1 Samuẹli 27:1-12
-
Filistinu lẹ yí Ziklagi na Davidi (1-12)
27 Ṣigba, Davidi dọ to ahun ede tọn mẹ dọmọ: “N’na wá dọ̀n to alọ Sauli tọn mẹ to gbèdopo. E na pọnte na mi hugan nado họnyi+ aigba Filistinu lẹ tọn ji; to whenẹnu Sauli na hònúpla bo ma nasọ dín mi to aigba Islaeli tọn lẹpo ji+ ba, bọ n’na họ̀ngán sọn alọ etọn mẹ.”
2 Enẹwutu, Davidi po sunnu 600+ he to e dè lẹ po fọ́n bo yì Akiṣi+ visunnu Maoki tọn dè, yèdọ ahọlu Gati tọn.
3 Davidi sọ gbọṣi Akiṣi dè to Gati, ewọ po sunnu etọn lẹ po, yèdọ sunnu dopodopo po whédo etọn po. Asi Davidi tọn awe lẹ tin to e dè, yèdọ Ahinoami+ he wá sọn Jezleẹli gọna Abigaili+ Kalmẹlinu lọ, he yin asuṣiọsi Nabali tọn.
4 Whenue linlin yin nina Sauli dọ Davidi ko họnyi Gati, ewọ masọ zindonukọn nado to dindin in ba.+
5 Enẹgodo, Davidi dọna Akiṣi dọmọ: “Eyin n’ko mọ nukundagbe towe, gbọ yé ni na mi fide to dopo to tòdaho lẹdo lọ tọn lẹ mẹ, na yẹn nido nọ nọ̀ finẹ. Naegbọn devizọnwatọ towe nado nọ nọ̀ tòdaho ahọlu tọn mẹ hẹ we?”
6 Enẹwutu, Akiṣi na ẹn Ziklagi+ to gbenẹgbe. Enẹ wẹ zọ́n bọ Ziklagi do lẹzun ahọlu Juda tọn lẹ tọn kakajẹ egbé.
7 Ojlẹ* he Davidi do nọ lẹdo Filistinu lẹ tọn mẹ lẹpo yin owhe dopo e lán osun ẹnẹ.+
8 Davidi po sunnu etọn lẹ po nọ hẹji yì bo nọ tọ́navùn Gẹṣulinu+ lẹ, Gilzinu lẹ po Amalẹkinu+ lẹ po, na yewlẹ wẹ nọ nọ̀ aigba he dlẹnkan sọn Telami kaka yì Ṣuli+ bo jẹte yì aigba Egipti tọn ji.
9 Eyin Davidi tọ́nawhàn aigba lọ, e ma nọ pò sunnu kavi yọnnu depope dogbẹ̀,+ amọ́ e nọ bẹ lẹngbọpa, kanlinpa, kẹtẹkẹtẹ lẹ, kanklosọ́ lẹ po avọ̀ lẹ po, bo nọ lẹkọyi Akiṣi dè.
10 To whenẹnu, Akiṣi nọ kanse dọmọ: “Mẹnu lẹ wẹ a tọ́navùn to egbé?” Davidi nọ gblọn dọmọ: “Mẹhe to hùwaji* Juda tọn lẹ”+ kavi “Mẹhe to hùwaji aigba Jelameẹlinu lẹ tọn lẹ”+ kavi “Mẹhe to hùwaji aigba Keninu lẹ tọn lẹ.”+
11 Davidi ma nọ pò sunnu kavi yọnnu depope dogbẹ̀ nado yin hinhẹnwa Gati, na e nọ dọmọ: “Na yé nikaa dọho mítọn na yé bo dọ dọ, ‘Nuhe Davidi wà die.’” (Nuhe ewọ nọ wà to ojlẹ he e yizan to lẹdo Filistinu lẹ tọn mẹ lẹpo gblamẹ niyẹn.)
12 Enẹwutu, Akiṣi nọ yí Davidi sè, bo nọ dọna ede dọmọ: ‘Matin ayihaawe, ewọ ko lẹzun awuhiọnu de to Islaeli omẹ etọn lẹ ṣẹnṣẹn, enẹ wẹ zọ́n bọ ewọ na yin devizọnwatọ ṣie tẹgbẹ.’
