2 Otànnugbo lẹ 33:1-25
33 Owhe 12 wẹ Manasse+ tindo to whenue e duahọlu, e sọ dugán to Jelusalẹm na owhe 55.+
2 E wà nuhe ylan to nukun Jehovah tọn mẹ lẹ bo doalọ to osùnú he nkọ akọta he Jehovah ko yàn sẹ̀ sọn omẹ Islaeli tọn lẹ nukọn lẹ nọ wà lẹ mẹ.+
3 E vọ́ ofi yiaga he otọ́ etọn Hẹzekia ko họliai lẹ gbá bo do agbà lẹ ai na Baali lẹ+ bosọ basi dòtin wiwe* lẹ, podọ e nọ dẹ́ do odò na awhànpa olọn tọn lẹpo bo nọ sẹ̀n yé.+
4 Humọ, e do agbà lẹ ai do ohọ̀ Jehovah tọn mẹ,+ fie Jehovah ko dọ gandego dọ: “Jelusalẹm wẹ oyín ṣie na nọ kakadoi.”+
5 E sọ do agbà lẹ ai na awhànpa olọn tọn lẹpo do awánu ohọ̀ Jehovah tọn awe mẹ.+
6 Podọ e hẹn visunnu etọn titi lẹ jugbọn miyọ́n mẹ+ to Agbàdo Visunnu Hinọmi tọn mẹ;+ e doalọ to bojijlẹ,+ dọṣẹdidọ po owọ́n po mẹ bo de mẹdelẹ taidi afinyọnnọ podọ dọṣẹdọtọ lẹ.+ E wà nuhe ylan to nukun Jehovah tọn mẹ lẹ to obá he yiaga taun mẹ nado hẹn homẹgble e.
7 E ze boṣiọ pipà he e ko basi lọ do ohọ̀ Jiwheyẹwhe nugbo+ lọ tọn mẹ, yèdọ ohọ̀ he Jiwheyẹwhe ko dọho gandego na Davidi po Sọlomọni visunnu etọn po dọ: “Ohọ̀ ehe podọ Jelusalẹm he yẹn ko de to hẹnnu Islaeli tọn lẹpo mẹ ji wẹ yẹn na ze oyín ṣie do kakadoi.+
8 Yẹn ma nasọ de afọ Islaelivi lẹ tọn sẹ̀ sọn aigba lọ he yẹn ko de na tọgbo yetọn lẹ ji gbede ba, eyin yewlẹ saa nọ yí sọwhiwhe do yìn gbedide he yẹn ko na yé lẹpo, yèdọ Osẹ́n lọ blebu, aṣẹdai lẹ po nudide whẹdida tọn he ko yin nina yé gbọn Mose gblamẹ lẹ po.”
9 Manasse to Juda po mẹhe nọ nọ̀ Jelusalẹm lẹ po hẹn danbú mapote bosọ hẹn yé nado wà nuhe ylan hugan akọta he Jehovah ko sukúndona sọn Islaelivi lẹ nukọn lẹ.+
10 Jehovah zindonukọn nado to hodọna Manasse po omẹ etọn lẹ po, ṣigba yé ma tuntoai.+
11 Enẹwutu, Jehovah hẹn awhàngán ahọlu Asilia tọn lẹ wá sọta yé, bọ yé yí omlẹn lẹ do wle Manasse* bo yí gẹdẹ gànvẹẹ tọn awe do blá ẹ bosọ hẹn ẹn yì Babilọni.
12 To ayimajai etọn mẹ, e biọ nukundagbe Jehovah Jiwheyẹwhe etọn tọn* bo to ede whiwhẹ taun to Jiwheyẹwhe tọgbo etọn lẹ tọn nukọn mapote.
