1 Samuẹli 5:1-12
5 To whenue Filistinu lẹ hò Apotin+ Jiwheyẹwhe nugbo lọ tọn yí, yé ze e sọn Ebenezeli yì Aṣidọdi.
2 Filistinu lẹ ze Apotin Jiwheyẹwhe nugbo lọ tọn bo hẹn ẹn yì ohọ̀* Dagọni tọn mẹ bosọ ze e do Dagọni pá.+
3 Whenue Aṣidọdinu lẹ fọ́n to wunkẹngbe afọnnu fuu, Dagọni ko họ́jai bo ṣinyọ́n nukunmẹ ai to Apotin Jehovah tọn+ nukọn. Yé sọ ze Dagọni bo gọ̀ ẹ do otẹn etọn mẹ.+
4 Whenue yé fọ́n to afọnnu fuu to azán he bọdego gbè, Dagọni ko sọ họ́jai bo ṣinyọ́n nukunmẹ ai to Apotin Jehovah tọn nukọn. Ota Dagọni tọn po alọpapa etọn awe lẹ po ko yin sinsánsẹ bo tin to kọmẹ to họntonu. Gotò etọn he tindo awusọhia whèvi tọn kẹdẹ wẹ pò.*
5 Enẹ wẹ zọ́n bọ kakajẹ egbehe, yẹwhenọ Dagọni tọn lẹ kavi mẹdepope he jlo na biọ ohọ̀ Dagọni tọn mẹ ma nọ tùnafọ họntonu Dagọni tọn ji to Aṣidọdi.
6 Alọ Jehovah tọn pẹ̀n do Aṣidọdinu lẹ ji bọ ewọ hẹn husudo wá yé ji gbọn zẹntin+ yíyí do hò Aṣidọdi po lẹdo etọn lẹ po dali.
7 To whenue sunnu Aṣidọdi tọn lẹ mọ nuhe to jijọ lọ, yé dọmọ: “Mì dike Apotin Jiwheyẹwhe Islaeli tọn lọ tọn gbọṣi mí dè blo, na alọ etọn ko yinuwa hẹ míwlẹ po yẹwhe mítọn Dagọni po to aliho sinsinyẹn mẹ.”
8 Enẹwutu, yé dowẹn hlan bo bẹ ogán Filistinu lẹ tọn lẹpo pli bosọ kanse yé dọmọ: “Nawẹ mí na zọ̀n do Apotin Jiwheyẹwhe Islaeli tọn lọ tọn?” Yé sọ gblọn dọmọ: “Mì gbọ Apotin Jiwheyẹwhe Islaeli tọn lọ tọn ni yin tẹnsẹna yì Gati.”+ Yé sọ sẹtẹnna Apotin Jiwheyẹwhe Islaeli tọn lọ tọn yì finẹ.
9 Whenue yé ko sẹtẹnna ẹn yì finẹ godo, alọ Jehovah tọn yinuwa jẹagọdo tòdaho lọ bo hẹn ẹn biọ sijọsijọ daho mẹ. Ewọ sọ yí zẹntin do hò mẹhe to tòdaho lọ mẹ lẹ, sọn yọpọ ji jẹ mẹho ji.+
10 Enẹwutu, yé do Apotin Jiwheyẹwhe nugbo lọ tọn hlan Eklọni,+ ṣigba tlolo he Apotin Jiwheyẹwhe nugbo lọ tọn jẹ Eklọni, Eklọninu lẹ jẹ awhádo ji dọmọ: “Yé ko hẹn Apotin Jiwheyẹwhe Islaeli tọn lọ tọn wá mí dè nado hù míwlẹ po omẹ mítọn lẹ po!”+
11 Yé sọ dowẹn hlan bo bẹ ogán Filistinu lẹ tọn lẹpo pli bo dọmọ: “Mì do Apotin Jiwheyẹwhe Islaeli tọn lọ tọn hlan; mì gbọ ni lẹkọyi otẹn etọn mẹ, na míwlẹ po omẹ mítọn lẹ po nikaa yin hùhù.” Na mẹhe to tòdaho lọ mẹ lẹpo wẹ ko to budina okú; alọ Jiwheyẹwhe nugbo lọ tọn ko pẹ̀n do yé ji tlala to finẹ,+
12 bọ mẹhe ma kú lẹ ko yin hihò po zẹntin po. Awhágbe tòdaho lọ tọn na alọgọ sọ yiaga jẹ olọn.
