To linlin juin 2022 tọn de mẹ, azinponọ Akuẹsẹdotẹn Aihọn tọn na avase dọ: “Lee ninọmẹ akuẹzinzan tọn aihọn lọ tọn te ma yọ́n paali. Nulẹ fọ́n bo to ahivẹ po awuyiya po, podọ to ojlẹ dopolọ mẹ mẹlẹ ma do akuẹ sọmọ nado zan.”

 “Amì po núdùdù po to akuẹ yí po awuyiya po, podọ ehe ko hẹnnugblena mẹlẹ to otò he ma do adọkun sọmọ lẹ mẹ” wẹ Fonds monétaire international dọ.

 Biblu gọalọna mí nado yọ́n nuhewutu mí to pipehẹ nuhahun akuẹzinzan tọn mọnkọ lẹ, lehe mí gán doakọnna yé do, gọna todido lọ dọ pọngbọ tẹgbẹ tọn de tin.

•   Biblu ylọ ojlẹ he mẹ mí to gbẹ̀nọ te dọ “azán godo tọn lẹ.”—2 Timoti 3:1.

•   Jesu dọ dọ “nujijọ dobu lẹ” kavi nue na gbàhundonamẹ lẹ na dohiagona ojlẹ he mẹ mí te. (Luku 21:11) Nulẹ he fọ́n bo to ahivẹ to budona mẹlẹ. Gbẹtọ lẹ to nuhà gando sọgodo yetọn go, gọna lehe yé na penukundo whẹndo yetọn go do.

•   Owe Osọhia tọn dọ dọdai dọ núdùdù na yíkuẹ to ojlẹ mítọn mẹ. E dọmọ: “N’sè ogbè de dọnú sọn mẹdida ẹnẹ lẹ ṣẹnṣẹn, bo dọ: . . . ‘Jinukun kilo atọ̀n wẹ yè nọ yí azọ́nkuẹ gbèdopo tọn blebu do họ̀.’”—Osọhia 6:6, Mawuhowema Fọngbe tọn.

 Eyin a jlo na yọ́n nususu gando azán godo tọn lẹ po dọdai he to owe Osọhia tọn mẹ po go, pọ́n video lọ Ninọmẹ Aihọn Tọn Diọ sọn 1914 bosọ hia hosọ lọ “Osọ́-Kùntọ Ẹnẹ lọ lẹ—Mẹnu Wẹ Yé Yin?”

•   “Yé na gbá ohọ̀ lẹ bo nasọ nọ nọ̀ yé mẹ, yé na do vẹngle lẹ bo nasọ nọ dù sinsẹ́n yetọn. Yé ma na gbá bọ mẹdevo na wá nọ e mẹ, mọ yé ma na do bọ mẹdevo na wá dù.”—Isaia 65:21, 22.

•   “Jinukun susugege na tin to aigba ji; e na gọfla to osó lẹ ji aga.”—Salmu lẹ 72:16.

•   “‘Na yè to kọgbidina mẹhe to yaji lẹ wutu, podọ na azọ̀nwinwẹn wamọnọ lẹ tọn wutu, yẹn na fọ́n bo yinuwa,’ wẹ Jehovah dọ.”—Salmu lẹ 12:5. a

 To madẹnmẹ, Jiwheyẹwhe na hẹn nuhahun akuẹ ma mọ zan tọn wá opodo, e ma yin to otò dopo gee mẹ, amọ́ lẹdo aihọn pé. Eyin a jlo na yọ́n lehe enẹ na yọnbasi do, hia hosọ lọ “Be Nuhahun Akuẹ Ma Mọ Zan Tọn Na Wá Pọnte Ya?”

 Amọ́ etlẹ yin todin, Biblu gán gọalọna we nado pehẹ ahivivẹ nulẹ tọn. Gbọnna? E bẹ ayinamẹ dagbe lẹ hẹn he gán gọalọna we nado yọ́n akuẹ zan. (Howhinwhẹn lẹ 23:4, 5; Yẹwhehodọtọ 7:12) Eyin a jlo na plọnnu dogọ, hia hosọ lọ lẹ “Dowéna Akuẹ bo Ylọ Azọ́n Dọ Nujọnu” po “Lehe A Gán Dowéna Akuẹ Do” po.