Heblu lẹ 3:1-19
3 Enẹwutu, mẹmẹsunnu mẹwiwe lẹ emi, mì he yin mahẹtọ oylọ olọn tọn lẹ,+ mì nọ lẹn apọsteli podọ yẹwhenọ daho he mẹ mí do yise hia te* lọ tọn pọ́n—enẹ wẹ Jesu.+
2 Ewọ yin nugbonọ na Mẹlọ he de e,+ kẹdẹdile Mose lọsu yin nugbonọ do to owhé* Omẹ enẹ lọ tọn pete gbè.+
3 Na ewọ* yin pinpọnhlan nado jẹna gigo+ susu hú Mose, to whenuena e yindọ ewọ he gbá ohọ̀ de tindo gbégbò hugan ohọ̀ lọ lọsu.
4 Na nugbo tọn, ohọ̀ lẹpo wẹ nọ yin gbigbá gbọn mẹde dali, ṣigba mẹhe basi nulẹpo wẹ Jiwheyẹwhe.
5 Podọ taidi devizọnwatọ de, Mose yin nugbonọ to owhé Omẹ enẹ lọ tọn pete gbè taidi kunnudenu* nuhe na wá yin didọ to godo mẹ lẹ tọn,
6 ṣigba taidi Visunnu de,+ Klisti yin nugbonọ do owhé Jiwheyẹwhe tọn ji. Míwlẹ wẹ yin owhé Omẹ enẹ lọ tọn,+ eyin mí tẹdo awuvivo hodidọ tọn mítọn podọ do todido he mẹ mí to awagundo te lọ go gligli kakajẹ opodo.
7 Enẹwutu, kẹdẹdile gbigbọ wiwe dọ do+ dọmọ, “Egbé, eyin mìwlẹ dotoaina ogbè etọn,
8 mì hẹn ahun mìtọn sinyẹn blo taidi to ojlẹ he mẹ homẹ yin hinhẹngble mi sinsinyẹn, taidi to azán he gbè yẹn yin whiwhlepọn to danfafa ji,+
9 to fie tọgbo mìtọn lẹ whlé mi pọ́n bo tẹ́n mi pọ́n te, mahopọnna dọ yé ko mọ azọ́n ṣie lẹ na owhe 40.+
10 Na ehe tọn wutu wẹ yẹn gblehomẹ do whẹndo enẹ go bo dọmọ: ‘Whepoponu wẹ ahun yetọn nọ to dindanpe, podọ yé ma ko yọ́n aliho ṣie lẹ.’
11 Enẹwutu wẹ yẹn whlé to homẹgble ṣie mẹ dọ: ‘Yé ma na biọ gbọjẹ ṣie mẹ.’”+
12 Mẹmẹsunnu lẹ emi, mì payi na mẹdepope to mì mẹ nikaa wleawuna ahun ylankan yise matindo tọn gbede gbọn agọjijoyigodo sọn Jiwheyẹwhe ogbẹ̀nọ lọ dè dali;+
13 ṣigba mì nọ to tulina ode awetọ to azán lẹpo gbè, dile e na dẹnsọ bọ e na yin yiylọdọ “Egbé,”+ na huhlọn mẹkiklọ tọn ylando tọn nikaa hẹn ahun mẹdepope tọn to mì mẹ sinyẹn.
14 Na taun tọn, mí ma na lẹzun mahẹtọ* po Klisti po eyin mí ma hẹn jidide he mí tindo to bẹjẹeji lọ go gligli kakajẹ opodo.+
15 Dile e yin didọ do dọmọ, “Egbé, eyin mìwlẹ dotoaina ogbè etọn, mì hẹn ahun mìtọn sinyẹn blo taidi to ojlẹ he mẹ homẹ yin hinhẹngble mi sinsinyẹn.”+
16 Mẹnu wẹ mẹlọ lẹ he ko sè ṣogan bo hẹn homẹgble e sinsinyẹn? Na nugbo tọn, be e ma yin mẹhe tọ́njẹgbonu sọn Egipti to anademẹ Mose tọn glọ lẹpo wẹ?+
17 Humọ, mẹnu lẹ go wẹ Jiwheyẹwhe gblehomẹ do na owhe 40?+ Be e ma yin do mẹhe waylando bo kú to danfafa ji lẹ go wẹ ya?+
18 Podọ mẹnu lẹ wẹ ewọ whlé na dọ yé ma na biọ gbọjẹ etọn mẹ? Be e ma yin mẹhe vẹtoli lẹ wẹ?
19 Enẹwutu, mí mọdọ yé ma sọgan biọ e mẹ na yise matindo wutu.+
Nudọnamẹ Odò Tọn
^ Kavi “he mí yigbe etọn.”
^ Dlẹnalọdo akọta Islaeli tọn.
^ Enẹ wẹ, Jesu.
^ Kavi “kunnudetọ.”
^ Kavi “mimátọ.”
