Eksọdusi 29:1-46
29 “Nuhe hiẹ na wà nado klan yé do wiwe na yé nido nọ sẹ̀n taidi yẹwhenọ lẹ hlan mi lẹ die: Yí oyìnsú winyanwinyan dopo, agbò awe he madoblọ, +
2 akla madotọ́n, akla madotọ́n loboto he yè yí amì do yàn po akla madotọ́n wọ́dọ́wọ́dọ́ he ji yè húnhún amì do po.+ Linfin likun tọn dagbedagbe wẹ hiẹ na yí do basi yé,
3 hiẹ nasọ bẹ yé do ohà de mẹ bo na ze ohà lọ jo+ to pọmẹ hẹ oyìnsú lọ po agbò awe lẹ po.
4 “Hiẹ na hẹn Aalọn po visunnu etọn lẹ po wá họntonu gòhọ opli tọn+ bo na degbena yé nado lawu.+
5 Enẹgodo, hiẹ na do onú+ Aalọn tọn lẹ na ẹn, yèdọ tewu lọ, awù efọdi tọn he ma tindo awà, efọdi* lọ po apò akọ́nnu tọn* lọ po, hiẹ nasọ sìn homẹblanu linlọ̀n* efọdi tọn do alinkàn etọn gbanun-gbanun.+
6 Hiẹ nasọ ze tabla vonọtaun lọ do ota etọn bo yí ohia wiwe klandowiwe tọn* lọ do tabla vonọtaun lọ go;+
7 hiẹ nasọ yí amì mẹdide tọn+ bo na kọ̀n ẹn do ota etọn bo na yiamisisadode e.+
8 “Enẹgodo, hiẹ na hẹn visunnu etọn lẹ wá bo na do tewu lọ lẹ na yé,+
9 hiẹ nasọ sìn homẹblanu lọ lẹ na Aalọn po visunnu etọn lẹ po bo na ze tabla yetọn lẹ do ota na yé; podọ yẹwhenọduta na lẹzun yetọn taidi osẹ́ndoai kakadoi de.+ Lehe hiẹ na na aṣẹ Aalọn po visunnu etọn lẹ po nado nọ sẹ̀n taidi yẹwhenọ lẹ* do niyẹn.+
10 “Todin, hiẹ na hẹn oyìnsú lọ wá gòhọ opli tọn lọ nukọn, bọ Aalọn po visunnu etọn lẹ po na ze alọ yetọn lẹ do ota oyìnsú lọ tọn.+
11 Hiẹ nasọ hù oyìnsú lọ to Jehovah nukọn to họntonu gòhọ opli tọn lọ tọn.+
12 Hiẹ na yí sọn ohùn oyìnsú lọ tọn mẹ do alọvi towe go bo na kùn in do azò agbà lọ tọn lẹ ji,+ podọ ohùn he pò lẹpo wẹ hiẹ na kọ̀n do agbà lọ kọ̀n to kọmẹ.+
13 Enẹgodo, yí ojó+ he ṣinyọ́n adọ̀vi ji lẹpo, ojó he tin to otù ji, ayi awe lẹ po ojó he tin to yé ji lẹ po bo fiọ yé na yé nido to azọ̀ti to agbà lọ ji.+
14 Ṣigba, hiẹ na yí miyọ́n do fiọ olàn oyìnsú lọ tọn, ayú etọn po omí etọn po to gbonu osla lọ tọn. Avọ́nunina ylando tọn wẹ e yin.
15 “Enẹgodo, yí agbò dopo bọ Aalọn po visunnu etọn lẹ po nasọ ze alọ yetọn lẹ do ota etọn.+
16 Hiẹ na hù agbò lọ bo yí ohùn etọn bosọ húnhún in do adà agbà lọ tọn lẹpo ji.+
17 Hiẹ na já olàn agbò lọ tọn do flinflin bo na klọ́ adọ̀vi+ etọn lẹ po afọ etọn lẹ po bosọ to yé dopọ kakajẹ ota lọ lọsu ji.
18 Hiẹ nasọ fiọ agbò lọ blebu bọ e na to azọ̀ti to agbà lọ ji. Avọ́nunina mimẹ̀ de wẹ e yin hlan Jehovah, yèdọ owán gblingblin* de.+ Avọ́nunina he yin bibasi hlan Jehovah gbọn miyọ́n dali de wẹ e yin.
19 “Enẹgodo, hiẹ na yí agbò awetọ bọ Aalọn po visunnu etọn lẹ po na ze alọ yetọn lẹ do ota etọn.+
20 Hiẹ nasọ hù agbò lọ bo yí sọn ohùn etọn mẹ bo na kùn in do otó adusi tọn Aalọn tọn go podọ do otó adusi tọn visunnu etọn lẹ tọn go podọ do alọsu adusi tọn po afọsu adusi tọn yetọn po ji, bo nasọ húnhún ohùn lọ do adà agbà lọ tọn lẹpo ji.
