Be Ogbẹ̀ Jlo Na Vọ̀ Wẹ Ya?
Vlavo a yọnẹn dọ Biblu dọ dọ ogbẹ̀ na vọ̀. (1 Johanu 2:17) Be didọ wẹ Biblu te dọ gbẹtọ lẹ na vọ̀ sọn ogbẹ̀ lọ mẹ ya? Be nuhe to aigba ji lẹpo na kú bọ yè na và aigba lọ wẹ ya?
LALA WẸ YIN GBLỌNDO BIBLU TỌN NA KANBIỌ AWE EHELẸ!
Etẹwẹ Ma Na Vọ̀?
GBẸTỌVI LẸ
Nuhe Biblu dọ: Jiwheyẹwhe ‘ma dá aigba to ovọ́ mẹ, ṣigba e dá ẹ na yè nido nọ nọ̀ e ji.’—ISAIA 45:18.
AIGBA
Nuhe Biblu dọ: “Whẹndo de to jujuyi, whẹndo devo sọ to wiwá, ṣigba, aigba gbọṣi aimẹ kakadoi.”—YẸWHEHODỌTỌ 1:4.
NUHE E ZẸẸMẸDO: Biblu dohia dọ yè ma na và aigba pọ́n, mọ gbẹtọ ma na hán to e ji gbede. Bọ din, etẹwẹ e zẹẹmẹdo dọ ogbẹ̀ na vọ̀ lo?
LẸNNUPỌNDO EHE JI: Biblu dohia dọ nuhe jọ to Noa sin whenu nkọ wẹ na jọ to ogbẹ̀ he na vọ̀ to madẹnmẹ lọ whenu. To whenẹnu, aigba “gọ́ na danuwiwa.” (Jenẹsisi 6:13) Etomọṣo, Noa yin dodonọ. Nuhe zọ́n niyẹn bọ Jiwheyẹwhe pò Noa po whẹndo etọn po dogbẹ̀ bo ka yí jikun do và mẹylankan lẹ. Biblu dọhodo nuhe jọ lọ ji bo dọ dọ: “Aihọn whenẹnu tọn yin vivasudo to whenuena yè yí osin do gọ́ ẹ.” (2 Pita 3:6) Lehe ogbẹ̀ vọ̀ do to whenẹnu niyẹn. Amọ́, etẹwẹ yè vasudo taun? E ma yin aigba wẹ yè vasudo, mẹylankan he to aigba lọ ji lẹ wẹ. E bayi dọ eyin Biblu dọ dọ ogbẹ̀ na vọ̀, e ma to didọ dọ aigba wẹ yè na và gba. Kakatimọ, mẹylankan he to aigba lọ ji lẹ po tito voovo he yé zedai lẹ po wẹ na busẹ.
Etẹwẹ Na Vọ̀?
NUHAHUN LẸ PO KANYINYLAN PO
Nuhe Biblu dọ: “Na whenu pẹẹde dogọ, mẹylankan lẹ ma na tin ba; hiẹ na pọ́n fie yé nọ nọ̀ dai, yé ma nasọ to finẹ. Ṣigba, homẹmimiọnnọ lẹ wẹ na dugu aigba tọn, yé nasọ nọ mọ awuvivi susu to jijọho susugege mẹ.”—SALMU LẸ 37:10, 11.
NUHE E ZẸẸMẸDO: Osin he và mẹlẹ to Noa sin whenu ma de kanyinylan sẹ̀ petepete. Mẹylankan lẹ sọ gọjẹ danú wà ji bọ gbẹninọ vẹawuna mẹlẹ. Amọ́ zande din, Jiwheyẹwhe na de kanyinylan sẹ̀. Dile mẹhe kàn Salmu lọ dọ do: “Mẹylankan lẹ ma na tin ba.” Jiwheyẹwhe na yí Ahọluduta etọn zan nado de kanyinylan sẹ̀. Ahọluduta enẹ yin gandudu de he na paṣẹ sọn olọn mẹ do mẹhe yin tonusetọ bo to aigba ji lẹ ji.
