Jobu 19:1-29
19 Jobu sọ gblọn dọmọ:
2 “Nawẹ e na dẹnsọ bọ mìwlẹ na to homẹhẹngblena alindọn ṣie,*+Bo na yí ohó do to gbidigbidi mi?+
3 Whla ao wẹ mì ko wọhẹ* mi;Winyan ma tlẹ hù mì nado yinuwa hẹ mi po kanyinylan po.+
4 Podọ eyin yẹn tlẹ ko ṣì nude wà janwẹ,Be yẹnlọsu si wẹ e pò te.
5 Eyin mìwlẹ zindonukọn nado to mìde zedaga do ji e,Bo to alọsọakọ́n dọ yẹn jẹna vlẹko nugbonugbo,
6 To whenẹnu, mì yọnẹn dọ Jiwheyẹwhe wẹ ko hẹn mi buali,Podọ ewọ wẹ wle mi do odọ̀ etọn mẹ.
7 Mì pọ́n! Yẹn to awhádo mapote dọ, ‘Danuwiwa tẹ die!’ ṣigba yẹn ma mọ gblọndo;+Yẹn to awhádo mapote na alọgọ, ṣigba whẹdida dodo depope ma tin.+
8 Ewọ ko yí adó zannu tọn de do súali do mi, bọ yẹn ma sọgan juwayi;E ko yí zinvlu do ṣinyọ́n omọ́-liho ṣie lẹ.+
9 E ko de gigo ṣie sọn go eBo de jẹgbakun sẹ̀ sọn ota na mi.
10 E nọ pẹ́tẹ mi to adà lẹpo ji kakajẹ whenue yẹn dọ̀n;E họ̀nadọna todido ṣie di atin de.
11 E gblehomẹ do go e sinsinyẹn,Bo nọ pọ́n mi hlan di kẹntọ.+
12 Awhànfuntọ etọn lẹ zọnpọ nado wá tọ́nawhàn mi,Yé sọ dosla lẹdo gòhọ ṣie.
13 Ewọ ko yàn nọvisunnu ṣie lẹ dẹn do mi pete,Bọ mẹhe yọ́n mi lẹ ko lẹkọ sọn godo ṣie.+
14 Họntọn vivẹ́* ṣie lẹ ko yì,Bọ mẹhe yẹn yọnẹn ganji lẹ ko wọn mi.+
15 Mẹhe yẹn yí do owhé ṣie gbè lẹ+ po afanumẹ yọnnu ṣie lẹ po nọ pọ́n mi hlan di jonọ;Mẹdevo lao wẹ yé nọ yí mi do mọ.
16 Yẹn nọ ylọ devi ṣie, ṣigba e ma nọ kẹnù demẹ na mi;N’nọ yí onù ṣie do vẹ̀ ẹ nado do awuvẹmẹ hia mi.
17 Gbọfufu ṣie ko lẹzun awuhiọnu na asi ṣie,+Yẹn sọ nọ lunwán do nọvisunnu ṣie titi lẹ.*
18 Yọpọvu lẹ lọsu nọ vlẹ mi kò;Eyin yẹn ko gbẹ́ fọ́n, yé nọ jẹ ṣinṣàn mi kò ji.
19 Họntọn vivẹ́ ṣie lẹpo wẹ gbẹwanna mi,+Bọ mẹhe yẹn yiwanna lẹ ko diọnukunsọ mi.+
20 Yẹn húgo kaka bo pò ohú kẹdẹ,+Awọ̀ wẹ jẹ́ na mi bọ n’do gán.
21 Mì wàlẹblanuna mi, hagbẹ ṣie lẹ emi, mì wàlẹblanuna mi,Na alọ Jiwheyẹwhe lọsu titi tọn ko jẹ go e.+
22 Naegbọn mìwlẹ do to homẹkẹndo mi mapote dile Jiwheyẹwhe to wiwà do,+Bo to ogbé ṣie yàn klinkán-klinkán?*+
23 Eyin ohó ṣie lẹ ko yin kinkandai wẹ,Eyin yé sọgan ko yin kinkan do owe de mẹ wẹ!
24 Ṣo, na yé ni yin winwlan do osé go kakadoi,Gbọn wekantin ogànnọ po sunmí po dali!
25 Na yẹn yọnẹn ganji dọ mẹfligọtọ*+ ṣie tin togbẹ̀;Ewọ na wá to godo mẹ bo na fọ́n do aigba* ji.
26 To whenue ayú ṣie ko yin hinhẹngble domọ godo,Yẹn na gbẹ́ mọ Jiwheyẹwhe mahopọnna dọ agbasalan ṣie ko gblekàn pete,
27 Yẹnlọsu titi wẹ na mọ ẹn,Nukun ṣie titi wẹ na mọ ẹn, e ma yin mẹdevo tọn.+
Ṣigba, onú ko ṣikọna mi to ohò ṣie mẹ dọ́n!*
28 Na mìwlẹ dọ dọ, ‘Aliho tẹ mẹ wẹ mí to homẹkẹndo e te?’+
To whenuena e yindọ yẹnlọsu wẹ yin adọ̀ nuhahun lọ tọn.
29 Obu ni di mì na ohí lọ tọn wutu,+Na ohí wẹ yè do nọ sayana mẹhe ṣinuwa lẹ;Mìwlẹ ni yọnẹn dọ whẹdatọ de tin.”+
Nudọnamẹ Odò Tọn
^ Kavi “zùn.”
^ Kavi “Hẹnnumẹ.”
^ To paa mẹ, “visunnu adọ̀ ṣie mẹ tọn lẹ,” enẹ wẹ, adọ̀ he mẹ n’yin jiji sọn (adọ̀ onọ̀ ṣie tọn).
^ To paa mẹ, “Bo ma tindo pekọ to agbasalan ṣie mẹ?”
^ Kavi “mẹflitọ.”
^ To paa mẹ, “kọ́gudu.”
^ Kavi “Ayi ṣie lẹ ko gbẹ́ azọ́n to ohò ṣie mẹ.”
