Mẹnu Wẹ Jiwheyẹwhe?
Mẹsusu wẹ nọ dọ dọ yé yise to Jiwheyẹwhe mẹ. Amọ́, eyin a kàn mẹhe nkọ Jiwheyẹwhe yin taun sè yé, gblọndo yetọn lẹ na gbọnvo. Na mẹdelẹ, Jiwheyẹwhe yin whẹdatọ fifiẹtọ de he nọ to dindin nado sayana gbẹtọ lẹ na nuṣiwa yetọn lẹ. Na mẹdevo lẹ, ewọ nọ do owanyi hia bo nọ jonamẹ mahopọnna nudepope he yè wà. Amọ́, mẹdevo lẹ yise dọ Jiwheyẹwhe dẹn do mí bo ma nọ dọ mítọn paali. Na linlẹn voovo enẹlẹ wutu, mẹsusu gán lẹndọ e ma yọnbasi nado yọ́n mẹhe nkọ Jiwheyẹwhe yin taun.
Be Jiwheyẹwhe yinyọnẹn yin nujọnu ya? Gbau. Jiwheyẹwhe yinyọnẹn ganji gán zọ́n bọ a na yọ́n nuhewutu mí do togbẹ̀. (Owalọ lẹ 17:26-28) Dile a dọnsẹpọ Jiwheyẹwhe sọ, mọ wẹ ewọ lọsu na yiwanna we bo na nọ gọalọna we do. (Jakọbu 4:8) Humọ, Jiwheyẹwhe yinyọnẹn ganji gán zọ́n bọ a na mọ ogbẹ̀ madopodo.—Johanu 17:3.
Nawẹ a gán wá yọ́n Jiwheyẹwhe gbọn? Lẹnnupọndo mẹhe a yọnẹn ganji de ji, enẹ wẹ họntọn vivẹ́ de. Nawẹ họntọnjiji lọ bẹjẹeji gbọn? E na ko yindọ a yọ́n yinkọ mẹlọ tọn whẹ́, omẹ nankọ he e yin, nuhe e yiwanna po nuhe e gbẹwanna lẹ po, nuhe e ko wà wayi lẹ gọna nuhe e to linlẹn nado wà lẹ, po mọmọ po. Nuhe zọ́n bọ a jẹ wanyina ẹn ji wẹ yindọ a yọ́n nulẹ gandego.
Mọdopolọ, mí gán wá yọ́n mẹhe nkọ Jiwheyẹwhe yin taun eyin mí yọ́n nuhe bọdego lẹ:
Linlinnamẹwe ehe na gblọndo sinai do Biblu ji lẹ na kanbiọ ehelẹ. Hosọ lọ lẹ na gọalọna we nado yọ́n mẹhe nkọ Jiwheyẹwhe yin taun, gọna ale he a na mọ eyin a jihọntọn hẹ ẹ lẹ.
A Gán Sọ Pọ́n Hosọ Ehelẹ
ATỌ̀HỌ̀-NUHIHỌ́ LỌ TỌN
Nawẹ Jiwheyẹwhe Nọ Yin?
Be a yọnẹn dai dọ Jiwheyẹwhe do yinkọ de he nkọ ma pé awe ya?