LẸNNUPỌNDO EHE JI: Be mẹhe to aṣẹpa to ogbẹ̀ lọ mẹ todin lẹ na nọgodona Ahọluduta Jiwheyẹwhe tọn ya? Biblu dọ dọ yé ma na wàmọ. Yé na yinuwa po nulú po bo na diọnukunsọ Ahọluduta Jiwheyẹwhe tọn. (Salmu lẹ 2:2) Etẹ mẹ wẹ nuyiwa yetọn enẹ na klita do? Ahọluduta Jiwheyẹwhe tọn na yitẹn to gandudu gbẹtọvi tọn lẹpo si bọ “ewọ kẹdẹ wẹ na nọte kakadoi.” (Daniẹli 2:44) Naegbọn gandudu gbẹtọvi tọn lẹ dona busẹ?
NUHE SIN HUDO MÍ DO—Gandudu Gbẹtọvi Tọn Ni Busẹ
Nuhe Biblu dọ: “E ma tin to huhlọn mẹhe to zọnlinzin tọn mẹ nado deanana afọdide etọn lẹ.”—JELEMIA 10:23.
NUHE E ZẸẸMẸDO: Jiwheyẹwhe ma dá gbẹtọ nado dugán do hatọ etọn ji. Aṣẹpatọ lẹ ma nọ wà onú kaka de na gbẹtọ lẹ bo masọ nọ gbọ nuhahun yetọn lẹ.
LẸNNUPỌNDO EHE JI: Owe de dọ dọ “e di nuhe glo aṣẹpatọ lẹ nado de nudelẹ sẹ̀ taidi ohẹ́n, huvẹ, azọ̀n, [jẹhọn ahizi, otọ̀-gbàmẹ,] awhàn po onú mọnkọ devo lẹ po.” Owe lọ yidogọ dọ: “Mẹdelẹ . . . lẹndọ eyin gandudu dopo gee paṣẹ do ogbẹ̀ lọ blebu ji, e na de nuhahun enẹlẹ sẹ̀ petepete.” (Owe lọ Britannica Academic) Amọ́, eyin gandutọ lẹpo tlẹ dogbepọ, yé ma gán de nuhahun enẹlẹ sẹ̀, na gbẹtọvi lẹ ma do nugopipe lọ bọ ohó fó. Ahọluduta Jiwheyẹwhe tọn kẹdẹ wẹ do nugopipe lọ nado de nuhahun lẹpo sẹ̀ kakadoi.
Enẹwutu po nuhe Biblu dọ po, ogbẹ̀ ylankan ehe sin vivọ̀ ma nọ dobuna mẹhe nọ setonuna Jiwheyẹwhe lẹ. Kakatimọ, yé nọ to jejeji, na ogbẹ̀ dagbedagbe he Jiwheyẹwhe na hẹnwa na yitẹn to aihọn ylankan ehe si!
Whetẹnu wẹ ehe lẹpo na jọ? Mí na mọ gblọndo Biblu tọn to hosọ he bọdego mẹ.
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Be Aigba Na Wá Yin Vivasudo Wẹ Ya?
Biblu do lẹndai Jiwheyẹwhe tọn na planẹti mítọn hia hezeheze.
GBLỌNDO NA KANBIỌ SINAI DO BIBLU JI LẸ
Etẹwẹ Awhàn Amagẹdọni Tọn Zẹẹmẹdo?
Whladopo gee wẹ hogbe lọ “Amagẹdọni” yin mimọ to Biblu mẹ, amọ́ Owe-wiwe lẹ basi zẹẹmẹ awhàn wunmẹ he e nọtena tọn.
GBLỌNDO NA KANBIỌ SINAI DO BIBLU JI LẸ
Be Otàn Noa po Singigọ Daho lọ po Tọn Yin Otàngblo de Poun Wẹ Ya?
Biblu dọ dọ Jiwheyẹwhe ko hẹn Singigọ daho de wá pọ́n nado và mẹylankan lẹ sudo. Kunnudenu Biblu tọn tẹlẹ wẹ dohia dọ Jiwheyẹwhe lọsu wẹ hẹn Singigọ lọ wá?
