu lẹ 18:1-46
18 To ojlẹ delẹ godo, to owhe atọ̀ntọ mẹ,+ ohó Jehovah tọn wá Elija dè dọmọ: “Yì, bo do dewe hia Ahabi, yẹn nasọ hẹn jikun ja do aigba nukunmẹ.”+
2 Elija sọ dedo nado do ede hia Ahabi, ṣigba huvẹ lọ gbẹ́ sinyẹn+ to Samalia to whenẹnu.
3 To ojlẹ enẹ mẹ, Ahabi ylọ Obadia, yèdọ mẹhe nọ penukundo whédo lọ go. (Obadia nọ dibusi Jehovah taun,
4 podọ to whenue Jezebẹli+ to yẹwhegán Jehovah tọn lẹ hù,* Obadia bẹ yẹwhegán 100 whlá do oslò lẹ mẹ, yèdọ omẹ 50 do oslò dopo mẹ bosọ nọ na yé núdùdù po osin po.)
5 Ahabi sọ dọna Obadia dọmọ: “Dán gbọn aigba lọ ji, gbọn asisa osin tọn lẹpo tó podọ gbọn agbàdo* lẹpo mẹ. Vlavo mí sọgan mọ ogbé-mú he pé nado hẹn osọ́ po otlò* lẹ po dogbẹ̀, na kanlin mítọn lẹpo nikaa kú.”
6 Enẹwutu, yé má aigba he ji yé na gbọn lọ to yedelẹ ṣẹnṣẹn. Ahabi kẹdẹ wle aliho de, bọ Obadia lọsu wle aliho devo.
7 Dile Obadia to aliji jei, Elija ko tin to finẹ nado pé e. To afọdopolọji, Obadia yọnẹn dọ ewọ wẹ, e sọ ṣinyọ́n nukunmẹ ai bo dọmọ: “Hiẹ oklunọ ṣie Elija wẹ ya?”+
8 Elija gblọn dọmọ: “Yẹn wẹ. Yì bo dọna oklunọ towe dọ: ‘Elija tofi.’”
9 Ṣigba, Obadia gblọn dọmọ: “Ylando tẹwẹ n’wà bọ hiẹ nado jo devizọnwatọ towe do alọ Ahabi tọn mẹ na e nido hù mi?
10 Dile Jehovah Jiwheyẹwhe towe togbẹ̀, akọta kavi ahọluduta de ma pò he mẹ oklunọ ṣie ma ko domẹhlan nado yì dín we gbọn. Eyin yé dọ dọ, ‘E ma tofi,’ ewọ nọ hẹn ahọluduta lọ po akọta lọ po nado whlé dọ yé ma mọ we.+
11 Todin, hiẹ to didọ dọ, ‘Yì bo dọna oklunọ towe dọ: “Elija tofi.”’
12 Eyin yẹn tọ́n sọn dè we din, gbigbọ Jehovah tọn na ze we sọyi+ fie n’ma yọnẹn de, podọ eyin n’dowẹn Ahabi bọ e ma wá mọ we, e na hù mi janwẹ. Ṣogan, sọn jọja whenu gbọ́n wẹ yẹn devizọnwatọ towe ka ko to budisi Jehovah.
13 Be yè ma ko dọna oklunọ ṣie nuhe n’wà to whenue Jezebẹli to yẹwhegán Jehovah tọn lẹ hù wẹ, yèdọ lehe n’whlá yẹwhegán Jehovah tọn 100 do gbọn pipli omẹ 50 tọn bibẹ do oslò de mẹ dali bo nọ to núdùdù po osin po na yé ya?+
14 Ṣigba todin, hiẹ to didọna mi dọ, ‘Yì bo dọna oklunọ towe dọ: “Elija tofi.”’ E na hù mi janwẹ.”
15 Amọ́, Elija dọmọ: “Dile Jehovah awhànpa lẹ tọn he n’nọ sẹ̀n* lọ togbẹ̀, yẹn na do dee hia ẹ to egbé.”
16 Enẹwutu, Obadia dedo nado yì pé Ahabi bo dowẹn ẹn, Ahabi sọ wleali nado yì pé Elija.
17 Whenue Ahabi mọ Elija tlolo, e dọna ẹn dọmọ: “Hiẹ mẹhe to tukla daho* hẹnwa Islaeli ji lọ mọ n’te ya?”
18 Elija sọ dọmọ: “E ma yin yẹn wẹ hẹn tukla wá Islaeli ji, ṣigba hiẹ po whédo otọ́ towe tọn po wẹ wàmọ, to whenue mì gbẹkọ gbedide Jehovah tọn lẹ go bo hodo Baali lẹ.+
19 Todin, ylọ Islaeli pete pli na mi to Osó Kalmẹli ji,+ gọna yẹwhegán Baali tọn 450 lọ lẹ po yẹwhegán dòtin wiwe*+ lọ tọn 400 lọ lẹ po he nọ dùnú to tafo Jezebẹli tọn ji.”
