NUYỌNẸN HOHOWHENU TỌN DE HE GBẸ́ YỌ́N-NA-YIZAN
Mì Yin Magbọjẹnọ Blo
NUHE BIBLU DỌ: “Mì sọ yin magbọjẹnọ na alindọn mìtọn ba blo.”—Matiu 6:25.
Etẹwẹ e zẹẹmẹdo? Jesu dọ ohó ehelẹ to Yẹwhehodidọ Osó ji tọn etọn whenu. Sọgbe hẹ wezẹhomẹ Biblu tọn dopo, hogbe Glẹkigbe tọn he yin lilẹdo “nado yin magbọjẹnọ” sọgan dlẹnalọdo “nuyiwa mẹde tọn gando ohẹ́n, homẹgble po nuhahun devo he e nọ pehẹ egbesọegbesọ lẹ po go.” Magbọjẹ nọ saba bẹ nuhiha gando nuhe na wá jọ to sọgodo go hẹn. Jọwamọnu wẹ e yin dọ nuhudo agbasa tọn mítọn po dagbemẹninọ mẹvivẹ mítọn lẹ tọn po ni nọ duahunmẹna mí podọ enẹ sọgbe. (Filipinu lẹ 2:20) Ṣigba, to whenue Jesu dọ dọ, “mì yin magbọjẹnọ gbede blo,” ayinamẹ na hodotọ etọn lẹ wẹ e te nado dapana nuhiha zẹjlẹgo—enẹ wẹ obu sijọsijọ tọn gando sọgodo go sọmọ bọ yé ma nasọ duvivi gbẹninọ tọn to azán dopodopo ji ba.—Matiu 6:31, 34.
Be e gbẹ́ yọ́n-na-yizan ya? Nuyọnẹnnu wẹ e yin dọ mí ni setonuna ayinamẹ Jesu tọn. Etẹwutu? Alọdlẹndonu delẹ dohia dọ eyin gbẹtọ to nuhà zẹjlẹgo, e nọ yinuwado apọ̀n etọn ji bọ enẹ sọgan zọ́n bọ e na wá bẹ azọ̀n delẹ taidi “apà homẹ tọn, ahunzọ̀n po gbọhlihẹ po.”
Jesu na whẹwhinwhẹ́n dolido de he wutu mí dona dapana magbọjẹ zẹjlẹgo: E ma doale. Jesu kanse dọmọ: “Mẹnu to mì mẹ wẹ sọgan gbọn magbọjẹnọ-yinyin dali yí awagbà dopo dogọ tedidi gbẹzan etọn tọn?” (Matiu 6:27) Magbọjẹ mítọn lẹ ma tlẹ na yí nukunwhiwhe dopo dogọ gbẹninọ mítọn, mọ e ma sọgan hẹn ẹn pọnte. Humọ, nuhe mí to budina ma nọ saba jọ. Weyọnẹntọ dopo dọ dọ: “Whenu hẹngu wẹ nuhiha gando sọgodo go yin, podọ nuhe mí ma tlẹ lẹn wẹ nọ wá jọ to sọgodo.”
Nawẹ mí sọgan dapana magbọjẹ gbọn? Tintan, dejido Jiwheyẹwhe go. Eyin Jiwheyẹwhe nọ na núdùdù ohẹ̀ lẹ bo nọ doaṣọ́na vounvoun lẹ, be e ma na wleawu dandannu gbẹ̀mẹ tọn lẹ tọn na gbẹtọvi he nọ ze sinsẹ̀n-bibasi etọn do otẹn tintan mẹ lẹ ya? (Matiu 6:25, 26, 28-30) Awetọ, nọ nọgbẹ̀ sọgbe hẹ azán dopodopo. Jesu dọmọ: “Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ.” Be hiẹ ma kọngbedopọ dọ “oylan azán dopodopo tọn ko pé na ẹn” ya?—Matiu 6:34.
Eyin mí setonuna ayinamẹ Jesu tọn, mí sọgan dapana awú hinhẹngble na míde to agbasa-liho. Humọ, mí na tindo jijọho ahun mẹ tọn—yèdọ nuhe Biblu ylọdọ “jijọho Jiwheyẹwhe tọn.”—Filipinu lẹ 4:6, 7.
A Gán Sọ Pọ́n Hosọ Ehelẹ
HOSỌ DEVO LẸ
Nuhe Nọ Do Lẹnpọn Na Sunnu lẹ—Lehe Biblu Gán Gọalọ Do
Nuhiha yin nuhahun he fọ́n bo to agayi to ojlẹ awusinyẹn tọn he vẹawu nado pehẹ ehelẹ mẹ. Eyin nude to lẹnpọn do na we, be Biblu gán gọalọna we ya?
ZẸẸMẸ WEFỌ BIBLU TỌN LẸ TỌN
Zẹẹmẹ Matiu 6:34 Tọn—“Mì Hanú Na Osọ He Ja Blo”
Jesu ma to didọ dọ mí ni ma basi tito lẹ hlan sọgodo blo.
YỌ́N MÍ DOGỌ
Biọ Dọ Kunnudetọ de Ni Wá Dla We Pọ́n
Dọhodo kanbiọ sinai do Biblu ji de ji, kavi plọnnu dogọ gando Kunnudetọ Jehovah tọn lẹ go.
