Eyin a biọ nuhahun mẹ, e họnwun dọ a na biọ to họntọn vivẹ́ de si nado gọalọna we. Enẹ wẹ zọ́n bọ mẹdelẹ do nọ dọ dọ Jiwheyẹwhe ma yin họntọn yetọn, na yé nọ lẹndọ e dona ko yí nude wà nado gọalọna yé. Nugbo lọ wẹ yindọ, gbọnvona dọ Jiwheyẹwhe ko wà nususu na dagbe mítọn, e nasọ wá wà nudevo lẹ nado gọalọna mí bo de oyà he mí to jiji to egbehe lẹpo sẹ̀. Etẹlẹ wẹ Jiwheyẹwhe na wá wà?

Jiwheyẹwhe na de nuhe nọ hẹn yajiji wá sẹ̀ bo doalọtena yajiji lẹpo. Biblu dọ nuhe nọ hẹn yajiji wá to whenue e dọmọ: “Aihọn lọ pete tin to huhlọn mẹylankan lọ tọn glọ.” (1 Johanu 5:19) “Mẹylankan lọ” ma yin mẹdevo de hú Satani Lẹgba, mẹhe Jesu ylọ dọ “ogán aihọn ehe tọn.” (Johanu 12:31) Satani he nọ deanana gbẹtọvi lẹ wẹ nọ hẹn oyà he ji mí te to aigba ji lẹ wá. Etẹlẹ wẹ Jiwheyẹwhe na wá wà?

Madẹnmẹ, Jehovah Jiwheyẹwhe na yí Visunnu etọn Jesu Klisti zan nado “hẹn mẹhe tindo huhlọn nado hẹn okú wá lọ, yèdọ Lẹgba, zun ovọ́.” (Heblu lẹ 2:14; 1 Johanu 3:8) Biblu tlẹ dohia dọ Lẹgba lọsu yọnẹn dọ “whenu gli de wẹ emi tindo” bo na yin vivasudo. (Osọhia 12:12) Jiwheyẹwhe nasọ de mẹhe nọ hẹn yajiji wá lẹpo sẹ̀.—Salmu lẹ 37:9; Howhinwhẹn lẹ 2:22.

To whenue Mẹdatọ mítọn na ko doalọtena yajiji lẹpo to aigba ji godo, e na yinuwa nado hẹn ojlo etọn na gbẹtọvi lẹ po aigba po di. Etẹlẹ wẹ mí gán donukun?

Jijọho po hihọ́ po na dẹn-to-aimẹ. “Homẹmimiọnnọ lẹ wẹ na dugu aigba tọn, yé nasọ nọ mọ awuvivi susu to jijọho susugege mẹ.”—Salmu lẹ 37:11.

Núdùdù dagbe susugege. “Jinukun susugege na tin to aigba ji; e na gọfla to osó lẹ ji aga.”—Salmu lẹ 72:16.

Owhé po azọ́n dagbe po. “Yé na gbá ohọ̀ lẹ bo nasọ nọ nọ̀ yé mẹ, yé na do vẹngle lẹ bo nasọ nọ dù sinsẹ́n yetọn. . . . Mẹdide ṣie lẹ na nọ duvivi azọ́n alọ yetọn lẹ tọn to gigọ́ mẹ.”—Isaia 65:21, 22.

Be hiẹ jlo na duvivi nudagbe ehelẹ tọn ya? Mímẹpo wẹ na jẹ vivi yetọn dù ji to madẹnmẹ.

To egbehe, mẹlẹpo wẹ nọ jẹazọ̀n bo nọ wá kú, amọ́ enẹ na doalọte zande din. Madẹnmẹ, Jiwheyẹwhe na yí avọ́sinsan ofligọ tọn he Jesu basi lọ zan na dagbe mítọn bọ “mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Johanu 3:16) Ale tẹlẹ wẹ ehe na hẹnwa?

Azọ̀n na yin kúnsúdona. “Depope to mẹhe nọ nọ̀ aigba lọ ji lẹ mẹ ma na dọmọ: ‘N’to azọ̀njẹ.’ Nuṣiwa mẹhe nọ nọ̀ finẹ lẹ tọn na yin jijona yé.”—Isaia 33:24.

Gbẹtọvi lẹ na gán sọn okú si. “Ewọ na ze okú mì kakadoi, Oklunọ Nupojipetọ Jehovah na súnsún dasin sẹ̀ sọn nukun lẹpo mẹ.”—Isaia 25:8.

Gbẹtọ na nọgbẹ̀ kakadoi. “Nunina he Jiwheyẹwhe nọ namẹ wẹ ogbẹ̀ madopodo gbọn Klisti Jesu Oklunọ mítọn dali.”—Lomunu lẹ 6:23.

Mẹhe ko kú lẹ na gọwá ogbẹ̀. “Fọnsọnku dodonọ lẹ po mawadodonọ lẹ po tọn de na tin.” (Owalọ lẹ 24:15) Ofligọ he Jiwheyẹwhe wleawuna lọ na hẹn ale wá na yé.

Nawẹ Jiwheyẹwhe na wà onú ehe lẹpo gbọn?

Jiwheyẹwhe na yí ahọluduta olọn tọn he Klisti Jesu yin Ahọlu etọn zan nado hẹn ojlo etọn na gbẹtọvi lẹ po aigba po di. (Salmu lẹ 110:1, 2) Gandudu kavi ahọluduta ehe wẹ Jesu plọn hodotọ etọn lẹ nado nọ hodẹ̀ na dọmọ: “Otọ́ mítọn he tin to olọn mẹ, . . . na Ahọluduta towe ni wá.”—Matiu 6:9, 10.

Ahọluduta Jiwheyẹwhe tọn wẹ na dugán do aigba ji bo na de nuylankan po yajiji lẹpo po sẹ̀. Ahọluduta ehe wẹ yin gandudu dagbe hugan he gbẹtọvi lẹ na tindo! Enẹ wẹ zọ́n bọ Jesu dovivẹnu nado lá “wẹndagbe Ahọluduta lọ tọn” to whenue e to aigba ji bosọ dọna devi etọn lẹ nado wà nudopolọ.—Matiu 4:23; 24:14.

Na owanyi daho he Jehovah Jiwheyẹwhe tindo na gbẹtọvi lẹ wutu, e dopà nado wà nudagbe ehe lẹpo na yé. Be enẹ ma zọ́n bọ hiẹ na jlo nado yọ́n ewọ ganji bo jihọntọn hẹ ẹ ya? Dagbe tẹlẹ wẹ ehe wiwà na hẹnwa na we? Hosọ he bọdego na dọhodo enẹ ji.