20 Ahabi sọ dowẹn hlan omẹ Islaeli tọn lẹpo bo bẹ yẹwhegán lọ lẹ pli dopọ to Osó Kalmẹli ji.
21 Elija sọ dọnsẹpọ gbẹtọ lọ lẹpo bo dọmọ: “Nawẹ e na dẹnsọ bọ mìwlẹ na gbẹ́ to ayihaawe tindo?*+ Eyin Jehovah wẹ Jiwheyẹwhe nugbo lọ, mì hodo e;+ amọ́ eyin Baali wẹ, mì bosọ hodo e!” Ṣigba, gbẹtọ lọ lẹ ma gblọnho depope na ẹn.
22 Elija sọ dọna gbẹtọ lọ lẹ dọmọ: “Yẹn dopo akàn wẹ yin yẹwhegán Jehovah tọn he pò,+ bọ yẹwhegán Baali tọn lẹ yin sunnu 450.
23 Mì gbọ yé ni na mí oyìnsú winyanwinyan awe, yewlẹ nasọ de oyìnsú winyanwinyan dopo bo já ẹ do flinflin bosọ tẹ́ ẹ do nake ji, amọ́ yé ma dona flọ miyọ́n do e. Yẹnlọsu na wleawuna oyìnsú winyanwinyan awetọ lọ bo na ze e do nake ji, amọ́ n’ma na flọ miyọ́n do e.
24 Enẹgodo, mì na dawhá ylọ oyín yẹwhe mìtọn tọn,+ yẹnlọsu na dawhá ylọ oyín Jehovah tọn. Jiwheyẹwhe he na na gblọndo gbọn miyọ́n didohlan dali wẹ na dohia dọ ewọ wẹ Jiwheyẹwhe nugbo lọ.”+ Gbẹtọ lọ lẹpo sọ dọmọ: “Nuhe a dọ yọ́n.”
25 Todin, Elija dọna yẹwhegán Baali tọn lọ lẹ dọmọ: “Mìwlẹ whẹ́whẹ́ ni de oyìnsú winyanwinyan dopo bo wleawu etọn, na mìwlẹ wẹ sù hugan. Enẹgodo, mì ylọ oyín yẹwhe mìtọn tọn, amọ́ mì ma dona flọ miyọ́n do e.”
26 Yé sọ ze oyìnsú winyanwinyan he yin nina yé lọ bo wleawu etọn bosọ jẹ oyín Baali tọn ylọ ji sọn afọnnu kakajẹ whèmẹ dọmọ: “Baali E, siọ mí!” Ṣigba, ogbè de ma yin sisè, mọ mẹdepope ma siọ.+ Yé sọ to linlọ́n pé lẹdo agbà he yé ko do lọ.
27 To nudi whèmẹ, Elija jẹ yé ṣanko ji bo dọmọ: “Mì yí ogbè lélé do dawhá bo! Yẹwhe de wẹ e ka yin maa!+ Vlavo nulẹnpọn sisosiso wẹ e te kavi afọdai gbé wẹ e yì.* Kavi amlọndọ wẹ e te bọ mẹde dona fọ́n ẹn!”
28 Yé sọ yí ogbè lélé do to awhádo bo yí ohí po owhán lẹ po do to awugble yede, sọgbe hẹ aṣa yetọn, sọmọ bọ ohùn to sisà gbọn yé go pete.
29 Whèmẹ ko juwayi bọ yé gbẹ́ pò to zingidi ji* kakajẹ whèjai to ojlẹ he mẹ avọ́nunina jinukun-lili tọn nọ yin bibasi, amọ́ ogbè de ma yin sisè, mọ mẹdepope ma siọ; mẹdepope ma na yé ayidonugo.+
30 To godo mẹ, Elija dọna gbẹtọ lọ lẹpo dọmọ: “Mì sẹpọ mi.” Gbẹtọ lọ lẹpo sọ sẹpọ ẹ. E sọ vọ́ agbà Jehovah tọn he ko yin hihọliai+ lọ jlado.
31 Elija sọ ze zannu 12 sọgbe hẹ sọha hẹnnu visunnu Jakọbu tọn lẹ tọn, mẹhe dè ohó Jehovah tọn ko wá dọmọ: “Islaeli wẹ hiẹ na nọ yin.”+
32 E yí zannu lọ lẹ do dó agbà+ de do oyín Jehovah tọn tamẹ. E sọ kùn osindò de lẹdo agbà lọ pé, filọ gblo sọmọ bọ jinukun ojlẹnu sea tọn* awe sọgan yin dido do finẹ.
