To owhe dopodopo mẹ, aigba sisọsisọ fọtọ́n susu lẹ wẹ nọ wá aimẹ. Dile etlẹ yindọ suhugan aigba sisọsisọ lẹ tọn ma nọ sinyẹn sọmọ, aigba sisọsisọ daho lẹ nọ hẹnnugble taun bo nọ dekọtọn do yajiji po okú po mẹ. To whedelẹnu, aigba sisọsisọ mọnkọ lẹ nọ hẹn tsunami he nọ hẹnnugble to lẹdo ohù tọn lẹ mẹ wá, bosọ nọ hù susu to mẹhe nọ nọ̀ finẹ lẹ mẹ. Be Biblu dọ dọdai dọ aigba sisọsisọ daho ehelẹ na jọ ya?

To hosọ ehe mẹ

•  Be Biblu dọ dọdai dọ aigba sisọsisọ lẹ na jọ ya?

•  Be aigba sisọsisọ he to jijọ to egbé lẹ hẹn dọdai Biblu tọn di wẹ ya?

•  Etẹwẹ dọdai Biblu tọn he gando aigba sisọsisọ go zẹẹmẹdo na mí?

•  Linlẹn agọ̀ lẹ gando dọdai Biblu tọn po aigba sisọsisọ po go

 Jesu donù aigba sisọsisọ go to dọdai he yin kinkan do Biblu mẹ de mẹ. Pọ́n nuhe e dọ gando aigba sisọsisọ lẹ go to owe Biblu tọn atọ̀n he bọdego lẹ mẹ:

 “Akọta na fọ́n do akọta ji podọ ahọluduta do ahọluduta ji, bọ núdùdù whèdomẹ po aigba sisọsisọ lẹ po na tin sọn fide jẹ fide.”—Matiu 24:7.

 “Akọta na fọ́n do akọta ji podọ ahọluduta do ahọluduta ji; aigba sisọsisọ lẹ na tin sọn fide jẹ fide; núdùdù whèdomẹ nasọ tin.”—Malku 13:8.

 “Aigba sisọsisọ daho lẹ na tin, núdùdù whèdomẹ lẹ po azọ̀nylankan lẹ po na tin sọn fide jẹ fide.”—Luku 21:11.

 Jesu dọ dọdai dọ “aigba sisọsisọ daho lẹ” na tin sọn “fide jẹ fide” to ojlẹ dopolọ he mẹ awhàn, núdùdù whèdomẹ po azọ̀nylankan lẹ po na to nugbà te. To whenue onú ehelẹ na to jijọ to ojlẹ dopolọ mẹ, e na họnwun dọ mí to gbẹnọ to “vivọnu titonu lọ tọn,” kavi “azán godo tọn lẹ” mẹ. (Matiu 24:3; 2 Timoti 3:1) Sọgbe hẹ todohukanji ojlẹ he go Biblu donù lẹ tọn, “azán godo tọn lẹ” bẹjẹeji to 1914 bo ma ko wá vivọnu.

 Mọwẹ. Dọdai Jesu tọn lẹ, kakajẹ dehe e dọ gando aigba sisọsisọ go lẹ ji, sọgbe hẹ nuhe to jijọ to azán mítọn gbè lẹ. Sọn 1914 gbọ́n, aigba sisọsisọ daho he hugan 1 950 wẹ wá aimẹ bo hù gbẹtọ livi awe linlán. a Mí ni pọ́n dehe jọ to owhe kanweko he mẹ mí te ehe delẹ.

 2004—Ohù Inde tọn. Aigba sisọsisọ sinsinyẹn de fọ́n tsunami dote, bọ e gbànú gbọn otò 12 mẹ bo hù gbẹtọ 225 000 nkọ.

 2008—Chine. Aigba sisọsisọ sinsinyẹn de hẹn gbétatò po tòpẹvi delẹ po gble, podọ sọhayinanú de dohia dọ e hù gbẹtọ 90 000 bo gbleawuna gbẹtọ 375 000 nkọ bosọ zọ́n bọ gbẹtọ livi susu ma do adọtẹn ba.

 2010—Haïti. Aigba sisọsisọ sinsinyẹn de gọna dehe ma sinyẹn sọmọ lẹ hù gbẹtọ 300 000 linlán bosọ zọ́n bọ gbẹtọ livi dopo linlán ma do adọtẹn ba.

 2011—Japon. Aigba sisọsisọ sinsinyẹn po tsunami he e hẹnwa lẹ po hù nudi gbẹtọ 18 500, podọ nujijọ lọ zọ́n bọ gbẹtọ kanweko susu lẹ masọ do ohọ̀ to ota ba. Aigba sisọsisọ lọ hẹn maṣinu he to Fukushima bo nọ na miyọn lẹtliki tọn gble bọ maṣinu lọ wú bo hẹn asidan sinsinyẹn wá. Etlẹ yin to owhe ao godo, nudi gbẹtọ 40 000 he sin ohọ̀ sẹpọ maṣinu he nọ na miyọn lẹtliki tọn lọ ma penugo nado lẹkọyi owhé yetọn lẹ gbè na ozi adínọ he to tintọ́n sọn e mẹ wutu.

 Dọdai Biblu tọn he gando aigba sisọsisọ go do nuhe na jọ to madẹnmẹ hia mí. Jesu dọ dọ: “Whenue mì mọ onú ehelẹ to jijọ, mì ni yọnẹn dọ Ahọluduta Jiwheyẹwhe tọn ko sẹpọ.”—Luku 21:31.

 Biblu dohia dọ Ahọluduta Jiwheyẹwhe tọn yin gandudu de he to olọn mẹ bọ Jesu Klisti wẹ yin Ahọlu etọn. Ahọluduta ehe go wẹ Jesu dọna hodotọ etọn lẹ nado nọ hodẹ̀ gando.—Matiu 6:10.

 Whenue Ahọluduta Jiwheyẹwhe tọn na to gandu do aigba ji, Jiwheyẹwhe na doalọtena nugbajẹmẹji jọwamọ tọn lẹ, kakajẹ aigba sisọsisọ lẹ ji bọ yé ma nasọ gbleawunamẹ ba. (Isaia 32:18) Gbọnvona enẹ, e nasọ jla nuhe aigba sisọsisọ egbé tọn lẹ ko hẹngble to mí go lẹpo do. (Isaia 65:17; Osọhia 21:3, 4) Eyin a jlo na yọ́n nudọnamẹ devo lẹ dogọ, hia hosọ lọ “Etẹwẹ Ahọluduta Jiwheyẹwhe Tọn Na Wà?”