“Whenue n’to ovu, egbesọegbesọ wẹ mẹdaho ṣie sunnu nọ wadanu do go e bosọ nọ zun mi. To whenue n’dà asu godo, asu-nọ̀ ṣie lọsu jẹ yasana mi ji. Ewọ po asu ṣie tọ́ po nọ yinuwa hẹ mi taidi kanlinmọ. N’tlẹ wá jẹ linlẹn ji nado hù dee.”—Madhu, a he nọ nọ̀ Inde.

 Sọgbe hẹ nuhe Pipli He Nọ Penukundo Agbasalilo Go Lẹdo Aihọn Pé dọ, “danuwiwa do yọnnu lẹ go ko gbọn kámẹ-gòmẹ lẹdo aihọn pé.” Pipli lọ sọ dohia dọ nudi yọnnu dopo to atọ̀n ji wẹ nọ jiya danuwadomẹgo kavi zanhẹmẹ gánnugánnu tọn to gbẹzan yetọn mẹ lẹdo aihọn pé.

 Eyin onú mọnkọ ko jọ do gowe pọ́n, a gán nọ mọ dewe to owù mẹ to fidepope he a te, na a gán nọ mọdọ yè gán zun we, wadanu do gowe, kavi zanhẹ we po huhlọn po wutu. Na aliho agọ̀ he mẹ mẹlẹ nọ yinuwa hẹ yọnnu lẹ te wutu, a gán nọ tindo numọtolanmẹ lọ dọ mẹsusu wẹ nọ lẹndọ ‘Yọnnu lẹ ma vó nude.’ Amọ́, be yọnnu lẹ họakuẹ nugbonugbo to nukun Jiwheyẹwhe tọn mẹ ya?

 Wefọ: “Jiwheyẹwhe . . . dá yé sunnu de yọnnu de.”—Jenẹsisi 1:27.

 Zẹẹmẹ: Jiwheyẹwhe wẹ dá sunnu po yọnnu po. To nukun etọn mẹ, yé omẹ awe lẹpo wẹ jẹna sisi. Humọ, e nọ donukun dọ asu de ni “nọ yiwanna asi etọn dile e nọ wà na edetiti do,” bo ma nọ tẹnpọn nado paṣẹ glanglan do e ji, zun in kavi wadanu do e go blo. (Efesunu lẹ 5:33; Kolosinu lẹ 3:19) E họnwun dọ dagbemẹninọ yọnnu lẹ tọn nọ duahunmẹna Jiwheyẹwhe.

 “Whenue n’to ovu, hẹnnumẹ ṣie delẹ zanhẹ mi gánnugánnu. Whenue n’do owhe 17, ogán ṣie sìn-adán dọ emi na yàn mi sọn azọ́nmẹ, eyin n’ma dike bọ ewọ zanhẹ mi. Whenu n’whẹ́n mẹho, asu ṣie, mẹjitọ ṣie lẹ gọna kọmẹnu lẹ ma nọ na mi sisi. Amọ́ to nukọn mẹ, n’wá plọnnu gando Jehovah, b Mẹdatọ lọ go. Ewọ nọ na sisi yọnnu lẹ. Ehe hẹn mi kudeji dọ ewọ yiwanna mi podọ n’họakuẹ to nukun etọn mẹ.”—Maria, he nọ nọ̀ Argentine.

 Wefọ: “Họntọn delẹ tin he nọ sẹpọ yede pẹkipẹki hú nọvisunnu.”—Howhinwhẹn lẹ 18:24.

 Zẹẹmẹ: Họntọn nugbo lẹ nọ nọgodonamẹ. Eyin e sọgbe domọ, nọ dọ numọtolanmẹ towe lẹ na mẹde he go a dejido.

 “Na owhe 20 plipli, mẹde ma yọnẹn dọ yè zanhẹ mi gánnugánnu pọ́n. Taidi kọdetọn de, n’ma do ayajẹ bọ gbẹzan ṣie gọ́ na magbọjẹ po flumẹjijẹ po. Amọ́, whenue n’dọ adán he to gbigbò mi na mẹhe to gbesisọ mẹ nado dotoaina mi ganji de, ayiha ṣie jai.”—Elif, he nọ nọ̀ Turquie.

 Wefọ: ‘Mì to magbọjẹ mìtọn lẹpo bẹ dlan Jiwheyẹwhe ji, na e to mìtọn hòpọn wutu.’—1 Pita 5:7.

 Zẹẹmẹ: Eyin a hodẹ̀, Jiwheyẹwhe nọ dotoai. (Salmu lẹ 55:22; 65:2) Na ewọ nọ hò towe pọ́n wutu, e gán gọalọna we nado mọnukunnujẹ obá he mẹ a họakuẹ to nukun etọn mẹ jẹ.

 “Nupinplọn gando Jehovah go wẹ jẹ alọgọna mi ji nado jẹgangan sọn awufiẹsa he n’to mimọ to numọtolanmẹ-liho lẹ si. Todin, n’gán dọ homẹ na Jiwheyẹwhe to odẹ̀ mẹ. E taidi họntọn de he nọ mọnukunnujẹ numọtolanmẹ ṣie lẹ mẹ.”—Ana, he nọ nọ̀ Bélize.

 Wefọ: “Jehovah . . . na dawhẹ dodo na tọṣiọvi po mẹhe yè gbidikọna lẹ po, na gbẹtọ tata he to aigba ji de ma nado nọ dobuna yé ba.”—Salmu lẹ 10:17, 18.

 Zẹẹmẹ: To madẹnmẹ, Jiwheyẹwhe na de mawadodo, kanyinylan gọna danuwiwa wunmẹ he nọ gando yọnnu lẹ go lẹpo sẹ̀.

 “Kọfanamẹnu daho de wẹ e yin na mi whenue n’plọn dọ to madẹnmẹ, Jehovah na doalọtena nuyiwahẹmẹ agọ̀ he nọ gando yọnnu lẹ po awhli lẹ po go lẹpo sẹ̀. N’tindo jijọho ahun mẹ tọn din.”—Roberta, he nọ nọ̀ Mexique.

 Nado plọnnu dogọ gando todido he Biblu nọ namẹ go, nuhewutu mí gán dejido opagbe he to e mẹ lẹ go gọna lehe Kunnudetọ Jehovah tọn lẹ nọ yí Biblu zan nado gọalọnamẹ to egbehe do go, biọ to nado wá dla we pọ́n.

 Yí wunmẹ pdf tọn kleun hosọ ehe tọn.