Luku 23:1-56
23 Enẹwutu, gbẹtọgun lọ, yèdọ yemẹpo fọ́n bo plan ẹn yì Pilati dè.+
2 To whenẹnu, yé jẹ whẹsadokọna ẹn ji,+ bo to didọmọ: “Mí mọ dawe ehe bọ e to gufinfọn hẹnwa akọta mítọn mẹ, bo to gbigbẹ́ dọ yè ma dona na tòkuẹ hlan Sesali,+ bosọ to didọ dọ ewọ wẹ Klisti ahọlu lọ.”+
3 Todin, Pilati kanse e dọmọ: “Be hiẹ wẹ Ahọlu Ju lẹ tọn ya?” E sọ gblọn dọmọ: “Hiẹ lọsu wẹ dọ ẹ.”+
4 To whenẹnu, Pilati dọna yẹwhenọgán lẹ po gbẹtọgun lọ lẹ po dọmọ: “Yẹn ma mọ sẹ́nhẹngba de to dawe ehe mẹ.”+
5 Ṣigba, yé tẹkudeji dọmọ: “E nọ hẹn gbẹtọ lẹ fọnadán gbọn nupinplọnmẹ lẹdo Jude lẹpo pé dali, yèdọ bẹsọn Galili kaka wáfi.”
6 To whenue Pilati sè enẹ, e kanse eyin Galilinu de wẹ dawe lọ.
7 To whenue e ko họnwun dọ aṣẹpipa Hẹlọdi* tọn glọ wẹ e wá sọn,+ e do e hlan Hẹlọdi dè, mẹhe ewọ lọsu tin to Jelusalẹm to azán enẹlẹ gbè.
8 To whenue Hẹlọdi mọ Jesu, e jaya tlala. Na sọn ojlẹ de mẹ gbọ́n wẹ e ko to jijlo nado mọ Jesu, na e ko sè nususu gando e go wutu,+ podọ e tindo todido nado mọ ohia etọn delẹ.
9 Enẹwutu, e jẹ nususu kanbiọ ẹ ji, ṣigba e ma gblọn nude na ẹn.+
10 Etomọṣo, yẹwhenọgán lẹ po wekantọ lẹ po to finfọnṣite mapote bo to whẹsadokọna ẹn sinsinyẹn.
11 To whenẹnu, Hẹlọdi po awhànfuntọ etọn lẹ po ṣàn ẹn kò,+ podọ e yí i do davlẹ+ gbọn awù dagbedagbe de didona ẹn dali bo gọ̀ ẹ dohlan Pilati dè.
12 Hẹlọdi po Pilati po lẹzun họntọn hẹ yedelẹ to azán enẹ gbè, na okẹ̀n mẹ wẹ yé te dai.
13 Enẹgodo, Pilati ylọ yẹwhenọgán lẹ, ogán lẹ po gbẹtọ lẹ po pli
14 bo dọna yé dọmọ: “Mì hẹn dawe ehe wá dè e taidi mẹhe to gbẹtọ lẹ sisẹ́ nado fọngu. Todin, mì pọ́n! yẹn dindona ẹn to mì nukọn ṣigba bo ma mọ dodonu de na owhẹ̀ he mì to sisadokọna dawe ehe.+
15 Na nugbo tọn, mọjanwẹ Hẹlọdi lọsu ma mọ owhẹ̀ de dokọna ẹn do niyẹn, na e gọ̀ ẹ dohlan mí, podọ mì pọ́n! e ma ko wà nudepope he jẹna okú.
16 Enẹwutu, yẹn na sayana ẹn+ bo tún in dote.”
17 *——
18 Ṣigba, gbẹtọgun lọ lẹpo dawhá jẹgbonu dọmọ: “Hù dawe ehe,* bo tún Balabas dote na mí!”+
19 (Dawe ehe ko yin zizedo gànpamẹ na gufinfọn de he ko wá aimẹ to tòdaho lọ mẹ podọ na hlọnhuhu wutu.)
