Akuẹ he yin vivà do awhànzọ́n mẹ lẹdo aihọn pé ko yì dọla Amelika tọn liva fọtọ́n donu awe linlán to 2022, ehe ma ko jọ pọ́n to whenuho mẹ. Awhàn he Russie tọ́n Ukraine wẹ na ko zọ́n taun bọ akuẹ lọ do yiaga sọmọ. Linlin de he azọ́nwhé Institut International de Recherche Sur la Paix de Stockholm (SIPRI) na to avril 2023, dohia dọ to owhe 2022 gblamẹ:

•    Akuẹ he yin vivà do awhàn mẹ to Europe “jideji yì 13 to kanweko ji to owhe lọ gblamẹ, yèdọ akuẹ he nkọ ma ko yin zinzan pọ́n to owhe dopo mẹ to Europe sọn whenue awhàn nuglọ tọn wá vivọnu to 1991.”

•    “Russie … hẹn akuẹ he e nọ zan (do awhàn mẹ) jideji yì nudi 9 e lán 2 to kanweko ji, ehe zọ́n bọ ewọ he yin otò 5tọ he nọ zan-kuẹ hugan to aihọn lọ mẹ dai, wá jẹ otẹn 3tọ mẹ.”

•    États-Unis wẹ yin tọ́ntlọ́ngbọ́n to akuẹ vivà do awhànzọ́n mẹ, “na akuẹzinzan yetọn ko hugan mado-atọ̀n akuẹ he nọ yin zinzan do awhàn mẹ lẹdo aihọn pé lẹpo tọn.”

 “Akuẹ susu he to yinyin vivà do awhànzọ́n mẹ lẹdo aihọn pé to owhe agọe tọn lẹ mẹ dohia dọ aihọn he mẹ hihọ́ fọ́n bo to hinhán te de mẹ wẹ mí to gbẹnọ te,” wẹ Weyọnẹntọ Nan Tian he yin dopo to mẹhe nọ wleawuna linlin SIPRI tọn lẹ mẹ dọ.

 Biblu ko dọ dọdai nudindọn he fọ́n bo to sinsinyẹn deji to gandudu huhlọnnọ lẹ ṣẹnṣẹn to egbehe tọn, bosọ dọ onú dopo gee he gán hẹn jijọho wá lọ.

•    Biblu ylọ ojlẹ he mẹ mí to gbẹnọ te dọ ‘ojlẹ opodo tọn.’—Daniẹli 8:19.

•    Owe Daniẹli tọn dọ dọdai dọ to ojlẹ enẹ mẹ, otò huhlọnnọ lẹ na whlẹnagbà hẹ yede. Gandudu huhlọnnọ enẹlẹ na ‘sisẹ́’ ode awetọ, enẹ wẹ yindọ yé na jlẹ́te hẹ yede nado do mẹhe dohuhlọn hugan to aihọn lọ mẹ hia. Podọ yé na zan “adọkunnu” susugege kavi akuẹ he yinukunkẹ do awhàn enẹlẹ tamẹ.—Daniẹli 11:40, 42, 43.

 Eyin a jlo na yọ́n nususu dogọ gando dọdai Biblu tọn ayidego tọn enẹ go, pọ́n video he hosọ etọn yin Dọdai de He Mọ Hẹndi—Daniẹli Weta 11.

•    Biblu dọ dọ Jiwheyẹwhe na yí gandudu devo do diọtẹnna gandudu gbẹtọvi tọn lẹ. Ewọ “na ze ahọluduta de dai he ma na yin vivasudo gbede. Ahọluduta ehe ma nasọ yin jijodo na akọta devo depope. E na gídí ahọluduta ehe lẹpo bo na hẹn yé wá opodo, bọ ewọ kẹdẹ wẹ na nọte kakadoi.”—Daniẹli 2:44.

•    To madẹnmẹ, Jehovah a Jiwheyẹwhe na wà nuhe e glo gbẹtọvi lẹ nado wà, enẹ wẹ nado hẹn jijọho nujọnu tọn he na dẹn-to-aimẹ wá. Nawẹ ewọ na wà enẹ gbọn? Gandudu etọn, yèdọ Ahọluduta olọn mẹ tọn etọn na de awhànfunnu lẹpo sẹ̀ sọn aimẹ bo doalọtena danuwiwa mlẹnmlẹn.—Salmu lẹ 46:8, 9.

 Eyin a jlo na yọ́n nususu dogọ gando nuhe Ahọluduta Jiwheyẹwhe tọn na wá wà lẹ go, hia hosọ lọ “‘Jijọho Na Sudeji’ to Ahọluduta Jiwheyẹwhe Tọn Glọ.”