Whẹdatọ lẹ 21:1-25
-
Hẹnnu Bẹnjamini tọn yin hihla dai (1-25)
21 Todin, sunnu Islaeli tọn lẹ ko whlé to Mizpa+ dọmọ: “Depope to mí mẹ ma na na viyọnnu etọn sunnu Bẹnjamini tọn de taidi asi.”+
2 Enẹwutu, gbẹtọ lọ lẹ wá Bẹtẹli+ bo sinai to finẹ to Jiwheyẹwhe nugbo lọ nukọn kakajẹ whèjai, yé sọ to awhádo bo to avivi vivẹvivẹ.
3 Yé sọ to didọ dọmọ: “Jehovah Jiwheyẹwhe Islaeli tọn E, naegbọn ehe do jọ to Islaeli? Naegbọn hẹnnu dopo do whèpo to egbehe sọn hẹnnu Islaeli tọn lẹ mẹ?”
4 To wunkẹngbe, gbẹtọ lọ lẹ fọ́n to afọnnu fuu bo do agbà de do finẹ nado basi avọ́nunina mimẹ̀ lẹ po avọ́nunina jijọho tọn+ lẹ po.
5 Enẹgodo, omẹ Islaeli tọn lẹ dọmọ: “To hẹnnu Islaeli tọn lẹpo mẹ, mẹnu wẹ ma hẹji wá nado pli to Jehovah nukọn?” na yé ko whlé sinsinyẹn dọ mẹdepope he ma hẹji wá Jehovah nukọn to Mizpa dona yin hùhù dandan.
6 Enẹwutu, ninọmẹ Bẹnjamininu nọvisunnu yetọn lẹ tọn blawuna omẹ Islaeli tọn lẹ. Yé sọ dọmọ: “Hẹnnu dopo ko yin sinsánsẹ sọn Islaeli to egbehe.
7 Etẹwẹ mí na wà nado mọ asi na mẹhe pò lẹ, todin he mí ko yí Jehovah do whlé+ dọ mí ma na na yé depope to viyọnnu mítọn lẹ mẹ taidi asi?”+
8 Yé sọ kanse dọmọ: “Mẹnu to hẹnnu Islaeli tọn lẹ mẹ wẹ ma hẹji wá Jehovah nukọn to Mizpa?”+ E sọ yin ayidego dọ mẹdepope ma tlọ́n Jabẹṣi-giliadi wá osla he mẹ agun lọ pli do.
9 To whenue sọha gbẹtọ lọ lẹ tọn yin yíyí, yé mọdọ mẹhe tlọ́n Jabẹṣi-giliadi depope ma tin to finẹ.
10 Enẹwutu, pipli lọ do sunnu 12 000 hlan dọ́n sọn mẹhe yin huhlọnnọ hugan lẹ mẹ. Yé sọ degbena yé dọmọ: “Mì yì bo yí ohí do hù mẹhe nọ nọ̀ Jabẹṣi-giliadi lẹ, yèdọ kakajẹ yọnnu lẹ po yọpọvu lẹ po ji.+
11 Nuhe mì dona wà die: Sunnu lẹpo gọna yọnnu he ko tindo kọndopọ zanhẹmẹ tọn hẹ sunnu de pọ́n lẹpo wẹ mì dona vasudo mlẹnmlẹn.”
12 To mẹhe nọ nọ̀ Jabẹṣi-giliadi lẹ mẹ, yé mọ yọnnu 400 he gbẹ́ pò to alọji bo ma ko tindo kọndopọ zanhẹmẹ tọn hẹ sunnu de pọ́n. Enẹwutu, yé hẹn yé wá osla lọ mẹ to Ṣilo,+ to aigba Kenani tọn ji.
13 To whenẹnu, pipli lọ pete dowẹn hlan Bẹnjamininu he tin to osé Limọni+ ji lẹ bo hùn dotẹnmẹ jijọho bibasi tọn dote na yé.