21 Enẹgodo, yí sọn ohùn he tin to agbà lọ ji mẹ podọ sọn amì mẹdide tọn+ lọ mẹ bo húnhún in do Aalọn po awù etọn lẹ po go podọ do visunnu etọn lẹ po awù yetọn lẹ po go, na ewọ po awù etọn lẹ po gọna visunnu etọn lẹ po awù yetọn lẹ po nido sọgan yin wiwe.+
22 “Enẹgodo, yí ojó agbò lọ tọn, osi dojó lọ, ojó he ṣinyọ́n adọ̀vi lẹ ji, ojó he to otù ji, ayi awe lẹ po ojó he to yé ji po+ gọna asá adusi tọn etọn, na agbò aṣẹ-ninamẹ tọn+ de wẹ e yin.
23 Hiẹ nasọ ze akla plẹ́bẹ́ de po akla loboto he yè yí amì do yàn de po gọna akla wọ́dọ́wọ́dọ́ de sọn ohà akla madotọ́n tọn he tin to Jehovah nukọn lọ mẹ.
24 Hiẹ na ze popolẹpo do alọ Aalọn tọn mẹ podọ do alọ visunnu etọn lẹ tọn mẹ, hiẹ nasọ mimí yé yigodo yinukọn taidi avọ́nunina he yè mimí de to Jehovah nukọn.
25 Enẹgodo, hiẹ na yí yé sọn alọ yetọn mẹ bo na fiọ yé to agbà lọ ji to aga na avọ́nunina mimẹ̀ lọ taidi owán gblingblin* de to Jehovah nukọn. Avọ́nunina he yin bibasi hlan Jehovah gbọn miyọ́n dali de wẹ e yin.
26 “Enẹgodo, ze akọ́nnu agbò aṣẹ-ninamẹ tọn+ he yin nina do ota Aalọn tọn mẹ bo mimí in yigodo yinukọn taidi avọ́nunina he yè mimí de to Jehovah nukọn, e nasọ lẹzun mimá towe.
27 Hiẹ nasọ klan akọ́nnu avọ́nunina he yè mimí lọ tọn do wiwe gọna asá mimá wiwe he yè mimí lọ tọn ehe yin yíyí sọn agbò aṣẹ-ninamẹ tọn+ lọ go, yèdọ sọn nuhe yin nina Aalọn po visunnu etọn lẹ po tọn mẹ.
28 E na lẹzun Aalọn po visunnu etọn lẹ po tọn bo na yin aṣẹdai kakadoi de he Islaelivi lẹ na nọ setonuna, na mimá wiwe de wẹ e yin, e nasọ yin mimá wiwe de he Islaelivi lẹ na nọ na.+ Mimá wiwe yetọn wẹ e yin hlan Jehovah sọn avọ́sinsan jijọho tọn yetọn lẹ mẹ.+
29 “Awù wiwe+ Aalọn tọn lẹ wẹ na yin yiyizan gbọn visunnu etọn lẹ dali+ to godo etọn to whenue yé na wá yin dide bo yin aṣẹ na taidi yẹwhenọ lẹ.
30 Visunnu etọn he na jẹ otẹn etọn mẹ taidi yẹwhenọ he na nọ wá gòhọ opli tọn lọ mẹ nado wadevizọn to ofi wiwe lọ na do awù lọ lẹ na azán ṣinawe.+
31 “Hiẹ na ze agbò aṣẹ-ninamẹ tọn lọ bo na sọakusìn in to ofi wiwe de.+
32 Aalọn po visunnu etọn lẹ po na dù+ olàn agbò lọ tọn po akla he tin to ohà lọ mẹ lẹ po to họntonu gòhọ opli tọn lọ tọn.
33 Yé na dù nuhe yin yíyí do basi ovẹsè nado na yé aṣẹ taidi yẹwhenọ lẹ* podọ nado klan yé do wiwe. Ṣigba, mẹhe ma jẹ de* ma sọgan dù, na onú wiwe lẹ wẹ yé yin wutu.+
34 Eyin olàn avọ́sinsan aṣẹ-ninamẹ tọn kavi akla depope pò kakajẹ afọnnu, hiẹ na yí miyọ́n do fiọ nuhe pò lọ.+ E ma dona yin dùdù, na onú wiwe de wẹ.
