2 Otànnugbo lẹ 20:1-37
20 Enẹgodo, Moabinu+ lẹ po Amọninu+ lẹ po, to pọmẹ hẹ Amọnimi* delẹ wá nado funawhàn hẹ Jehoṣafati.
2 E sọ yin didọna Jehoṣafati dọmọ: “Gbẹtọgun daho de ja nado tọ́nawhàn we sọn lẹdo ohù* lọ tọn mẹ, sọn Edomi,+ podọ todin, yé tin to Hazazọn-tamali, enẹ wẹ Ẹn-gẹdi.”+
3 Whenẹnu, obu jẹ Jehoṣafati ji bọ e magbe* nado dín Jehovah.+ Enẹwutu, e lá nùbibla de na Juda pete.
4 Omẹ Juda tọn lẹ sọ bẹ yede pli dopọ nado kanhose Jehovah;+ yé wá sọn tòdaho Juda tọn lẹpo mẹ nado dindona sọn Jehovah dè.
5 Jehoṣafati sọ ṣite to agun Juda po Jelusalẹm po tọn ṣẹnṣẹn to ohọ̀ Jehovah tọn mẹ to awánu yọyọ lọ nukọn,
6 podọ e dọmọ:
“Jehovah Jiwheyẹwhe tọgbo mítọn lẹ tọn E, be e ma yin hiẹ wẹ Jiwheyẹwhe to olọn mẹ ya;+ be e ma yin hiẹ wẹ to gandu do ahọluduta akọta lẹ tọn lẹpo ji ya?+ Huhlọn po hlọnhlọn po tin to alọ towe mẹ, mẹdepope masọ sọgan nọte to nukọn towe.+
7 Jiwheyẹwhe mítọn E, be hiẹ ma ko yàn mẹhe nọ nọ̀ aigba ehe ji lẹ sẹ̀ sọn Islaeli omẹ towe lẹ nukọn bo yí i na kúnkan* Ablaham họntọn towe tọn+ taidi nutindo he na dẹn-to-aimẹ de ya?
8 Yé sọ gbọṣi finẹ bo gbá fiwiwe de na we do finẹ na oyín towe,+ dọmọ,
9 ‘Eyin nugbajẹmẹji de tlẹ wá mí ji, vlavo gbọn ohí, whẹdida whẹgbledomẹ tọn, azọ̀nylankan kavi huvẹ dali, gbọ míwlẹ ni nọte to ohọ̀ ehe nukọn podọ to nukọn towe (na oyín towe tin to ohọ̀ ehe ji)+ bo dawhá ylọ we na alọgọ to ayimajai mítọn whenu, podọ na hiẹ ni sè bo whlẹn mí.’+
10 Todin, omẹ Amọni, Moabi po lẹdo osó tọn Seili tọn+ lẹ tọn po ko tin tofi, yèdọ mẹhe hiẹ ma nagbè Islaeli nado tọ́nawhàn to whenue yé tọ́n sọn aigba Egipti tọn ji. Yé ko joagọ sọn yé dè bo ma hù yé sudo.+
11 Taidi ahọsumẹ, yé ko wá todin nado yàn mí sẹ̀ sọn nutindo towe he a ko na mí taidi ogu lọ kọ̀n.+
12 Jiwheyẹwhe mítọn E, hiẹ ma na hẹn whẹdida ṣẹ do yé ji wẹ ya?+ Na míwlẹ ma tindo huhlọn depope to gbẹtọgun daho he to awhàn tọ́n mí ehe nukọn; mí masọ yọ́n nuhe mí dona wà,+ ṣigba dè we wẹ mí lẹ́ nukun mítọn lẹ hlan.”+
13 To ojlẹ enẹ mẹ, omẹ Juda tọn lẹpo to ote to Jehovah nukọn, to pọmẹ hẹ asi yetọn lẹ, ovi* yetọn lẹ po ovi flinflin yetọn lẹ po.
14 To whenẹnu, gbigbọ Jehovah tọn wá Jahaziẹli he yin visunnu Zekalia tọn visunnu Bẹnaia tọn visunnu Jeiẹli tọn visunnu Matania Levinu lọ tọn he wá sọn visunnu Asafi tọn lẹ mẹ ji to agun lọ ṣẹnṣẹn.
