MÌ NỌ TO AṢEJI!
Nujijọ He Hẹnmẹ Jẹflumẹ to 2022 Lẹ—Etẹ Biblu Dọ Gando Yé Go?
To 2022, linlin awhàn, nuhahun akuẹ ma mọ zan tọn po nugbajẹmẹji tọn lẹ po wẹ mí nọ to sisè mapote. Biblu kẹdẹ wẹ dọ nue nujijọ ehelẹ zẹẹmẹdo taun.
Zẹẹmẹ nujijọ he wá aimẹ to 2022 lẹ tọn
Nujijọ he wá aimẹ to owhe he wayi mẹ lẹ dohia dọ mí to gbẹnọ to ojlẹ he Biblu ylọdọ “azán godo tọn lẹ” mẹ nugbo. (2 Timoti 3:1) Ojlẹ enẹ bẹjẹeji to 1914. Pọ́n lehe nujijọ agọe tọn lẹ sọgbe hẹ nue Biblu dọ e na jọ to ojlẹ mítọn mẹ lẹ do:
“Awhàn.”—Matiu 24:6.
“Owhe 2022 tọn mẹ wẹ awhàn sọ wá aimẹ te to Europe.” a
Hia hosọ lọ “Russie Tọ́nawhàn Ukraine.”
“Núdùdù whèdomẹ.”—Matiu 24:7.
“Huvẹ sinsinyẹn wá aimẹ to 2022.” b
Hia hosọ lọ “Awhàn Ukraine Tọn Yidogọna Núdùdù Whèdomẹ.”
“Azọ̀nylankan.”—Luku 21:11.
“Mẹlẹ sọ gọ̀ jẹ plibọzọ̀n jẹ ji bọ aigbanú-asu sọ hẹn nuhahun susu wá dile azọ̀n COVID-19 tọn zindonukọn bo to nuhẹngble. Ninọmẹ ehe dohia hezeheze dọ azọ̀n bẹplamẹ lẹ yin owùnu bosọ dohuhlọn do gbẹtọvi lẹ ji.” c
Hia hosọ lọ “COVID-19 Ko Hù Gbẹtọ Livi 6.”
“Nujijọ dobu lẹ.”—Luku 21:11.
“Yozò sinsinyẹn po akúdido po hẹnnugble podọ zungbo lẹ jimiyọ́n bọ otọ̀ sọ gbà mẹlẹ. E họnwun dọ mẹlẹ na nọ flin alunlun 2022 tọn na ninọmẹ aimẹ tọn sinsinyẹn lẹ hẹnnugble taun bo hù gbẹtọ fọtọ́n susu lẹ, podọ gbẹtọ livi susu wẹ họ̀njẹgbé lẹdo aihọn pé.” d
Hia hosọ lọ “Yozò Sinyẹn Taun to Ogbẹ̀ lọ mẹ.”
“Bẹwlu [kavi “hunyanhunyan; zingidi,” nudọnamẹ odò tọn.].”—Luku 21:9.
“Mẹlẹ to homẹgble gando nuhahun akuẹ ma mọ zan tọn lẹ go, titengbe na nue dù ahivivẹ nulẹ tọn, enẹwutu whlasusu wẹ yé fọngu do tohọluduta lẹ ji to 2022.” e
Hia hosọ lọ “Nulẹ Fọ́n bo to Ahivẹ Lẹdo Aihọn Pé.”
Etẹwẹ na jọ to owhe he ja?
Mẹde ma gán dọ nue na jọ to 2023 lẹ po nujikudo po. Amọ́, nue mí yọnẹn wẹ yindọ to madẹnmẹ, Ahọluduta Jiwheyẹwhe tọn enẹ wẹ gandudu olọn mẹ tọn de na hẹn diọdo susu wá aigba ji. (Daniẹli 2:44) Gandudu enẹ na de nue nọ zọ́n bọ gbẹtọvi lẹ nọ jiya lẹ sẹ̀ bo na hẹn ẹn diun dọ ojlo Jiwheyẹwhe tọn yin wiwà to aigba ji.—Matiu 6:9, 10.