20 Whladopo dogọ, Pilati dọhona yé, na e jlo nado tún Jesu dote wutu.+
21 Whenẹnu, yé jẹ awhádo ji, bo to didọmọ: “Ewọ ni yin hùhù do pòtin ji! Ewọ ni yin hùhù do pòtin ji!”+
22 E dọna yé whla atọ̀ntọ dọmọ: “Etẹwutu? Oylan tẹwẹ dawe ehe ka wà taun? Yẹn ma mọ nudepope he jẹna okú to ewọ mẹ; enẹwutu yẹn na sayana ẹn bo tún in dote.”
23 Whenẹnu, yé sọ tẹkudeji, bo yí ogbè lélé do biọ dọ ewọ ni yin hùhù,* ogbè yetọn sọ duto e ji.+
24 Enẹwutu, Pilati basi dide dọ yè ni yinuwa sọgbe hẹ obiọ yetọn.
25 E tún dawe he yé to bibiọ lọ dote, yèdọ mẹhe ko yin zizedo gànpamẹ na gufinfọn po hlọnhuhu po wutu, ṣigba e ze Jesu do alọmẹ na yé sọgbe hẹ ojlo yetọn.
26 Todin, dile yé plan ẹn jei, yé wle Simọni Silene tọn, he gọ̀ sọn glètoho mẹ, yé sọ didá ẹ yatin* lọ nado hẹn ẹn hodo Jesu.+
27 Gbẹtọgun daho de sọ to hihodo e, gọna yọnnu he to awubla bosọ to avihàndo na ẹn lẹ.
28 Jesu lẹhlan yọnnu lọ lẹ bo dọmọ: “Viyọnnu Jelusalẹm tọn lẹ emi, mì viavi na mi ba blo. Kakatimọ, mì viavi na mìde podọ na ovi mìtọn lẹ;+
29 na mì pọ́n! azán lẹ ja whenue gbẹtọ lẹ na dọmọ, ‘Ayajẹnọ wẹ yọnnu wẹnsinọ lẹ, adọ̀ he ma jivi lẹ po anọ́ he yè ma nọ́ pọ́n lẹ po!’+
30 To whenẹnu, yé na jẹ didọna osó lẹ ji dọ, ‘Mì họ́ jẹ mí ji!’ podọ na okọ́ta lẹ dọ, ‘Mì ṣinyọ́n mí ji!’+
31 Eyin yé wà onú ehelẹ to whenue atin lọ to omú, etẹwẹ na jọ to whenue e hú?”
32 Yè sọ plan sunnu awe devo lẹ, he yin sẹ́nhẹngbatọ lẹ yì nado yin hùhù dopọ hẹ ẹ.+
33 Podọ to whenue yé jẹ fihe nọ yin Taká,+ finẹ wẹ yé whè e do pòtin go te dopọ hẹ sẹ́nhẹngbatọ lọ lẹ, dopo to adusi etọn mẹ podọ awetọ to amiyọn etọn mẹ.+
34 Ṣigba, Jesu to didọmọ: “Otọ́, jona yé, na yé ma yọ́n nuhe wà yé te.” Humọ, yé de ovò nado má awù etọn lẹ.+
35 Gbẹtọ lẹ sọ to ote bo to nupọn. Ṣigba, ogán lẹ to awọnlín-yẹ́n bo to didọmọ: “E whlẹn mẹdevo lẹ gán; gbọ e ni whlẹn ede gán, eyin ewọ wẹ Klisti Jiwheyẹwhe tọn, Mẹdide lọ.”+
36 Awhànfuntọ lẹ lọsu yí i do davlẹ, bo dọnsẹpọ bosọ na ẹn ovẹn vẹsin+
37 bo dọmọ: “Eyin hiẹ wẹ Ahọlu Ju lẹ tọn, whlẹn dewe gán.”
38 Nukinkan de sọ tin to aga na ẹn dọmọ: “Ahọlu Ju lẹ tọn lọ die.”+
39 Enẹgodo, dopo to sẹ́nhẹngbatọ he yin piplado núgo to finẹ lẹ mẹ jẹ zunzun in ji+ dọmọ: “Hiẹ wẹ Klisti lọ, kavi e ma yin mọ wẹ? Whlẹn dewe po mílọsu po!”