35 “Lehe hiẹ na yinuwa hẹ Aalọn po visunnu etọn lẹ po sọgbe hẹ nuhe yẹn ko degbe etọn na we lẹpo do niyẹn. Hiẹ na yí azán ṣinawe do na aṣẹ yé taidi yẹwhenọ lẹ.*+
36 Hiẹ na nọ yí oyìnsú avọ́nunina ylando tọn do basi ovẹsè egbesọegbesọ, hiẹ nasọ nọ lẹ̀ agbà lọ wé sọn ylando mẹ gbọn ovẹsè bibasi na ẹn dali, hiẹ nasọ yiamisisadode e nado klan ẹn do wiwe.+
37 Hiẹ na yí azán ṣinawe do basi ovẹsè na agbà lọ, bo na hẹn ẹn zun wiwe, na e nido lẹzun agbà wiwe gbaugbau de.+ Mẹhe yin wiwe lẹ kẹdẹ wẹ na doalọ agbà lọ go.
38 “Nuhe hiẹ na yí do sanvọ́ to agbà lọ ji die: agbò he tindo owhe dopo awe to egbesọegbesọ.+
39 Hiẹ na yí agbò winyanwinyan dopo do sanvọ́ to afọnnu bo na yí agbò awetọ do sanvọ́ to whèjai plẹplẹ.*+
40 Mado-ao linfin dagbedagbe ojlẹnu efa tọn dopo* he yè yí mado-ẹnẹ amì olivie tọn akú hini* dopo do yàn gọna mado-ẹnẹ avọ́nunina nùnù ovẹn hini dopo tọn wẹ na nọ yin yiyizan na agbò winyanwinyan tintan.
41 Hiẹ na nọ yí agbò winyanwinyan awetọ do sanvọ́ to whèjai plẹplẹ* to pọmẹ hẹ avọ́nunina jinukun-lili tọn po avọ́nunina nùnù lọ po dile e yin bibasi do to afọnnu. Hiẹ na na ẹn taidi owán gblingblin* de, yèdọ avọ́nunina he yin bibasi gbọn miyọ́n dali de hlan Jehovah.
42 E na yin avọ́nunina mimẹ̀ de he na nọ yin bibasi to gbesisọ mẹ to whẹndo mìtọn lẹpo mẹ to họntonu gòhọ opli tọn lọ tọn to Jehovah nukọn, fie yẹn na nọ sọawuhia mì te nado dọho hẹ mì.+
43 “Yẹn na nọ sọawuhia Islaelivi lẹ to finẹ podọ gigo ṣie na nọ klan nọtẹn lọ do wiwe.+
44 Yẹn na nọ klan gòhọ opli tọn lọ po agbà lọ po do wiwe, yẹn nasọ klan Aalọn po visunnu etọn lẹ po do wiwe,+ na yé nido sẹ̀n taidi yẹwhenọ lẹ hlan mi.
45 Yẹn na nọ nọ̀* ṣẹnṣẹn Islaelivi lẹ tọn, yẹn nasọ yin Jiwheyẹwhe yetọn.+
46 Yé nasọ yọnẹn hezeheze dọ yẹn wẹ Jehovah Jiwheyẹwhe yetọn he plan yé sọn aigba Egipti tọn ji, na yẹn nido nọ nọ̀ ṣẹnṣẹn yetọn.+ Yẹn wẹ Jehovah Jiwheyẹwhe yetọn.
Nudọnamẹ Odò Tọn
^ Enẹ wẹ, apò he nọ yin kikó he Yẹwhenọ Daho nọ zedo akọ́nnu.
^ Kavi “ajákẹn.”
^ Kavi “yí jẹgbakun wiwe.”
^ To paa mẹ, “hiẹ na hẹn alọ Aalọn po alọ visunnu etọn lẹ tọn po gọ́.”
^ Kavi “owán dagbe; owán he yọ́nsè.” To paa mẹ, “owán vivi.”
^ Kavi “owán dagbe; owán he yọ́nsè.” To paa mẹ, “owán vivi.”
^ To paa mẹ, “nado hẹn alọ yetọn gọ́.”
^ To paa mẹ, “jonọ de,” enẹ wẹ, mẹhe ma wá sọn whẹndo Aalọn tọn mẹ.
^ To paa mẹ, “do hẹn alọ yetọn gọ́.”
^ To paa mẹ, “to whèjai awe lẹ ṣẹnṣẹn,” vlavo ehe zẹẹmẹdo bẹsọn whenue owhè ko yihọ jẹ whenue zinvlu do.
^ To paa mẹ, “to whèjai awe lẹ ṣẹnṣẹn,” vlavo ehe zẹẹmẹdo bẹsọn whenue owhè ko yihọ jẹ whenue zinvlu do.
^ Kavi “owán dagbe; owán he yọ́nsè.” To paa mẹ, “owán vivi.”
^ Kavi “nọ basi gòhọtúntún de do.”
