Be a flin ojlẹ de he mẹ a jai whenue a to pẹvi ya? Vlavo a gbleawu do alọ kavi do kligonu. Be a flin lehe onọ̀ towe miọnhomẹna we do ya? Vlavo e klọ́ apà lọ bo blá ẹ. A viavi, ṣigba hogbe fifá etọn lẹ po yẹyi he e wle na we po zọ́n bọ a yawu mọ dewe mẹ. To ojlẹ enẹlẹ mẹ to gbẹzan towe mẹ, a nọ yawu mọ homẹmiọnnamẹ yí.

Ṣigba, ogbẹ̀ nọ wá vẹawu dogọ dile mí to whinwhẹ́n. Nuhahun lẹ nọ jẹ susu ji, bọ e nọ vẹawu nado mọ homẹmimiọn. E blawu dọ, eyin yè whẹ́n mẹho, yẹyiwlenamẹ po apà biblanamẹ onọ̀ de tọn po ma nọ saba didẹ nuhahun lẹ ba. Lẹnnupọndo apajlẹ delẹ ji.

• Be azọ́n ko gbledo we pọ́n ya? Julian dọ dọ whenue azọ́n gbledo emi, emi jẹflumẹ. E nọ kanse ede dọ, ‘Nawẹ n’na penukundo whẹndo ṣie go gbọn? Whenue n’ko zan dee na owhe susu godo, naegbọn azọ́nwhé lọ do mọdọ n’ma yọ́n-na-yizan ba?’

• Vlavo a jẹflumẹ na alọwle towe gbakija wutu. Raquel dọmọ: “Whenue asu ṣie jo mi do to ajiji mẹ to osun 18 die, n’biọ bẹwlu mẹ. E di dọ ahun ṣie má do awe wẹ nkọ. N’jiya susu to agbasa-liho podọ to numọtolanmẹ-liho. Obu jẹ ji e.”

• Vlavo a to azọ̀n sinsinyẹn de jẹ, bọ nukundido de ma tin dọ e na pọnte. Ojlẹ delẹ sọgan tin bọ a na nọ tindo numọtolanmẹ dopolọ di tọgbo Jobu, mẹhe wule dọmọ: “Ogbẹ̀ ṣie hiọawu na mi; n’masọ jlo na nọgbẹ̀ ba.” (Jobu 7:16) Vlavo a sọgan nọ tindo numọtolanmẹ Luis tọn nkọ, yèdọ dawe de he tindo owhe 80 linlán, bo dọ dọ, “To whedelẹnu, n’nọ mọdọ okú ján wẹ pò na mi.”

• Kavi e sọgan yindọ okú mẹyiwanna de tọn wẹ zọ́n bọ a tindo nuhudo homẹmimiọn tọn. Robert dọmọ: “To whenue visunnu ṣie kú to asidan agahun tọn de mẹ, odlọ wẹ e di na mi to tintan whenu. Enẹgodo, n’biọ awufiẹsa mẹ, yèdọ awufiẹsa he Biblu yijlẹdo ohí gaa de he sọ́mẹ luntọ́n go.”—Luku 2:35.

Robert, Luis, Raquel, gọna Julian mọ homẹmiọnnamẹ yí, etlẹ yin to ninọmẹ ayimajai tọn enẹlẹ mẹ. Yé mọ ẹn yí sọn Omẹ dagbe hugan lọ dè—enẹ wẹ Jiwheyẹwhe Ganhunupotọ lọ. Nawẹ e nọ miọnhomẹnamẹ gbọn? Be e na miọnhomẹna hiẹ lọsu ya?