Jọṣua 20:1-9
-
Tòdaho fibẹtado tọn lẹ (1-9)
20 Enẹgodo, Jehovah dọna Jọṣua dọmọ:
2 “Dọna Islaelivi lẹ dọmọ, ‘Mì de tòdaho fibẹtado tọn+ he yẹn dọho etọn na mì gbọn Mose dali lẹ na mìde,
3 na hlọnhutọ he hùmẹ* gbọn nuṣiwa dali kavi to mayọnẹn mẹ nido sọgan họnyi finẹ. Yé nasọ yin fibẹtado de na mì sọn ahọsuyitọ ohùn tọn lọ si.+
4 Hlọnhutọ lọ dona họnyi dopo to tòdaho ehelẹ mẹ+ bo nọte to họngbo tòdaho lọ tọn ji+ bosọ jẹwhẹ ede tọn na mẹho tòdaho enẹ tọn lẹ. To whenẹnu, yewlẹ dona yí i do tòdaho lọ mẹ bo na ẹn nọtẹn de nado nọ nọhẹ yé.
5 Eyin ahọsuyitọ ohùn tọn lọ dómọna ẹn, yé ma dona jo hlọnhutọ lọ do alọ etọn mẹ, na mayọnẹn mẹ wẹ e hù hatọ etọn te, podọ ewọ ma ko gbẹwanna ẹn dai.+
6 Ewọ dona gbọṣi tòdaho enẹ mẹ kakajẹ whenue e na yin whẹdana to pipli lọ nukọn+ podọ e dona gbọṣi finẹ kakajẹ okú yẹwhenọ daho+ he to sinsẹ̀nzọnwa to ojlẹ enẹ mẹ tọn whenu. Whenẹnu wẹ hlọnhutọ lọ sọgan lẹkọyi owhé etọn gbè to tòdaho etọn titi mẹ, yèdọ tòdaho he mẹ e họ̀n sọn lọ.’”+
7 Enẹwutu, yé klan tòdaho ehelẹ do wiwe* na lẹndai ehe: Kedẹṣi+ to Galili to lẹdo osó tọn Naftali tọn mẹ, Ṣekẹmi+ to lẹdo osó tọn Eflaimi tọn mẹ po Kiliati-alba+ po, enẹ wẹ Heblọni, to lẹdo osó tọn Juda tọn mẹ.
8 To agbegbe Jọdani tọn ji to whèzẹtẹn-waji Jẹliko tọn, yé de Bezẹli+ he tin to danfafa ji to aigba flala* ji sọn aigba hẹnnu Leubẹni tọn mẹ, Lamọti+ he tin to Giliadi sọn aigba hẹnnu Gad tọn mẹ, gọna Golani+ he tin to Baṣani sọn aigba hẹnnu Manasse tọn mẹ.+
9 Ehelẹ wẹ lẹzun tòdaho he yin dide na Islaelivi lẹpo gọna mẹhe to jonọ-gbéji to ṣẹnṣẹn yetọn lẹ, na mẹdepope he hùmẹ* to mayọnẹn mẹ nido sọgan họnyi finẹ+ ma nado kú gbọn alọ ahọsuyitọ ohùn tọn lọ tọn mẹ whẹpo e nado yin whẹdana to pipli lọ nukọn.+
Nudọnamẹ Odò Tọn
^ Kavi “hù alindọn de.”
^ Kavi “dovo.”
^ Kavi “aigba he jlọ.”
^ Kavi “hù alindọn de.”
