Owalọ lẹ 24:1-27
24 To azán atọ́n godo, yẹwhenọ daho Ananias+ wá po mẹho delẹ po gọna hodọtọ gbangba tọn* de he nọ yin Teltulu, yé sọ dọho jẹagọdo Paulu to ayimatẹn-gán lọ nukọn.+
2 To whenue e yin yiylọ wá, Teltulu jẹ whẹsadokọna ẹn ji dọmọ:
“Mimọ dọ mí to vivi jijọho daho tọn dù sọn hiẹ dè bọ diọdo lẹ to aimẹ wá to akọta ehe mẹ gbọn numọhlan-nukọn towe dali,
3 mí nọ gbọn pẹdido daho dali do pinpẹn-nutọn-yinyọnẹn hia na ehe to whepoponu podọ to filẹpo, Hiẹ Gigonọ Daho Feliksi.
4 Ṣigba, ma nado hẹn whenu towe gú dogọ, yẹn vẹ̀ we, na homẹdagbe towe wutu, nado sè ohó mítọn na whenu vude.
5 Na mí ko mọdọ adlanọ* de wẹ dawe ehe+ bọ e to gufinfọn hẹnwa+ Ju lẹpo ṣẹnṣẹn gbọn aigba fininọ lẹpo ji bosọ yin tọ́ntlọ́ngbọ́n na sinsẹ̀n klandovo Nazalẹtinu lẹ tọn.+
6 E sọ nọ tẹnpọn nado hẹn tẹmpli lọ flu, enẹwutu wẹ mí wle e.+
7 *——
8 Eyin hiẹ lọsu kanhose e, hiẹ na mọdona onú ehe lẹpo he mí to owhẹ̀ etọn sadokọna ẹn lẹ.”
9 To whenẹnu, Ju lẹ lọsu kọnawudopọ hẹ ẹ to mẹgbeyinyan lọ mẹ bo zinnudeji dọ nugbo wẹ onú ehelẹ.
10 To whenue ayimatẹn-gán lọ ko mimí ota hlan Paulu nado dọho, e gblọn dọmọ:
“To yinyọnẹn mẹ ganji dọ hiẹ ko yin whẹdatọ akọta ehe tọn na owhe susu lẹ, po homẹhunhun po wẹ yẹn do to hodọ nado yiavùnlọna dee.+
11 Dile hiẹ lọsu sọgan dindona do, e ma ko hú azán 12 he yẹn hẹji yì Jelusalẹm nado basi sinsẹ̀n;+
12 yé masọ mọ mi to nudọn hẹ mẹdepope to tẹmpli mẹ, mọdopolọ yẹn masọ hẹn gbẹtọgun zingidinọ de fọnadán, vlavo to sinagọgu lẹ mẹ kavi to fidepope to tòdaho lọ mẹ.
13 Mọjanwẹ yé ma sọgan do nugbo-yinyin nuhe yé to owhẹ̀ etọn sadokọna mi lẹ tọn hia we todin do niyẹn.
14 Ṣigba, yẹn yigbe ehe tọn na we, dọ sọgbe hẹ aliho lọ he yé nọ ylọdọ sinsẹ̀n klandovo de, mọ wẹ yẹn to sinsẹ̀nzọn wiwe wà hlan Jiwheyẹwhe tọgbo ṣie lẹ tọn,+ dile yẹn tindo yise to nulẹpo he yin kinkan to Osẹ́n lọ mẹ podọ to Yẹwhegán lẹ mẹ.+
15 Podọ yẹn tindo todido to Jiwheyẹwhe mẹ, yèdọ todido he omẹ ehelẹ lọsu tindo, dọ fọnsọnku+ dodonọ lẹ po mawadodonọ lẹ po tọn de na tin.+
16 Enẹwutu, yẹn nọ to vivẹnudo to whepoponu nado hẹn ayihadawhẹnamẹnu wiwe* de go to Jiwheyẹwhe po gbẹtọ po nukọn.+
17 Todin, to owhe delẹ godo, yẹn wá nado na nunina lẹblanu tọn lẹ+ omẹ ṣie lẹ podọ nado basi avọ́nunina lẹ.
18 Dile yẹn to onú ehelẹ basi, yé mọ mi to tẹmpli mẹ to whenue yẹn to yinyin kiklọ́we to aṣa-liho,+ ṣigba yé ma mọ mi po gbẹtọgun de po kavi mọ mi bọ yẹn to bẹwlu hẹnwa gba. Ṣigba, Ju delẹ tin he wá sọn ayimatẹn Asia tọn mẹ
19 he dona ko tin tofi to nukọn towe nado sawhẹdokọna mi eyin yé sọgan mọ nudepope jẹagọdo mi nugbonugbo.+
20 Kavi gbọ mẹhe tin tofi lẹ lọsu ni dọ eyin yé mọ oylan de to whenue yẹn ṣite to hagbẹ Whẹdatẹn Daho Ju lẹ tọn* lọ nukọn,
21 adavo onú dopo ehe, gando ehe go yẹn yí ogbè lélé do dawhá to whenue yẹn ṣite to ṣẹnṣẹn yetọn dọ: ‘Na fọnsọnku oṣiọ lẹ tọn wutu wẹ yẹn to yinyin whẹdana to nukọn mìtọn to egbé!’”+
22 Ṣigba, na Feliksi yọ́n whẹho he gando Aliho* ehe+ go lẹ ganji wutu, e sẹ̀ owhẹ̀ yetọn donukọn bo dọmọ: “Whedepopenu he Lisia awhàngán daho lọ wá, yẹn na basi nudide do whẹho he gando mì go ehelẹ ji.”
23 E sọ degbena awhàngán* lọ dọ dawe lọ ni yin hinhẹn gọyì gànmẹ, ṣigba mẹdekannujẹ vude ni yin nina ẹn, podọ dotẹnmẹ ni yin nina omẹ etọn lẹ nado nọ penukundo nuhudo etọn lẹ go.
24 To azán delẹ godo, Feliksi wá po Dlusila asi etọn po, mẹhe yin yọnnu Ju de, e sọ domẹhlan Paulu bo dotoaina ẹn dile e to hodọ gando yise to Klisti Jesu mẹ go.+
25 Ṣigba, to whenue Paulu dọho dogbọn dodowiwa po mawazẹjlẹgo po gọna whẹdida he ja lọ dali,+ budi Feliksi bọ e gblọn dọmọ: “Yì todin whẹ́, ṣigba eyin yẹn tindo dotẹnmẹ hundote de, yẹn nasọ vọ́ dowẹn hlan we.”
26 To ojlẹ dopolọ mẹ, e to nukundo dọ Paulu na na ẹn alọgodo-kuẹ. Enẹwutu, e nọ dowẹn hlan ẹn gbọzangbọzan dogọ bo nọ dọho hẹ ẹ.
27 Ṣigba, to whenue owhe awe ko juwayi, Pọlkiu Festu jẹ otẹn Feliksi tọn mẹ; podọ na Feliksi jlo nado mọ nukundagbe Ju lẹ tọn wutu,+ e jo Paulu do gànmẹ.
Nudọnamẹ Odò Tọn
^ Kavi “whẹ̀yidọtọ.”
^ Kavi “avùnda-daitọ.” To paa mẹ, “azọ̀nylankan.”
^ Kavi “he madoblọ.”
^ Ehe to alọdlẹndo aliho gbẹninọ tọn po nuplọnmẹ Klistiani tọn po.
^ Kavi “mẹkanwekowhàngán” he nọ deanana awhànfuntọ 100.