13 E nọ to dẹ̀ho hlan Ẹn, podọ vẹvivẹ etọn whàn Ẹn bọ E dotoaina obiọ etọn na nukundagbe bo gọ̀ gandudu etọn jo na ẹn to Jelusalẹm.+ Whenẹnu wẹ Manasse wá yọnẹn dọ Jehovah wẹ Jiwheyẹwhe nugbo lọ.+
14 Enẹgodo, e do adó gbonu tọn de na Tòdaho Davidi tọn+ to whèyihọ-waji Gihọni tọn+ to agbàdo* lọ mẹ podọ kaka yì Họngbo Whèvi tọn kọ̀n,+ e sọ zindonukọn lẹdo Ofẹli,+ podọ e do e bọ e yiaga taun. Humọ, e de awhàngán lẹ do tòdaho gángán lọ lẹpo mẹ to Juda.
15 E sọ de yẹwhe jonọ lẹ po yẹdide boṣiọ lọ tọn po sẹ̀ sọn ohọ̀ Jehovah tọn mẹ+ gọna agbà he e ko doai to osó ohọ̀ Jehovah tọn tọn ji+ podọ to Jelusalẹm lẹpo bo biọ dọ yé ni yin bibẹ dlan gbonu tòdaho lọ tọn.
16 E sọ wleawuna agbà Jehovah tọn lọ+ bo jẹ avọ́sinsan jijọho tọn lẹ+ po avọ́sinsan pẹdido tọn lẹ+ po basi ji to e ji, e sọ dọna Juda nado nọ sẹ̀n Jehovah Jiwheyẹwhe Islaeli tọn.
17 Ṣigba, gbẹtọ lọ lẹ gbẹ́ pò to avọ́sinsan basi to ofi yiaga lẹ, dile etlẹ yindọ Jehovah Jiwheyẹwhe yetọn kẹdẹ wẹ yé to bibasina.
18 Na nuhe dù otàn Manasse tọn he pò, odẹ̀ he e hò hlan Jiwheyẹwhe etọn po ohó he numọtọ lẹ dọna ẹn to oyín Jehovah Jiwheyẹwhe Islaeli tọn mẹ lẹ po, yé yin kinkan do whenuho ahọlu Islaeli tọn lẹ tọn mẹ.
19 Humọ, odẹ̀ etọn+ po lehe vẹvivẹ etọn yin alọkẹyi do po, ylando etọn lẹpo po nugbonọ-mayin etọn po,+ fie e do ofi yiaga lẹ, dòtin wiwe*+ lẹ po boṣiọ pipà lẹ po do whẹpo do wá whiwhẹ ede, yé yin kinkan do kandai numọtọ etọn lẹ tọn mẹ.
20 Manasse sọ yin hinhẹn nado mlọnai hẹ tọgbo etọn lẹ bọ yé dì i do owhé etọn gbè; visunnu etọn Amọni sọ lẹzun ahọlu do otẹn etọn mẹ.+
21 Owhe 22 wẹ Amọni+ tindo to whenue e duahọlu, e sọ dugán to Jelusalẹm na owhe awe.+
22 Ewọ sọ zindonukọn nado to nuhe ylan to nukun Jehovah tọn mẹ lẹ wà, kẹdẹdile otọ́ etọn Manasse ko wà do;+ Amọni sọ sanvọ́ hlan boṣiọ pipà he otọ́ etọn Manasse ko basi lẹpo+ bo to yé sẹ̀n mapote.
23 Ṣigba, e ma whiwhẹ ede to Jehovah nukọn+ dile Manasse otọ́ etọn ko whiwhẹ ede do;+ kakatimọ Amọni hẹn whẹhuhu etọn lẹ jideji taun.
24 To godo mẹ, devizọnwatọ etọn lẹ blasé do e go+ bo hù i to owhé etọn titi gbè.
25 Ṣigba, mẹhe to aigba lọ ji lẹ hù mẹhe blasé do Ahọlu Amọni go lẹpo+ bosọ yí visunnu etọn Josia+ do doahọlu do otẹn etọn mẹ.
Nudọnamẹ Odò Tọn
^ Kavi vlavo, “yé wle Manasse to odò lẹ mẹ.”
^ Kavi “e hẹn nukunmẹ Jehovah Jiwheyẹwhe etọn tọn bọ̀.”