Mí vẹ̀ we dọ a ni hodo ayinamẹ Jesu Klisti tọn bo “gbọṣi nukle” gando lehe nujijọ aihọn tọn lẹ to dọdai Biblu tọn lẹ hẹndi do go. (Malku 13:37) Jaale bo dọho hẹ mí nado plọn nususu dogọ gando lehe Biblu gán gọalọna we do todin go gọna lehe e gán na hiẹ po whẹndo towe po sọgodo dagbe de do.
a Sọgbe hẹ linlin AP tọn, Jill Lawless dọ to 8 décembre 2022 dọ “Owhe 2022 tọn mẹ wẹ awhàn sọ wá aimẹ te to Europe.”
b Tito Núdùdù Mimá Lẹdo Aihọn Pé Tọn, “Núdùdù Whèdomẹ Lẹdo Aihọn Pé.”
c Tito Agbasalilo Tọn JAMA Tọn, “Gbẹninọ to Ojlẹ Azọ̀n Bẹplamẹ Tọn lẹ Mẹ—COVID-19, Aigbanú-asu, Plibọzọ̀n po Azọ̀n Madonukun po” gbayipe, wẹ Lawrence O. Gostin, JD dọ to 22 septembre 2022.
d Nọtẹn Intẹnẹt tọn Earth.Org tọn, “Etẹwẹ to Godo Na Ninọmẹ Aimẹ Tọn Sinsinyẹn He Wá Aimẹ to Alunlun 2022 Tọn Mẹ?” ji wẹ Martina Igini dọhodo to 24 octobre 2022.
e Pipli He Nọ Bayi Nunina Nado Nọgodona Jijọho Lẹdo Aihọn Pé, “Nuhahun Akuẹ Ma Mọ Zan Tọn Do Homẹgble Na Gbẹtọ lẹ bọ Yé Fọngu Lẹdo Aihọn Pé to 2022,” wẹ Thomas Carothers po Benjamin Feldman po dọ to 8 décembre 2022.
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Etẹwẹ Yin Ohia “Azán Godo Tọn lẹ,” Kavi ‘Ojlẹ Opodo Tọn’ lọ Tọn?
Biblu basi zẹẹmẹ nujijọ po ninọmẹ delẹ po tọn he na dohiagona azán godo tọn lẹ.
ATỌ̀HỌ̀-NUHIHỌ́ LỌ TỌN
Jiwheyẹwhe Na Doalọtena Yajiji Lẹpo to Madẹnmẹ
Nawẹ mí wagbọn do yọnẹn dọ Jiwheyẹwhe na yinuwa to madẹnmẹ nado de yajiji po mawadodo lẹpo po sẹ̀?
NUPLỌNMẸ TANGAN BIBLU TỌN LẸ
Etẹwẹ Ahọluduta Jiwheyẹwhe Tọn Yin?
Ahọluduta Jiwheyẹwhe tọn ji wẹ Jesu dọhodo hugan to lizọnyizọn etọn whenu. Na owhe susu lẹ, hodotọ etọn lẹ nọ hodẹ̀ dọ Ahọluduta enẹ ni wá.
NUPLỌNMẸ TANGAN BIBLU TỌN LẸ
Ahọluduta Jiwheyẹwhe Tọn Jẹ Gandu Ji to 1914
To owhe 2 600 linlán die, Jiwheyẹwhe gbọdo ahọlu huhlọnnọ de nado kudlọ dọdai de tọn he to hẹndi mọ to alọnu.
HOSỌ DEVO LẸ
Todido Tin Dọ Osọ Na Yọ́n
Naegbọn opagbe he to Biblu mẹ lẹ gbọnvo taun na opà he gbẹtọvi lẹ nọ do gọna nue yé nọ dọ dọ e na wá jọ lẹ?
YỌ́N MÍ DOGỌ
Biọ Dọ Kunnudetọ de Ni Wá Dla We Pọ́n
Dọhodo kanbiọ sinai do Biblu ji de ji, kavi plọnnu dogọ gando Kunnudetọ Jehovah tọn lẹ go.
