2 Timoti 1:1-18
1 Paulu, apọsteli Klisti Jesu tọn de gbọn ojlo Jiwheyẹwhe tọn dali sọgbe hẹ opagbe ogbẹ̀ tọn gbọn Klisti Jesu gblamẹ,+
2 yẹn to wekanhlan Timoti, ovi yiwanna de:+
Na hiẹ ni tindo nukundagbe majẹhẹ, lẹblanu po jijọho po sọn Jiwheyẹwhe Otọ́ po Klisti Jesu Oklunọ mítọn po dè.
3 Yẹn dopẹna Jiwheyẹwhe, mẹhe yẹn yí ayihadawhẹnamẹnu wiwe de do to sinsẹ̀nzọn wiwe wà na dile tọgbo ṣie lẹ wà do, podọ yẹn ma nọ gọ̀n ma flin we to ovẹvivẹ ṣie lẹ mẹ gbede to ozán po okle po.
4 Yẹn nọ to jijlo vẹkuvẹku nado mọ we, dile yẹn nọ to dasin towe lẹ flin, na yẹn nido sọgan gọ́ na ayajẹ.
5 Na n’nọ flin yise matin yẹnuwiwa+ he hiẹ tindo, ehe ko tin jẹnukọn to onọ̀-daho towe Loisi po onọ̀ towe Euniki po mẹ, ṣigba ehe yẹn deji dọ e tin to hiẹ lọsu mẹ ga.
6 Na ehe wutu wẹ yẹn flinnu we nado to nunina Jiwheyẹwhe tọn he tin to hiẹ mẹ lọ hẹn jizò di miyọ́n, ehe yin nina we gbọn alọ ṣie lẹ zizedo ji we dali.+
7 Na Jiwheyẹwhe ma na mí gbigbọ obu tọn,+ ṣigba huhlọn tọn,+ owanyi tọn po wunza tọn po.
8 Enẹwutu, kunnudide gando Oklunọ mítọn go,+ kavi gando yẹn mẹhe yin gàntọ de na ewọ tọn wutu go ni ma huwinyan na we blo, ṣigba nọ tindo mahẹ to oyà kanyinylan tọn jiji+ na wẹndagbe tọn wutu mẹ gbọn ginganjẹ huhlọn Jiwheyẹwhe tọn go dali.+
9 Ewọ whlẹn mí gán bo yí oylọ wiwe+ do basi oylọna mí, e ma yin na azọ́n mítọn lẹ wutu, ṣigba gbọn lẹndai po nukundagbe majẹhẹ+ etọn po dali. Ehe yin nina mí to kọndopọ mẹ hẹ Klisti Jesu sọn whenu dindẹn die,
10 ṣigba todin, e ko yin hinhẹn họnwun hezeheze gbọn awusọhia Mẹwhlẹngántọ mítọn, Klisti Jesu tọn gblamẹ,+ mẹhe ko de okú sẹ̀+ bosọ tá hinhọ́n do ogbẹ̀+ po magble+ po ji gbọn wẹndagbe lọ gblamẹ,+
11 ehe wutu wẹ yẹn ko yin dide taidi yẹwhehodọtọ de, apọsteli de podọ mẹplọntọ de.+
12 Na ehe tọn wutu wẹ yẹn sọ to oyà onú ehelẹ tọn ji,+ ṣigba winyan ma hù mi.+ Na yẹn yọ́n Mẹlọ he yẹn yise, podọ yẹn deji dọ ewọ penugo nado basi hihọ́na nuhe yẹn ko zedo alọmẹ na ẹn lọ kakajẹ azán enẹ gbè.+
13 Nọ tẹdo ohia* ohó he sọgbe*+ lẹ tọn he hiẹ sè sọn dè e lọ go gligli gọna yise po owanyi po he nọ wá sọn tintin to kọndopọ mẹ hẹ Klisti Jesu mẹ.
14 Nọ basi hihọ́na nuhọakuẹ lọ he yin zizedo alọmẹ na we gbọn gbigbọ wiwe he tin to mí mẹ+ lọ dali.
15 Hiẹ yọ́n ehe, dọ mẹhe tin to ayimatẹn Asia+ tọn mẹ lẹpo wẹ ko gbẹ́ mi dai, kakajẹ Figelu po Hẹmogini po ji.
16 Na Oklunọ ni do lẹblanu hia whédo Onesifọlu+ tọn, na ewọ nọ saba hẹn kọfanamẹ wá na mi, podọ winyan gẹdẹ gàntọ tọn ṣie lẹ tọn ma hù i.
17 Kakatimọ, to whenue ewọ wá Lomu, e yí sọwhiwhe do dín mi bo mọ mi.
18 Na Oklunọ ni dike ewọ ni mọ lẹblanu sọn Jehovah* dè to azán enẹ gbè. Podọ hiẹ lọsu yọ́n devizọn he e wà to Efesu lẹ ganji.
