Be Nuhe Biblu Dọ Gando Dagbe po Oylan po Go Gbẹ́ Sọgbe Ya?
Mẹsusu etlẹ yin delẹ to mẹhe nọ ylọ yede dọ Klistiani lẹ mẹ wẹ nọ mọdọ nue Biblu dọ gando zanhẹmẹ po alọwle po go lẹ ko dohó. Na ṣọsi delẹ jlo na yinuwa sọgbe hẹ ninọmẹ aihọn lọ tọn lẹ wutu, yé ko diọ nue yé nọ plọnmẹ gando walọ dagbe po ylankan po go lẹ. Be nuhe Biblu dọ gando dagbe po oylan po go gbẹ́ sọgbe ya? Gbau. Lee mí wagbọn do yọnẹn die.
Gbẹtọ lẹ do hudo anademẹ Jiwheyẹwhe tọn gando dagbe po oylan po go
Gbẹtọvi lẹ yin didá nado nọ ganjẹ anademẹ Mẹdatọ lọ tọn lẹ go. Biblu dọ dọ: “E ma tin to huhlọn mẹhe to zọnlinzin tọn mẹ nado deanana afọdide etọn lẹ.” (Jelemia 10:23) Nugbo wẹ dọ Jehovah a Jiwheyẹwhe dá mí po nugopipe lọ po nado nọ bayi nudide lẹ, amọ́ e ma na mí aṣẹ kavi nugopipe lọ nado magbe nue yin dagbe po oylan po tọn na míde. Enẹwutu, e jlo dọ mí ni nọ ganjẹ emi go.—Howhinwhẹn lẹ 3:5.
Biblu mẹ wẹ mí nọ mọ anademẹ Jiwheyẹwhe tọn lẹ gando walọ dagbe go te. Pọ́n whẹwhinwhẹ́n awe delẹ he dohia dọ anademẹ ehelẹ ma yin onú kiyẹkiyẹ de.
Jiwheyẹwhe wẹ dá mí. (Salmu lẹ 100:3) Na Jehovah Jiwheyẹwhe wẹ dá mí wutu, e yọ́n nue sin hudo mí do taun nado nọ ganji to agbasa mẹ bosọ do ayajẹ nujọnu tọn. E sọ yọ́n adán he na gbò mí lẹ eyin mí dovọ́na nuhe e dọ gando walọ dagbe go lẹ. (Galatianu lẹ 6:7) Humọ, Jehovah jlo dọ nulẹ ni yì do ganji na mí. Enẹwutu, Biblu ylọ Jiwheyẹwhe dọ, “Mẹhe nọ plọn we nado zan gbẹzan he na hẹn ale wá na we, Mẹhe nọ deanana we to aliho he ji hiẹ dona zinzọnlin gbọn.”—Isaia 48:17.
Nujlomẹ mítọn lẹ gán hẹn mí buali. Mẹsusu wẹ nọ lẹndọ yé gán magbe nue yin dagbe po oylan po tọn na yede, eyin yé nọ hodo ahun yetọn—enẹ wẹ nue nọ jlo yé lẹ. Amọ́, Biblu dọ dọ “ahun nọ klọmẹ hú nulẹpo bosọ yin owùnu.” (Jelemia 17:9) Eyin nuyọnẹn Jiwheyẹwhe tọn ma nọ deanana ahun mítọn, ahun mítọn na sisẹ́ mí nado wà nude he na wá vẹna mí to nukọn mẹ.—Howhinwhẹn lẹ 28:26; Yẹwhehodọtọ 10:2.
Be e jẹ dọ nukọntọ sinsẹ̀n tọn lẹ ni dovọ́na nue Biblu dọ gando dagbe po oylan po go ya?
Paali! Biblu dọ nugbo he gando Jiwheyẹwhe go lẹ gọna lehe e jlo dọ mí ni nọ yinuwa do lẹ na mí. (1 Kọlintinu lẹ 6:9-11; Galatianu lẹ 5:19-23) E jlo dọ gbẹtọ lẹ ni wá yọ́n nugbo ehelẹ. (1 Timoti 2:3, 4) Enẹwutu, lizọnyizọnwatọ Klistiani lẹ dona plọn mẹlẹ nuhe Ohó Jiwheyẹwhe tọn dọ.—Titu 1:7-9.
Mẹsusu he ma jlo na dotó nue Biblu dọ gando walọ dagbe go lẹ nọ dín nukọntọ sinsẹ̀n tọn he na “dọ nuhe otó yetọn jlo na sè lẹ na yé.” (2 Timoti 4:3) Amọ́, Biblu na avase sinsinyẹn ehe dọ: “Dindọn wẹ na mẹhe nọ ylọ dagbe dọ oylan podọ oylan dọ dagbe lẹ.” (Isaia 5:20) E họnwun dọ Jiwheyẹwhe na sayana nukọntọ sinsẹ̀n tọn he ma nọ plọn mẹlẹ nue Jiwheyẹwhe dọ dọ e yin dagbe po oylan po lẹ.
Be nuhe Biblu dọ gando walọ dagbe go na tulimẹ nado nọ do nuvẹun hia wẹ ya?
Lala. Mẹhe jlo na hẹn homẹ Jiwheyẹwhe tọn hùn lẹ nọ hodo apajlẹ po nuplọnmẹ Jesu Klisti tọn lẹ po. Jesu plọn hodotọ etọn lẹ ma nado nọ dawhẹna mẹdevo lẹ, ṣigba yé ni nọ do owanyi po sisi po hia mẹlẹpo.—Matiu 5:43, 44; 7:1.
Hodotọ Jesu tọn lẹ dona nọ nọgodona nue Jiwheyẹwhe dọ gando walọ dagbe go lẹ to gbẹzan yetọn mẹ. Podọ, yé sọ dona yọnẹn dọ mẹdevo lẹ gán de nado zan gbẹzan he jlo yé. (Matiu 10:14) Jesu ma na aṣẹ hodotọ etọn lẹ nado yí tonudido kavi onú devo zan nado hẹn gbẹtọ lẹ po huhlọn po na yé nido setonuna Jiwheyẹwhe.—Johanu 17:14, 16; 18:36.
Dagbe tẹlẹ wẹ mẹhe nọ hodo nuhe Biblu dọ gando walọ dagbe go lẹ na mọ?
Mẹhe wà nue Jiwheyẹwhe dọ gando dagbe po oylan po go lẹ na mọ dona susu todin podọ to sọgodo. (Salmu lẹ 19:8, 11) Delẹ to dona lọ lẹ mẹ die:
a Jehovah wẹ yinkọ Jiwheyẹwhe tọn dile Biblu dohia do.—Salmu lẹ 83:18.
A Gán Sọ Pọ́n Hosọ Ehelẹ
FỌ́N!
Yinyọ́n Nuhe Yin Dagbe po Oylan Po
Nuhe yin dagbe po oylan po pinplọn ovi towe lẹ na zọ́n bọ yé na wleawudai ganji na sọgodo.
NUPLỌNMẸ TANGAN BIBLU TỌN LẸ
Mẹnu Wẹ Yin Dowatọ Biblu Tọn
Eyin gbẹtọ lẹ wẹ kàn ẹn, be e sọgbe nado ylọ ẹ dọ Ohó Jiwheyẹwhe tọn ya? Linlẹn mẹnu tọn lẹ wẹ Biblu bẹhẹn?