14 Enẹwutu, omẹ Bẹnjamini tọn lẹ lẹkọ to ojlẹ enẹ mẹ. Omẹ Islaeli tọn lẹ sọ na yé yọnnu he yé ko pò dogbẹ̀ sọn yọnnu Jabẹṣi-giliadi tọn mẹ lọ lẹ,+ ṣigba sọha he yé mọ na yé ma pé.
15 Ninọmẹ omẹ Bẹnjamini tọn lẹ tọn sọ blawuna gbẹtọ lọ lẹ,+ na Jehovah ko hẹn kinklan wá hẹnnu Islaeli tọn lẹ ṣẹnṣẹn wutu.
16 Mẹho he to pipli lọ mẹ lẹ dọmọ: “Etẹwẹ mí na wà nado mọ asi na sunnu he pò lọ lẹ, na yọnnu he to hẹnnu Bẹnjamini tọn mẹ lẹpo wẹ ko yin hùhù?”
17 Yé sọ gblọn dọmọ: “Ogú de dona yin nina omẹ Bẹnjamini tọn he họ̀ngán lẹ, na hẹnnu de nikaa yin súnsúnsún sẹ̀ to Islaeli.
18 Ṣigba, mí ma sọgan na yé viyọnnu mítọn lẹ taidi asi, na omẹ Islaeli tọn lẹ ko whlé dọ: ‘Mẹhodẹ̀do wẹ mẹlọ he na asi sunnu Bẹnjamini tọn de.’”+
19 To whenẹnu, yé dọmọ: “Pọ́n! Hùnwhẹ de nọ yin bibasi na Jehovah to whemẹwhemẹ to Ṣilo,+ he tin to agewaji Bẹtẹli tọn, to whèzẹtẹn-waji alihogbó he hẹji sọn Bẹtẹli yì Ṣekẹmi tọn podọ to hùwaji Lebona tọn.”
20 Enẹwutu, yé dọna sunnu Bẹnjamini tọn lẹ dọmọ: “Mì yì bo tọ̀pọwu dai do vẹngle lẹ mẹ.
21 Eyin mì mọ bọ awhli* Ṣilo tọn lẹ tọ́njẹgbonu nado dúwe, dopodopo mìtọn ni tọ́njẹgbonu sọn vẹngle lọ lẹ mẹ bo wle awhli Ṣilo tọn de na ede taidi asi, enẹgodo mì ni lẹkọyi aigba Bẹnjamini tọn ji.
22 Podọ eyin otọ́ kavi nọvisunnu yetọn lẹ ylọwhẹ mí, to whenẹnu míwlẹ na dọna yé dọ, ‘Mì do nukundagbe hia mí do ota yetọn mẹ, na mí ma mọ yọnnu wle na yemẹpo taidi asi to awhàn he mí fùn lọ whenu,+ podọ mìlọsu ma sọgan na yé viyọnnu mìtọn lẹ taidi asi bo nọma hùwhẹ.’”+
23 Enẹwutu, sunnu Bẹnjamini tọn lẹ wà domọ pẹpẹ bo wle yọnnu lẹ na yede taidi asi sọn yọnnu he to wedu lọ lẹ mẹ. Enẹgodo, yé lẹkọyi aigba he yin ogú yetọn lọ ji bo vọ́ tòdaho yetọn lẹ gbá+ bosọ nọ nọ̀ yé mẹ.
24 Islaelivi lẹ sọ gbàdo sọn finẹ to ojlẹ enẹ mẹ, yèdọ mẹdopodopo yì hẹnnu etọn po whẹndo etọn po mẹ, yé sọ tọ́nyi sọn finẹ, mẹdopodopo yì aigba he yin ogú etọn ji.
25 To azán enẹlẹ gbè, ahọlu de ma tin to Islaeli.+ Nuhe sọgbe to nukun mẹdopodopo tọn mẹ* wẹ e nọ wà.