15 E dọmọ: “Mì doayi e go, mì omẹ Juda tọn lẹpo, mì mẹhe nọ nọ̀ Jelusalẹm lẹ po Ahọlu Jehoṣafati po emi! Nuhe Jehovah dọna mì die, ‘Mì dibu kavi dike ahun mìtọn gbàdo na gbẹtọgun daho ehe wutu blo, na awhàn lọ ma yin mìtọn, ṣigba Jiwheyẹwhe tọn wẹ.+
16 Mì jẹte yì pé yé to osọ. Yé na hẹji wá gbọn aliho Ziz tọn ji, mìwlẹ nasọ mọ yé to agbàdo* lọ tó to danfafa Jeluẹli tọn nukọn.
17 Mì ma do hudo nado hoavùn to awhàn ehe whenu. Mì nọ otẹn mìtọn lẹ mẹ bo nọte guun+ bosọ mọ whlẹngán Jehovah tọn do ota mìtọn mẹ.*+ Juda po Jelusalẹm po emi, mì dibu kavi dike ahun mìtọn gbàdo blo.+ Mì tọ́n pé yé to osọ, Jehovah nasọ tin hẹ mì.’”+
18 To afọdopolọji, Jehoṣafati dẹ́ do odò bo ṣinyọ́n nukunmẹ ai, omẹ Juda tọn lẹpo po mẹhe nọ nọ̀ Jelusalẹm lẹ po dẹ́ do odò to Jehovah nukọn nado basi sinsẹ̀n hlan Jehovah.
19 Enẹgodo, Levinu he yin kúnkan Kohatinu+ lẹ po Kolanu lẹ po tọn lẹ fọnṣite nado pà Jehovah Jiwheyẹwhe Islaeli tọn po ogbè lélé po.+
20 Yé fọ́n to wunkẹngbe afọnnu fuu bo tọ́njẹgbonu yì danfafa Tekoa+ tọn ji. Dile yé dedo, Jehoṣafati ṣite bo dọmọ: “Mì omẹ Juda tọn lẹ po mẹhe nọ nọ̀ Jelusalẹm lẹ po emi, mì dotó mi! Mì yí Jehovah Jiwheyẹwhe mìtọn sè, na mì nido penugo nado nọtegli.* Mì yí yẹwhegán etọn lẹ sè,+ na mì nido tindo kọdetọn dagbe.”
21 To whenue e ko dewé hẹ gbẹtọ lọ lẹ godo, e de sunnu delẹ nado to hànji+ hlan Jehovah bo to pipà na ẹn to aṣọ́donu wiwe mẹ dile yé to yìyì to nukọnna sunnu he sọawhànnu lẹ bosọ to didọmọ: “Mì nọ dopẹna Jehovah, na owanyi nugbo etọn na gbọṣi aimẹ kakadoi.”+
22 Whenue yé jẹ ohàn pipà tọn lẹ ji ji po ayajẹ po, Jehovah tọ̀wu dai sọta omẹ Amọni, Moabi po lẹdo osó tọn Seili tọn lẹ tọn po he ko tọ́nawhàn Juda bọ yé hù ode awetọ.+
23 Amọninu lẹ po Moabinu lẹ po sọ lẹ́ pannukọn mẹhe nọ nọ̀ lẹdo osó tọn Seili tọn+ mẹ lẹ nado hù yé bo và yé sudo; podọ whenue yé fó po mẹhe nọ nọ̀ Seili lẹ po, yé jẹ ode awetọ hù ji.+
24 Ṣigba, whenue omẹ Juda tọn lẹ wá atọ̀họ̀-nuhihọ́ lọ tọn he to danfafa lọ ji+ kọ̀n bo pọ́n gbẹtọgun lọ hlan, oṣiọ yetọn lẹ wẹ yé mọ to kọmẹ;+ mẹdepope ma luntọ́n.
