Salmu 77:1-20
Na anademẹtọ hànjitọ lẹ tọn; to Jedutuni* ji. Ohàn Asafi tọn.+
77 Yẹn na yí ogbè ṣie do dawhá ylọ Jiwheyẹwhe;Jiwheyẹwhe wẹ yẹn na dawhá ylọ, ewọ nasọ siọ mi.+
2 Yẹn nọ dín Jehovah to azán ayimajai ṣie tọn gbè.+
Yẹn nọ dlẹnalọ ṣie lẹ hlan ẹn mapote* to zánmẹ.
Ṣogan, yẹn* ma sọgan yin homẹmiọnna.
3 N’nọ wẹnhun to whenue n’flin Jiwheyẹwhe;+Ayiha ṣie nọ gbàdo bọ awú nọ kú mi.*+ (Sela)
4 Hiẹ hẹn nukundama ṣie lẹ do hùnhùn;Yẹn sọ biọ bẹwlu mẹ bo ma sọgan dọho.
5 N’jẹ azán hoho tọn lẹ flin ji,+Yèdọ owhe he ko wayi hoho lẹ.
6 N’nọ flin ohàn ṣie to zánmẹ;+N’nọ lẹnnupọn sisosiso to ahun ṣie mẹ;+N’sọ* nọ basi dodinnanu kitokito.
7 Be Jehovah na tùn mí dlan kakadoi wẹ?+
Be ewọ ma na do nukundagbe etọn hia ba wẹ?+
8 Owanyi nugbo etọn ko doalọte kakadoi wẹ ya?
Be opagbe etọn na lẹzun ovọ́ na whẹndo lẹpo wẹ ya?
9 Be Jiwheyẹwhe ko wọn nado do nukundagbe hia wẹ,+Kavi homẹgble etọn ko hẹnalọdotena lẹblanu etọn wẹ ya? (Sela)
10 Be yẹn na gbẹ́ to didọ dọ: “Nuhe hẹn ayimajai wá na mi* wẹ yindọ:+
Gigogán lọ ko diọ aliho he mẹ e nọ yinuwa hẹ mí te”?*
11 Yẹn na nọ flin azọ́n Jah tọn lẹ;N’na nọ flin azọ́njiawu towe he a ko wà sọn ojlẹ dindẹn die lẹ.
12 Podọ yẹn na nọ lẹnayihamẹpọn do azọ́n towe lẹpo jiBo nasọ nọ lẹnnupọn sisosiso do nuyiwa towe lẹ ji.+
13 Jiwheyẹwhe E, aliho towe lẹ wé.
Yẹwhe tẹwẹ klo sọ we, Jiwheyẹwhe E?+
14 Hiẹ wẹ Jiwheyẹwhe nugbo lọ he nọ wà nujiawu lẹ.+
Hiẹ ko do huhlọn towe hia gbẹtọ lẹ.+
15 Hiẹ ko yí huhlọn* towe do whlẹn omẹ towe lẹ,*+Yèdọ visunnu Jakọbu po Josẹfu po tọn lẹ. (Sela)
16 Osin lẹ mọ we, Jiwheyẹwhe E;Osin lẹ mọ we bo wlu.+
Osin he siso lẹ sọ biọ bẹwlu mẹ.
17 Aslọ lẹ kọ̀n osin wududu.
Hẹviosò dọnú sọn agahomẹ he gọ́ na aslọ lẹ,Abì towe sọ gbòdlán gbọn filẹpo taidi ogába lẹ.+
18 Nudidọ hẹviosò+ towe tọn taidi kẹkẹfọ osọ́-kẹkẹ de tọn lẹ;Abì he gbòdlán lẹ tá hinhọ́n do aigba ji;+Aigba sọ sisọ bo whàn.+
19 Hiẹ de aliho towe gbọn hùmẹ,+Podọ ali towe gbọn osin susu mẹ;Ṣigba, afọdòmẹ towe lẹ ma sọgan yin mimọ.
20 Hiẹ deanana omẹ towe lẹ kẹdẹdi lẹngbọpa de,+Gbọn* Mose po Aalọn po gblamẹ.+
Nudọnamẹ Odò Tọn
^ To paa mẹ, “bọ yé ma nọ kuyẹ̀.”
^ Kavi “alindọn ṣie.”
^ To paa mẹ, “bọ gbigbọ ṣie nọ dakú.”
^ To paa mẹ, “Gbigbọ ṣie sọ.”
^ To paa mẹ, “diọ adusilọ etọn gando mí go.”
^ Kavi “Nuhe to sisọ́ mi.”
^ To paa mẹ, “awà.”
^ To paa mẹ, “do fli omẹ towe lẹ gọ̀.”
^ To paa mẹ, “Gbọn alọ.”
