Matiu 19:1-30
19 To whenue Jesu ko dotana ohó ehelẹ, e tọ́n sọn Galili bo wá dogbó Jude tọn lẹ ji to Jọdani godo.+
2 Podọ gbẹtọgun daho lẹ hodo e, bọ e hẹnazọ̀ngbọna yé to finẹ.
3 Falesi lẹ sọ wá e dè, po linlẹn lọ po nado whlé e pọ́n bo kanse e dọmọ: “Be e sọgbe hẹ osẹ́n na sunnu de nado gbẹ́ asi etọn dai na whẹwhinwhẹ́n depope poun wutu ya?”+
4 E gblọn dọmọ: “Be mìwlẹ ma ko hia dọ mẹhe dá yé sọn bẹjẹeji basi yé sunnu de yọnnu de+
5 bosọ dọ: ‘Na whẹwhinwhẹ́n ehe wutu, sunnu na jo otọ́ etọn po onọ̀ etọn po do bo na sẹbọdo asi etọn go, bọ yé omẹ awe lẹ na lẹzun agbasalan dopo’ ya?+
6 Sọmọ bọ yé masọ yin agbasalan awe ba, adavo dopo. Enẹwutu, nuhe Jiwheyẹwhe ko kọndopọ,* mì dike mẹde klan ẹn blo.”+
7 Yé dọna ẹn dọmọ: “To whelọnu lo, naegbọn Mose do nagbè nado nọ na owe gbẹdai tọn de bo gbẹ́ ẹ dai?”+
8 E dọna yé dọmọ: “Na ahun sinsinyẹn mìtọn wutu wẹ Mose do yigbena mì nado nọ gbẹ́ asi mìtọn lẹ dai,+ ṣigba e ma to mọ sọn bẹjẹeji gba.+
9 Yẹn dọna mì dọ mẹdepope he gbẹ́ asi etọn dai bọ e ma yin na whẹwhinwhẹ́n fẹnnuwiwa zanhẹmẹ tọn* wutu, bo wlealọ hẹ devo, e deayọ.”+
10 Devi lẹ dọna ẹn dọmọ: “Eyin mọ wẹ whẹho lọ na sunnu de po asi etọn po, be e ma yin nuyọnẹnnu nado wlealọ.”
11 E dọna yé dọmọ: “E ma yin mẹlẹpo wẹ nọ natẹn ehe to gbẹzan yetọn mẹ gba, adavo mẹhe tindo nunina lọ lẹ kẹdẹ.+
12 Na ojọ̀ delẹ tin he yin jiji domọ, ojọ̀ delẹ sọ tin he yin hinhẹn zun ojọ̀ gbọn gbẹtọ lẹ dali, podọ ojọ̀ devo lẹ tin he hẹn yede zun ojọ̀, na Ahọluduta olọn tọn wutu. Mì gbọ mẹhe sọgan natẹn ehe ni natẹn ẹn.”+
13 To enẹgodo, yọpọvu lẹ yin hinhẹnwa e dè, na e nido sọgan ze alọ etọn lẹ do yé ji bo hodẹ̀, amọ́ devi lẹ gbẹnuna yé.+
14 To whenẹnu, Jesu dọmọ: “Mì jo yọpọvu lẹ do, mì sọ tẹnpọn nado glọnalina yé nado wá dè e ba blo, na omẹ mọnkọtọn lẹ wẹ Ahọluduta olọn tọn tin na.”+
15 Podọ e ze alọ etọn lẹ do yé ji bosọ yì sọn finẹ.
16 Todin, pọ́n! dawe de wá e dè bo dọmọ: “Mẹplọntọ, nudagbe tẹwẹ yẹn dona wà nado sọgan mọ ogbẹ̀ madopodo?”+
17 E gblọnna ẹn dọmọ: “Naegbọn hiẹ do to hokanse mi gando nuhe yin dagbe go? Mẹdopo wẹ yin mẹdagbe.+ Ṣigba, eyin hiẹ jlo na biọ ogbẹ̀ mẹ, nọ yìn gbedide lẹ to whepoponu.”+
18 E dọna ẹn dọmọ: “Detẹ lẹ wẹ?” Jesu dọmọ: “Hiẹ ma dona hùhlọ̀n,+ hiẹ ma dona deayọ,+ hiẹ ma dona fìnnú,+ hiẹ ma dona dekunnu lalo,+
19 gbògbéna otọ́ towe po onọ̀ towe po,+ podọ hiẹ dona yiwanna kọmẹnu towe di dewe.”+
20 Dẹpẹ lọ dọna ẹn dọmọ: “Yẹn ko nọ yìn onú ehe lẹpo; etẹwẹ gbẹsọ pò na mi?”
21 Jesu dọna ẹn dọmọ: “Eyin hiẹ jlo nado yin pipé,* yì sà nutindo towe lẹ bo na wamọnọ lẹ, a nasọ tindo adọkun to olọn mẹ;+ enẹgodo wá bo lẹzun hodotọ ṣie.”+
22 To whenue dẹpẹ lọ sè ehe, e dedo po awubla po, na e tindo adọkunnu susu wutu.+
23 Whenẹnu, Jesu dọna devi etọn lẹ dọmọ: “Nugbo wẹ yẹn dọna mì dọ, e na vẹawuna adọkunnọ de nado biọ Ahọluduta olọn tọn mẹ.+
24 Humọ, yẹn dọna mì dọ, e bọawuna kanklosọ́ de nado gbọn onù yẹnvi tọn mẹ hú na adọkunnọ de nado biọ Ahọluduta Jiwheyẹwhe tọn mẹ.”+
25 To whenue devi lẹ sè enẹ, e paṣa yé tlala, bọ yé dọmọ: “Mẹnu wẹ sọgan yin whinwhlẹngán na taun tọn?”+
26 Jesu pọ́n yé tlintlin bo dọna yé dọmọ: “Gbẹtọ lẹ wẹ ehe ma yọnbasi na, ṣigba nulẹpo wẹ yọnbasi na Jiwheyẹwhe.”+
27 To whenẹnu, Pita gblọn dọmọ: “Pọ́n! Míwlẹ ko jo nulẹpo do bo hodo we; todin etẹwẹ mí na mọyi sọn e mẹ taun?”+
28 Jesu dọna yé dọmọ: “Nugbo wẹ yẹn dọna mì dọ, to whenuena Visunnu gbẹtọ tọn na sinai to ofìn gigonọ etọn ji to ojlẹ nulẹ hinhẹn jẹ yọyọ tọn* whenu, mì mẹhe ko hodo mi lẹ na sinai do ofìn 12 ji, bo na to whẹdana hẹnnu 12 Islaeli tọn lẹ.+
29 Podọ mẹdepope he jo owhé lẹ do kavi nọvisunnu lẹ kavi nọviyọnnu lẹ kavi otọ́ kavi onọ̀ kavi ovi lẹ kavi aigba lẹ na oyín ṣie tọn wutu, na mọyi do donu kanweko ji bo nasọ dugu ogbẹ̀ madopodo tọn.+
30 “Ṣigba, mẹsusu he yin tintan na lẹzun godotọ, podọ godotọ na lẹzun tintan.+
Nudọnamẹ Odò Tọn
^ To paa mẹ, “ko hẹn biọ zẹgẹ dopolọ glọ.”
^ Kavi “gigọ́.”
^ To paa mẹ, “nulẹ vivọ́-dá tọn.”