25 Enẹwutu, Jehoṣafati po omẹ etọn lẹ po wá bo bẹ ogblànnu lẹ sọn yé dè, yé sọ mọ nutindo, avọ̀ po núzinzan dagbedagbe susugege po to ṣẹnṣẹn yetọn, ehe yé to bibẹ yì kakajẹ whenue yé masọ sọgan bẹ humọ ba.+ Azán atọ̀n wẹ yé yí do bẹ ogblànnu lọ, na e sù taun.
26 To azán ẹnẹtọ gbè, yé pli dopọ to Agbàdo Belaka tọn mẹ, na yé pà* Jehovah to finẹ. Enẹ wẹ zọ́n bọ yé do nọ ylọ oyín finẹ tọn dọ Agbàdo Belaka* tọn+—kakajẹ egbé.
27 Enẹgodo, omẹ Juda po Jelusalẹm po tọn lẹpo gọna Jehoṣafati he to nukọnna yé, lẹkọyi Jelusalẹm po ayajẹ po, na Jehovah ko hẹn yé nado jaya do kẹntọ yetọn lẹ ji.+
28 Enẹwutu, yé wá Jelusalẹm po nuhiho hànjinu okànnọ lẹ tọn po gọna ajalẹn+ lẹ po opẹ̀n+ lẹ po bo biọ ohọ̀ Jehovah tọn mẹ.+
29 Obu Jiwheyẹwhe tọn sọ jẹ ahọluduta aigba lọ lẹ tọn lẹpo ji to whenue yé sè dọ Jehovah ko hoavùn sọta kẹntọ Islaeli tọn lẹ.+
30 Gbọnmọ dali, ahọluduta Jehoṣafati tọn vò bọ Jiwheyẹwhe etọn zindonukọn nado to gbọjẹ na ẹn to awà lẹpo ji.+
31 Jehoṣafati sọ zindonukọn nado to gandu do Juda ji. Owhe 35 wẹ e tindo to whenue e duahọlu, e sọ dugán na owhe 25 to Jelusalẹm. Oyín onọ̀ etọn tọn wẹ Azuba viyọnnu Ṣilhi+ tọn.
32 E zindonukọn nado to zọnlinzin gbọn aliho Asa otọ́ etọn tọn ji.+ E ma lẹ́ sọn e ji, e sọ wà nuhe sọgbe to nukun Jehovah tọn mẹ.+
33 Ṣigba, ofi yiaga lẹ ma yin didesẹ,+ podọ gbẹtọ lẹ ma ko wleawuna ahun yetọn nado dín Jiwheyẹwhe tọgbo yetọn lẹ tọn.+
34 Na nuhe dù otàn Jehoṣafati tọn he pò, sọn bẹjẹeji kakajẹ vivọnu, e yin kinkan do kandai Jehu+ visunnu Hanani+ tọn lẹ mẹ, ehe tin to Owe Ahọlu Islaeli tọn lẹ tọn mẹ.
35 Enẹgodo, Ahọlu Jehoṣafati Juda tọn basi alẹnu de hẹ Ahọlu Ahazia Islaeli tọn he yinuwa po kanyinylan po.+
36 E yí i do basi ajọwatọgbẹ́ etọn nado nọ basi tọjihun lẹ he na nọ yì Talṣiṣi,+ podọ yé nọ basi tọjihun lọ lẹ to Ezioni-gebeli.+
37 Ṣigba, Eliezẹli visunnu Dodavahu Maleṣa tọn lọ tọn dọho to dọdai-liho sọta Jehoṣafati dọmọ: “Na hiẹ ko basi alẹnu de hẹ Ahazia wutu, Jehovah na hẹn azọ́n towe lẹ gble.”+ Enẹwutu, tọjihun lọ lẹ siọ+ bọ yé ma penugo nado yì Talṣiṣi ba.
Nudọnamẹ Odò Tọn
^ Kavi vlavo, “Mẹuninu.”
^ E họnwun dọ ehe to alọdlẹndo Ohù Kúkú.
^ To paa mẹ, “ze nukun etọn.”
^ To paa mẹ, “okún.”
^ To paa mẹ, “visunnu.”
^ Kavi “mọ lehe Jehovah na whlẹn mì do.”
^ Kavi “doakọnna.”
^ To paa mẹ, “dona.”
^ Zẹẹmẹdo “Dona.”