33 Enẹgodo, e to nake lọ lẹ do whinnuwhinnu bo já oyìnsú winyanwinyan lọ do flinflin bosọ bẹ ẹ do nake lọ ji.+ Todin, e dọmọ: “Mì dà osin gọ́ ozẹ́n daho ẹnẹ bo kọ̀n do avọ́nunina mimẹ̀ lọ ji podọ do nake lọ lẹ ji.”
34 E sọ dọmọ: “Mì vọ́ wàmọ.” Yé sọ vọ́ wàmọ. E sọ dọ whladopo dogọ dọmọ: “Mì vọ́ wàmọ whla atọ̀ntọ.” Yé sọ vọ́ wàmọ whla atọ̀ntọ.
35 Osin sọ gbàpe lẹdo agbà lọ, ewọ sọ hẹn osindò lọ gọ́ po osin po.
36 To nudi ojlẹ he mẹ avọ́nunina jinukun-lili tọn whèjai tọn nọ yin bibasi,+ yẹwhegán Elija deafọ yinukọn bo dọmọ: “Jehovah E, Jiwheyẹwhe Ablaham,+ Isaki+ po Islaeli po tọn, gbọ e ni yin yinyọnẹn to egbehe dọ hiẹ wẹ yin Jiwheyẹwhe to Islaeli bọ yẹn yin devizọnwatọ towe, podọ gbọn ohó towe gblamẹ wẹ n’wà onú ehe lẹpo te.+
37 Siọ mi, Jehovah E! Siọ mi, na omẹ ehelẹ nido yọnẹn dọ hiẹ Jehovah wẹ Jiwheyẹwhe nugbo lọ, bọ hiẹ to ahun yetọn lẹ lẹhlan dè we.”+
38 To whenẹnu, miyọ́n Jehovah tọn jẹte sọn aga bo fiọ avọ́nunina mimẹ̀ lọ,+ nake lọ lẹ, zannu lọ lẹ po kọ́gudu lọ po, e sọ didọ́ osin sọn osindò lọ mẹ.+
39 Whenue gbẹtọ lọ lẹpo mọ ehe, yé ṣinyọ́n nukunmẹ ai to afọdopolọji bo dọmọ: “Jehovah wẹ Jiwheyẹwhe nugbo lọ! Jehovah wẹ Jiwheyẹwhe nugbo lọ!”
40 Whenẹnu, Elija dọna yé dọmọ: “Mì wle yẹwhegán Baali tọn lọ lẹ! Mì dike dopo tata to yé mẹ họ̀ngán blo!” To afọdopolọji, yé wle yé bọ Elija plan yé jẹte yì tọ̀sisa* Kiṣọni+ tọn kọ̀n bo hù yé to finẹ.+
41 Todin, Elija dọna Ahabi dọmọ: “Hẹji yì bo dù bosọ nù, na jikun daho de to núdọ.”+
42 Ahabi sọ hẹji yì nado dù bo nù, dile Elija hẹji yì Kalmẹli ji bo jẹklo bo ṣinyọ́n nukunmẹ ai do kligonu etọn lẹ ṣẹnṣẹn.+
43 E sọ dọna devizọnwatọ etọn dọmọ: “Jaale, hẹji yì bo pọ́n hùwaji hlan.” Ewọ sọ hẹji yì bo pọ́n bosọ dọmọ: “N’ma mọ nudepope.” Elija sọ vọ́ dọna ẹn whla ṣinawe dọmọ, “Gọyì.”
44 Whla ṣinawetọ lọ, devizọnwatọ etọn dọna ẹn dọmọ: “Pọ́n! Aslọ pẹvi he taidi alọ gbẹtọ tọn de to tintọ́n sọn hùmẹ.” Todin, Elija dọmọ: “Yì dọna Ahabi dọ, ‘Wleawuna osọ́-kẹkẹ lọ! Jẹte, na jikun sinsinyẹn lọ nikaa glọn we!’”
45 To ojlẹ enẹ mẹ, agahomẹ ko súyu, jẹhọn to yìnyìn bọ jikun daho de wle;+ Ahabi sọ to yìyì to osọ́-kẹkẹ etọn mẹ dedo Jezleẹli.+
46 Ṣigba, alọ Jehovah tọn wá Elija ji bọ e sìn awù etọn do alinkàn* bo to wezunhọ̀n to nukọn na Ahabi kaka yì Jezleẹli.
Nudọnamẹ Odò Tọn
^ To paa mẹ, “sán sẹ̀.”
^ Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
^ To paa mẹ, “mẹhe nukọn yẹn ṣite te.”
^ Kavi “to nugbajẹmẹji.”
^ To paa mẹ, “bọ mìwlẹ na to ṣinṣọ̀n to linlẹn awe ṣẹnṣẹn.”
^ Kavi vlavo, “e ko tọ́nwhẹ̀n.”
^ Kavi “to nuyiwa di yẹwhegán lẹ.”
^ Kavi “bọ e blagbajana ede.”
