Eksọdusi 36:1-38
36 “Bezalẹli na wazọ́n to pọmẹ hẹ Oholiabi gọna sunnu azọ́nyọnẹntọ* lẹpo, he Jehovah ko na nuyọnẹn po nukunnumọjẹnumẹ po, na yé nido yọ́n lehe yé na wazọ́n he gando sinsẹ̀nzọn wiwe lọ go lẹpo do kẹdẹdile Jehovah ko degbe etọn do.”+
2 Mose sọ ylọ Bezalẹli po Oholiabi po gọna sunnu azọ́nyọnẹntọ lẹpo, he Jehovah ko na nuyọnẹn,+ yèdọ mẹhe ahun yetọn ko whàn bọ yé ze yede jo nado wazọ́n lọ lẹpo.+
3 Yé sọ bẹ nunina he Islaelivi lẹ ko hẹnwa na sinsẹ̀nzọn wiwe lọ lẹpo+ sọn Mose si. Ṣigba, mẹlọ lẹ zindonukọn bo to nunina sọn ojlo mẹ wá lẹ hẹnwa na ẹn egbesọegbesọ.
4 Enẹgodo, to whenue yé ko bẹ azọ́n wiwe lọ jẹeji, azọ́nwatọ he yin azọ́nyọnẹntọ lẹpo jẹ wiwá ji debọdo-dego,
5 yé sọ nọ to didọna Mose dọmọ: “Nuhe mẹlọ lẹ to hinhẹnwa ko sù hugan nuhe yin bibiọ na azọ́n he Jehovah degbe etọn nado wà lọ.”
6 Enẹwutu, Mose degbe dọ nulila de ni yin bibasi to osla lọ mẹ lẹdo pé dọmọ: “Sunnu lẹ po yọnnu lẹ po emi, mì sọ hẹn nuyizan lẹ wá dogọ nado na nunina wiwe lẹ ba blo.” Whenẹnu, mẹlọ lẹ doalọtena nulẹ hinhẹnwa.
7 Nuyizan lọ lẹ pé na azọ́n he dona yin wiwà lọ lẹpo bo tlẹ sọ lán.
8 Azọ́nwatọ he yin azọ́nyọnẹntọ+ lọ lẹpo sọ yí avọ̀ gòhọ tọn ao, yèdọ alavọ linlọ̀n dagbedagbe, gọna sekan juju, sekan sopẹ́-sinmẹnọ po sekan vẹẹ ṣẹ́ṣẹ́ po do basi gòhọtúntún+ lọ; ewọ* sọ kó yẹdide kelubimi lẹ tọn do yé go.+
9 Avọ̀ gòhọ tọn dopodopo dite na awagbà* 28 bo gblo na awagbà 4. Podọ avọ̀ gòhọ tọn lọ lẹpo wẹ sọzẹn.
10 Enẹgodo, e ṣá avọ̀ gòhọ tọn atọ́n dopọ bosọ ṣá atọ́n he pò lẹ dopọ ga.
11 E sọ yí sekan juju do basi ogblà lẹ do tónu na avọ̀ gòhọ tọn tintan to fie e na yin ṣiṣá dopọ te. E sọ wà nudopolọ do tónu pete na avọ̀ gòhọ tọn awetọ to fie e na yin ṣiṣá dopọ te.
12 E sọ basi ogblà 50 do avọ̀ gòhọ tọn tintan go, podọ ogblà 50 do tónu awetọ na avọ̀ gòhọ tọn lọ to fie e na yin ṣiṣá dopọ te, na ogblà lọ lẹ nido pannukọn yede.
13 Enẹgodo, e basi oplánú sika tọn 50 bo yí oplánú lọ lẹ do ṣá avọ̀ gòhọ tọn lọ lẹ dopọ, na gòhọtúntún lọ nido yin dopo.
14 Enẹgodo, e yí gbọgbọẹ-fún do basi avọ̀ he na nọ gòhọtúntún lọ ji lẹ. Avọ̀ gòhọ tọn 11 wẹ e basi.+
15 Avọ̀ gòhọ tọn dopodopo dite na awagbà 30 bo gblo na awagbà 4. Avọ̀ gòhọ tọn 11 lọ lẹpo wẹ sọzẹn.
16 E sọ ṣá atọ́n to avọ̀ gòhọ tọn lọ lẹ mẹ dopọ bosọ ṣá avọ̀ gòhọ tọn ṣidopo he pò lẹ dopọ ga.
17 Enẹgodo, e basi ogblà 50 do tónu na avọ̀ gòhọ tọn he to tónu pete lọ to fie e yin ṣiṣá dopọ te podọ ogblà 50 do tónu na avọ̀ gòhọ tọn awetọ to fie e yin ṣiṣá do tintan lọ go te.
