MÌ NỌ TO AṢEJI!
Lẹnunnuyọnẹntọ lẹ Dọ Ogàn He mẹ Ogbẹ̀ Na Vọ̀ te Sẹpọ Pete—Etẹ Biblu Dọ?
To 24 janvier 2023, lẹnunnuyọnẹntọ lẹ dọ dọ ojlẹ he mẹ ogbẹ̀ na vọ̀ te a ko sẹpọ ogàn wiawe zánmẹ tọn yẹhiadonu tọn de.
“Hodidọ lọ ‘ogàn he mẹ ogbẹ̀ lọ na vọ̀ te’ nọ dlẹnalọdo gbeegbe gbẹtọvi lẹ na yí alọ yetọn do hù yede sudo. To mardi enẹ, lẹnunnuyọnẹntọ lẹ dọ dọ ogàn he mẹ enẹ na jọ te ko sẹpọ ogàn wiawe zánmẹ tọn todin hugan gbede pọ́n, na nujijọ delẹ taidi awhàn he to yìyì to Ukraine, obu bọmbu nuzanusẹvaun tọn po ninọmẹ aimẹ tọn he ylan taun to aigba ji po wutu.”—Sọgbe hẹ linlin AFP International Text Wire tọn.
“Lẹnunnuyọnẹntọ lẹ dọ to mardi dọ ogàn he mẹ ogbẹ̀ lọ na vọ̀ te pò nukunwhiwhe (seconde) 90 do ogàn wiawe zánmẹ tọn—ehe dohia dọ gbẹtọvi lẹ ko sẹpọ amagẹdọni hugan gbede pọ́n.”—Sọgbe hẹ linlin ABC News tọn.
“Pipli lẹnunnuyọnẹntọ he wá sọn otò voovo mẹ lẹ tọn de ko na avase dọ ogbẹ̀ gbẹtọvi lẹ tọn tin to owù daho mẹ hugan gbede pọ́n.”—Sọgbe hẹ linlin The Guardian tọn.
Be gbẹtọvi lẹ po planẹti mítọn po na yin kúnsúdona to madẹnmẹ wẹ ya? Be mí dona dibuna sọgodo wẹ ya? Etẹ Biblu dọ?
Nue mí gán donukun to sọgodo lẹ
Biblu dohia dọ “aigba [na] gbọṣi aimẹ kakadoi,” podọ gbẹtọ lẹ “nasọ nọgbẹ̀ to e ji kakadoi.” (Yẹwhehodọtọ 1:4; Salmu lẹ 37:29) Enẹwutu, gbẹtọvi lẹ ma gán và aigba sudo kavi hẹn planẹti mítọn blebu zun fie yè ma gán nọ.
Amọ́, Biblu dohia nugbo dọ opodo de na wá. Di apajlẹ, e dọ dọ “aihọn to jujuyi.”—1 Johanu 2:17.
Nado mọnukunnujẹ nuhe Biblu ylọdọ opodo aihọn tọn mẹ, hia hosọ lọ “Be Ogbẹ̀ Jlo Na Vọ̀ Wẹ Ya? Etẹwẹ Yin Apokalipsi?”
Nado yọ́n nuhe Biblu dọ gando ojlẹ he mẹ nujijọ aihọn tọn voovo lẹ na wá aimẹ te go, hia hosọ lọ “Whetẹnu Aihọn lọ Na Wá Vivọnu?”
Nọ tindo linlẹn dagbe lẹ
Biblu gán gọalọna mí nado tindo linlẹn dagbe mahopọnna nuhahun he to aihọn lọ mẹ din lẹ. Gbọnna?
Biblu nọ na mí ayinamẹ he sin hudo mí do lẹ. (2 Timoti 3:16, 17) Di apajlẹ, hia hosọ lọ “Lehe A Gán Duto Nuhiha Ji Do” nado mọ lehe Biblu gán gọalọna we nado nọ tindo linlẹn dagbe lẹ do mahopọnna nuhahun gbẹ̀mẹ tọn lẹ.
Biblu na mí todido dejidego de gando sọgodo go. (Lomunu lẹ 15:4) E basi zẹẹmẹ hezeheze do nue mí gán donukun todin podọ to sọgodo lẹ ji, ehe nọ gọalọna mí nado yí adọgbigbo do pannukọn nuhe to jijọ to aihọn mẹ to egbehe lẹ.
Eyin a jlo na mọ nususu plọn dogọ sọn Biblu mẹ, mí vẹ̀ we nado tẹ́n tito Biblu pinplọn tọn vọnu mítọn pọ́n to egbé.
a “Hodidọ lọ Ogàn He mẹ Ogbẹ̀ Na Vọ̀ Te, nọ dlẹnalọdo gànhiho yẹhiadonu tọn de he nọ yin yiyizan nado na avase gbẹtọ lẹ, dọ ojlẹ he mẹ nuyizan nuyọnẹn wintinwintin tọn owùnọ he mílọsu nọ detọ́n lẹ na và ogbẹ̀ lọ sudo te ko dọnsẹpọ pete. Nuyijlẹdonugo ehe nọ flinnu mí gando nuhahun he mí dona didẹ lẹ go eyin mí na nọgbẹ̀ to planẹti lọ ji zọnmii.”—Linlin Bulletin of the Atomic Scientists tọn.
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Etẹwẹ Awhàn Amagẹdọni Tọn Zẹẹmẹdo?
Whladopo gee wẹ hogbe lọ “Amagẹdọni” yin mimọ to Biblu mẹ, amọ́ Owe-wiwe lẹ basi zẹẹmẹ awhàn wunmẹ he e nọtena tọn.
NUPLỌNMẸ TANGAN BIBLU TỌN LẸ
Naegbọn Jiwheyẹwhe Do Jotẹnna Yajiji?
Mẹsusu wẹ nọ kanse dọ naegbọn wangbẹna po yajiji po do gọ́ gbẹ̀mẹ sọmọ. Gblọndo he Biblu na na kanbiọ enẹ hẹn pekọ wá namẹ bosọ miọnhomẹnamẹ taun.
ZẸẸMẸ WEFỌ BIBLU TỌN LẸ TỌN
Zẹẹmẹ Osọhia 21:1 Tọn—“Olọn Yọyọ de po Aigba Yọyọ De Po”
Nudọnamẹ tẹlẹ wẹ Biblu bẹhẹn gando zẹẹmẹ nue to wefọ ehe mẹ lẹ tọn go?
NUPLỌNMẸ TANGAN BIBLU TỌN LẸ
Naegbọn Jiwheyẹwhe Do Dá Aigba?
Nudida he yọnwhanpẹ lẹ kẹdẹ wẹ gọ́ aigba ji. E tin to fie e jẹ dọ ni nọ do owhè pẹpẹ, bo dẹ́ do lehe e jẹ do bosọ nọ lilẹ́ jẹ obá he sọgbe pẹpẹ mẹ. Naegbọn Jiwheyẹwhe do dovivẹnu sọmọ nado dá aigba?
YỌ́N MÍ DOGỌ
Biọ Dọ Kunnudetọ de Ni Wá Dla We Pọ́n
Dọhodo kanbiọ sinai do Biblu ji de ji, kavi plọnnu dogọ gando Kunnudetọ Jehovah tọn lẹ go.
