Eksọdusi 1:1-22
1 To whenue Jakọbu, enẹ wẹ Islaeli, yì Egipti, visunnu etọn lẹ lọsu to pọmẹ hẹ whẹndo yetọn yì ga. Oyín visunnu Jakọbu tọn lẹ tọn die:+
2 Leubẹni, Simeoni, Levi po Juda+ po;
3 Isakali, Zebuluni po Bẹnjamini po;
4 Dani po Naftali po; Gad po Aṣeli+ po.
5 Mẹhe* yin jiji na Jakọbu* lẹpo wẹ gbẹtọ* 70, ṣigba Josẹfu ko tin to Egipti jẹnukọn.+
6 To godo mẹ, Josẹfu kú,+ nọvisunnu etọn lẹpo sọ kú ga gọna whẹndo enẹ lẹpo.
7 Islaelivi* lẹ sọ yin sinsẹ́nnọ bo to susudeji tlala, yé sọ to jijideji mapote bo to lilẹzun huhlọnnọ to aliho sẹhundaga de mẹ, sọmọ bọ yé gọ́ aigba lọ ji.+
8 To nukọn mẹ, ahọlu yọyọ de he ma yọ́n Josẹfu dugán do Egipti ji.
9 Enẹwutu, e dọna omẹ etọn lẹ dọmọ: “Mì pọ́n! Omẹ Islaeli tọn lẹ to susu to sọha mẹ bo to lilẹzun huhlọnnọ hú míwlẹ.+
10 Mì gbọ mí ni yí bibi zan hẹ yé. Eyin mí ma wàmọ, yé na to susudeji mapote, podọ eyin awhàn de wá fọ́n, yé na kọnawudopọ hẹ kẹntọ mítọn lẹ bo na funawhàn sọta mí bo nasọ tọ́n sọn otò lọ mẹ.”
11 Enẹwutu, yé de ogán he na nọ hẹn yé gánnugánnu nado wazọ́n* lẹ do yé ji, na yé nido nọ yí azọ́n sinsinyẹn wiwà do gbidikọna yé,+ yé sọ wleawuna agbànhọ lẹ na Falo do tòdaho Pitomi po Laamsesi+ po tọn lẹ mẹ.
12 Ṣigba, dile yé to kọgbidina yé sọ, mọ wẹ yé nọ to susudeji bo nọ to gbigbà pé do niyẹn, obu sọ jẹ yé ji na Islaelivi lẹ tọn wutu.+
13 Enẹwutu, Egiptinu lẹ hẹn Islaelivi lẹ gánnugánnu zun afanumẹ azọ́n sinsinyẹnwatọ lẹ.+
14 Yé yí azọ́n sinsinyẹn wiwà do hẹn gbẹninọ vẹawuna yé dile yé nọ to okò yàn bosọ nọ to bliki mẹ̀ gọna azọ́n afanumẹ tọn wunmẹ lẹpo to aigba lọ ji. Mọwẹ, yé nọ hẹn yé nado wazọ́n sinsinyẹn to ninọmẹ sinsinyẹn afanumẹ-yinyin tọn wunmẹ lẹpo glọ.+
15 Enẹgodo, ahọlu Egipti tọn dọho hẹ yọnnu vijinamẹtọ Heblu lẹ he oyín yetọn nọ yin Ṣifla po Pua po,
16 bo dọna yé dọmọ: “To whenue mì to alọgọna yọnnu Heblu he to ajidònu* lẹ,+ mì dona nọ hù ovi lọ eyin sunnu wẹ; amọ́ eyin yọnnu wẹ, mì dona nọ pò e dogbẹ̀.”
17 Ṣigba, yọnnu vijinamẹtọ lọ lẹ dibusi Jiwheyẹwhe nugbo lọ, enẹwutu yé ma wà nuhe ahọlu Egipti tọn biọ to yé si. Kakatimọ, yé nọ pò visunnu lẹ dogbẹ̀.+
18 Whenẹnu, ahọlu Egipti tọn ylọ yọnnu vijinamẹtọ lọ lẹ bo kanse yé dọmọ: “Naegbọn mìwlẹ do pò visunnu lẹ dogbẹ̀?”
19 Yọnnu vijinamẹtọ lọ lẹ sọ dọna Falo dọmọ: “Yọnnu Heblu lẹ ma taidi yọnnu Egiptinu lẹ. Yé bikan bo ko nọ jivi whẹpo vijinamẹtọ nido wá yé dè.”
20 Jiwheyẹwhe sọ wà dagbe na yọnnu vijinamẹtọ lọ lẹ, podọ akọta lọ fọ́n bo to susudeji bo to lilẹzun huhlọnnọ tlala.
21 Na yọnnu vijinamẹtọ lọ lẹ dibusi Jiwheyẹwhe nugbo lọ wutu, e dona yé bọ yelọsu lẹ tindo whẹndo yetọn titi to godo mẹ.
22 Enẹgodo, Falo degbena omẹ etọn lẹpo dọmọ: “Mì dona nọ ze visunnu Heblu tọn depope he yè ṣẹṣẹ ji dlan Tọ̀sisa Nile tọn mẹ, ṣigba mì nọ pò viyọnnu lẹpo dogbẹ̀.”+
Nudọnamẹ Odò Tọn
^ Kavi “Alindọn he.”
^ To paa mẹ, “Mẹhe tọ́n sọn asapada Jakọbu tọn mẹ.”
^ Kavi “alindọn.”
^ To paa mẹ, “Visunnu Islaeli tọn.”
^ Kavi “de azọ́ngán.”
^ Kavi “to azinpo vijiji tọn ji.”