18 E sọ basi oplánú gànvẹẹ tọn 50 nado ṣá avọ̀ gòhọ tọn lọ lẹ dopọ, na e nido yin dopo.
19 E sọ yí agbò-yú vẹẹ do basi avọ̀ he na ṣinyọ́n gòhọ lọ ji bosọ yí kanlin-yú* devo ṣinyọ́n enẹ lọ ji aga.+
20 E sọ yí owhlẹ akasia tọn+ do basi owhlẹ ote tọn gòhọtúntún lọ tọn lẹ bọ yé yin tùntùnte.+
21 Owhlẹ ote tọn lọ lẹ dopodopo dite na awagbà ao bo gblo na awagbà dopo daa.
22 Owhlẹ ote tọn dopodopo tindo osó* awe-awe to oglọ bọ yé to apá na yede. Lehe e basi owhlẹ ote tọn gòhọtúntún lọ tọn lẹpo do niyẹn.
23 Gbọnmọ dali, e basi owhlẹ ote tọn lẹ do adà hùwaji tọn gòhọtúntún lọ tọn, yèdọ owhlẹ ote tọn 20 pànta hùwaji.
24 Enẹgodo, e yí fataka do basi oslò dodonu tọn 40 do oglọ na owhlẹ ote tọn 20 lọ lẹ, yèdọ oslò dodonu tọn awe to oglọ na owhlẹ ote tọn dopo he mẹ osó etọn awe lẹ na biọ, bọ oslò dodonu tọn awe to oglọ na owhlẹ ote tọn dopodopo na osó yetọn awe-awe lẹ.+
25 E sọ basi owhlẹ ote tọn 20 na adà awetọ gòhọtúntún lọ tọn, yèdọ adà agewaji tọn
26 bosọ yí fataka do basi oslò dodonu tọn yetọn 40 lẹ, yèdọ oslò dodonu tọn awe to owhlẹ ote tọn dopo glọ, podọ oslò dodonu tọn awe-awe to owhlẹ ote tọn he pò dopodopo glọ.
27 E sọ basi owhlẹ ote tọn ṣidopo+ na adà gòhọtúntún lọ tọn he pànta whèyihọ.
28 E yí owhlẹ ote tọn awe do basi dòtin lẹ do agosu awe gòhọtúntún lọ tọn he to godo lẹ mẹ.
29 Dòtin he tin to agosu lọ ji lẹ yin awe topọ sọn odò jẹ alọkẹ tintan kọ̀n to aga. Nuhe e basi na dòtin agosu mẹ tọn awe lọ lẹ niyẹn.
30 Enẹwutu, sọha owhlẹ ote tọn lọ lẹ tọn yin ṣinatọ̀n po oslò dodonu tọn yetọn 16 lẹ po he yè yí fataka do basi, yèdọ oslò awe to oglọ na owhlẹ ote tọn dopodopo.
31 E sọ yí owhlẹ akasia tọn do basi dòtin lẹ, yèdọ dòtin atọ́n na owhlẹ ote tọn he to adà tintan gòhọtúntún lọ tọn ji lẹ,+
32 dòtin atọ́n na owhlẹ ote tọn he to adà awetọ gòhọtúntún lọ tọn ji lẹ, podọ dòtin atọ́n na owhlẹ ote tọn lẹ to adà godo tọn gòhọtúntún lọ tọn he pànta whèyihọ ji.
33 E sọ basi dòtin ṣẹnṣẹn tọn he gbọn ṣẹnṣẹn na owhlẹ ote tọn lọ lẹ bọ yé dite bo gbòplá.
34 E sọ và sika na owhlẹ ote tọn lọ lẹ bosọ yí sika do basi alọkẹ yetọn lẹ he mẹ dòtin lọ lẹ na gbọn, e sọ và sika na dòtin lọ lẹ.+
35 Enẹgodo, e yí sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po do basi họmẹgbòvọ̀+ de. E sọ kó+ yẹdide kelubimi+ lẹ tọn do e go.
36 E sọ yí owhlẹ akasia tọn do basi dòtin ẹnẹ do e go bo và sika na yé, bosọ yí sika do basi oplá yetọn lẹ, podọ e yí fataka do basi oslò dodonu tọn ẹnẹ do oglọ na yé.
37 Enẹgodo, e yí sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po do basi avọ̀* he nọ yin dido do họntonu gòhọ lọ tọn,+
38 gọna dòtin atọ́n etọn lẹ po oplá etọn lẹ po. E sọ và sika na yé to aga po opò aga tọn* yetọn lẹ po, ṣigba bo yí gànvẹẹ do basi oslò dodonu tọn yetọn atọ́n lẹ.
Nudọnamẹ Odò Tọn
^ To paa mẹ, “sunnu he yin nuyọnẹntọ to ahun mẹ.”
^ E họnwun dọ ehe to alọdlẹndo Bezalẹli.
^ Enẹ wẹ, ayú kanlin he nọ nọ̀ hùmẹ de tọn.
^ Enẹ wẹ, ofi tlọ́ntlọ́n he nọ yin bibasi do owhlẹ go nado ṣá ẹ do nude go.
^ Kavi “họmẹgbòvọ̀.”
^ Kavi “alọkẹ; okàn” he na blanú.
