Walọdagbe to doyi taun. Awutunọ he ma nọ sí mẹ lẹ nọ dawhá do doto lẹ ji; ogán núdùdù satẹn tọn he ma do sisi lẹ nọ de lizọnyitọ yetọn lẹ pò; agahundotọ lẹ nọ zun mẹhe nọ penukundo yé go to agahun mẹ lẹ; ovi tasinyẹntọ lẹ nọ ṣàn mẹplọntọ yetọn lẹ kò, nọ sìn-adán na yé, bo tlẹ nọ hò yé; podọ tonudọtọ delẹ nọ doalọ to walọ he huwinyan taun lẹ mẹ, to whenuena devo lẹ nọ ze nujinọtedo walọdagbe tọn yetọn titi lẹ daga.

 Biblu yin anademẹwe dejidego de na nuhe dù walọyizan dagbe. E sọ basi zẹẹmẹ nuhewutu walọdagbe do hán to egbehe tọn.

 E họnwun dọ walọdagbe, enẹ wẹ walọyizan he sọgbe bosọ yin alọkẹyi lẹ to doyi lẹdo aihọn pé.

•    Sọgbe hẹ sọhayinanú he azọ́nwhé Gallup wleawuna to agọe, tòvi États-Unis tọn lẹ mọdọ nujinọtedo walọdagbe tọn lẹ ko yidò taun to otò lọ mẹ todin hugan ojlẹ devo depope mẹ to owhe 22 he wayi lẹ gblamẹ.

•    To sọhayinanú devo he mẹ gbẹtọ 32 000 doalọ te to otò 28 mẹ, nudi gbẹtọ 65 to kanweko ji wẹ lẹndọ to paa mẹ, doyiyi walọdagbe tọn gbẹtọvi lẹ tọn ko ylan taun to egbehe hugan gbede pọ́n.

 Biblu ko dọ jẹnukọn dọ mọwẹ mẹlẹ na yinuwa do to egbehe.

•    “To azán lẹ godo ojlẹ awusinyẹn tọn lẹ na wá. Na gbẹtọ lẹ na lẹzun wanyina yede tọ́, nukunkẹnnọ, awagundotọ, saklanọ, nùzantọ, tolivẹ do mẹjitọ lẹ go tọ́, mayọndagbenọ, . . . , owanyi jọwamọ tọn matindotọ, [podọ] kanylantọ.”—2 Timoti 3:1-3, Biblu Gun Alada.

 Na nudọnamẹ dogọ gando lehe nuhe yin didọ jẹnukọn ehelẹ to jijọ do go, hia hosọ lọ “La Bible a-​t-​elle prédit la mentalité et la conduite des gens de notre époque?”

 To aihọn de he mẹ walọdagbe fọ́n bo to doyi te, gbẹtọ livi susu lẹ ko mọdọ Biblu yin anademẹwe jiawu de gando walọdagbe go. Ayinamẹ he e na gando walọdagbe go lẹ yin nuhe “yè sọgan ganjẹ yé go to whepoponu, yèdọ todin podọ kakadoi.” (Salmu lẹ 111:8) Lẹnnupọn do apajlẹ kleun delẹ ji:

•    Nuhe Biblu dọ: “Nudepope he mìwlẹ jlo dọ gbẹtọ lẹ ni nọ wà na mì, mọ wẹ mìlọsu dona nọ wà na yé do.”—Matiu 7:12.

   Nuhe e zẹẹmẹdo: Mí dona nọ yí homẹdagbe po sisi po do yinuwa hẹ mẹdevo lẹ, kẹdẹdile mílọsu nọ jlo dọ mẹlẹ ni yinuwa hẹ mí do.

•    Nuhe Biblu dọ: “Todin he mì ko klọ́n oklọ dai, dopodopo mìtọn ni nọ dọ nugbo hẹ kọmẹnu etọn.”—Efesunu lẹ 4:25.

   Nuhe e zẹẹmẹdo: Mí dona yin nugbonọ to nuhe mí nọ dọ bosọ nọ wà lẹpo mẹ.

 Na nudọnamẹ dogọ gando hosọ ehe go, jaale bo hia:

•    Atọ̀họ̀ Nuhihọ́ lọ Tọn he hosọ etọn yin “Dagbe po Oylan po—Anademẹ Tẹ Go Wẹ A Gán Ganjẹ?”

•    Hosọ lọ “La tolérance:Quelle aide la Bible peut-elle apporter?.”