40 Omẹ awetọ gblọn bo gbẹnuna ẹn dọmọ: “Be hiẹ ma dibusi Jiwheyẹwhe paali wẹ, todin he hiẹ ko mọ whẹdida dopolọ yí?
41 Sọgbe hẹ whẹdida dodo, míwlẹ to nuhe jẹna nuhe mí wà mọyi; ṣigba dawe ehe ma wà oylan de.”
42 Enẹgodo, e dọmọ: “Jesu, flin mi whenue hiẹ na biọ Ahọluduta towe mẹ.”+
43 Ewọ sọ dọna ẹn dọmọ: “Nugbo wẹ yẹn dọna we to egbé, hiẹ na tin hẹ mi to Paladisi mẹ.”+
44 Todin, nudi gànhiho ṣidopotọ* mẹ wẹ, ṣogan zinvlu ṣinyọ́n aigba lọ lẹpo ji kakajẹ gànhiho ṣinẹnẹtọ* mẹ,+
45 na owhè ma na hinhọ́n wutu; to whenẹnu avọ̀ he gbò fiwiwe lọ+ tlẹ́n sọn aga wá odò to ṣẹnṣẹn.+
46 Jesu sọ dawhá po ogbè lélé po dọmọ: “Otọ́, alọ towe mẹ wẹ yẹn jo gbigbọ ṣie do.”+ Whenue e ko dọ ehe godo, gbigbọ etọn ṣí.*+
47 Na mẹkanwekowhàngán lọ mọ nuhe ko jọ lọ wutu, e jẹ gigopana Jiwheyẹwhe ji, dọmọ: “Na nugbo tọn, dodonọ de wẹ dawe ehe.”+
48 Podọ to whenue gbẹtọgun lọ lẹpo he pli dopọ to finẹ na nujijọ ehe mọ nuhe jọ lọ lẹ, yé lẹkọyi whé, bo to akọ́nnu yetọn hò na awubla wutu.
49 Mẹhe yọ́n ẹn lẹpo sọ to ote to olá. Podọ yọnnu he ko hodo e sọn Galili wá lẹ to finẹ bo mọ onú ehelẹ.+
50 Podọ pọ́n! dawe de tin he nọ yin Josẹfu, yèdọ hagbẹ Tòwedegbẹ́* lọ tọn de, he yin mẹdagbe podọ dodonọ de.+
51 (Dawe ehe ma blavo nado nọgodona ayikinkan po nuyiwa yetọn po.) Ewọ wá sọn Alimate, yèdọ tòdaho omẹ Jude tọn lẹ tọn de mẹ, bo to tenọpọn Ahọluduta Jiwheyẹwhe tọn.
52 Dawe ehe yì Pilati dè bo biọ oṣiọ Jesu tọn.
53 Ewọ sọ ze e jẹte+ bo blá ẹ do alavọ dagbedagbe mẹ bosọ tẹ́ ẹ do yọdò* he yin kùnkùn do osé mẹ de mẹ,+ fie mẹdepope ma ko yin titẹ́ do pọ́n.
54 Todin, azán Awuwle* tọn gbè wẹ,+ bọ Gbọjẹzan+ ko dibla bẹjẹeji.
55 Ṣigba, yọnnu he hodo e sọn Galili wá lọ lẹ lọsu yì pọ́n yọdò* lọ bo mọ lehe oṣiọ etọn yin titẹ́ do,+
56 yé sọ lẹkọyi nado wleawuna nuwhẹ́nkun lẹ po amisisa owán gblingblinnọ lẹ po. Ṣigba, na taun tọn, yé gbọjẹ to Gbọjẹzangbe+ sọgbe hẹ gbedide lọ.
Nudọnamẹ Odò Tọn
^ To paa mẹ, “De ewọ sẹ̀ sọn aimẹ.”
^ Kavi “hùhù do pòtin ji.”
^ Enẹ wẹ, nudi ogàn 12 whèmẹ tọn.
^ Enẹ wẹ, nudi ogàn 3 whèmẹ tọn.
^ Kavi “e gbọ gbigbọ etọn godo tọn.”
^ Kavi “yọdò oflin tọn.”
^ Kavi “yọdò oflin tọn.”
