1. Dọdai tẹwẹ Isaia dọ gando Jesu go, podọ naegbọn ehe do yin tulinamẹnu?

DỌDAI Isaia tọn he gando Oklunọ mítọn Jesu Klisti go vọ́ jide na mí bosọ na mí todido. Isaia dọ dọdai dọ Jesu “ma na nọ dawhẹ sọgbe hẹ awusọhia nukunta tọn, kavi wọhẹmẹ to dodonu nuhe e sè poun lẹ tọn ji. E na nọ dawhẹ jijlọ na agbátọnọ.” (Isa. 11:3, 4) Naegbọn ehe do yin tulinamẹnu? Na mí to gbẹnọ to aihọn he gọ́ na mẹnukuntahopọn po nuvẹun po de mẹ wutu. Mímẹpo wẹ to nukundo Whẹdatọ pipé lọ vẹkuvẹku, yèdọ mẹhe ma na pọ́n awusọhia gbonu tọn gbede nado dawhẹna mí!

2. Etẹwẹ Jesu degbena mí nado wà, podọ etẹ ji wẹ mí na dọhodo to hosọ ehe mẹ?

² Egbesọegbesọ wẹ mí nọ wleawuna pọndohlan de gando mẹdevo lẹ go. Ṣigba, taidi gbẹtọvi mapenọ lẹ, mí ma tindo nugopipe nado nọ dawhẹ pipé dile Jesu nọ wà do. Nuhe sọawuhia to nukunta nọ yawu yinuwado mí ji. Amọ́, to whenue Jesu to aigba ji, e degbe dọmọ: “Mì sọ pọ́n awusọhia gbonu tọn do dawhẹ ba blo, ṣigba mì nọ yí dodo do dawhẹ.” (Joh. 7:24) E họnwun dọ Jesu jlo dọ mí ni taidi emi, bo ma nọ pọ́n awusọhia gbonu tọn mẹdevo lẹ tọn do dawhẹna yé blo. To hosọ ehe mẹ, mí na gbadopọnna adà atọ̀n delẹ he mẹ nuhe nọ sọawuhia to nukunta nọ saba yinuwado gbẹtọ lẹ ji te: sinmẹ agbasa tọn kavi akọ̀, adọkun po owhe po. To adà dopodopo  mẹ, mí na dọhodo aliho yọ́n-na-yizan he mẹ mí na setonuna gbedide Jesu tọn te delẹ ji.

3, 4. (a) Nujijọ tẹlẹ wẹ whàn apọsteli Pita nado vọ́ pọndohlan etọn gando Kosi lẹ go gbeje pọ́n? (Pọ́n yẹdide he tin to bẹjẹeji hosọ ehe tọn.) (b) Nugbo yọyọ tẹ mẹ wẹ Jehovah gọalọna Pita nado mọnukunnujẹ?

³ Yí nukun homẹ tọn do pọ́n linlẹn he na ko wá ayiha mẹ na apọsteli Pita lẹ to whenue e yin oylọ-basina nado yì owhé Kọneliọsi he yin Kosi de tọn gbè to Sesalea. (Owalọ 10:17-29) Taidi Ju ojlẹ etọn mẹ tọn devo lẹ, Pita yise sọn ovu whenu dọ Kosi lẹ yin mawé. Ṣigba, e wá mọ nujijọ delẹ he whàn ẹn nado vọ́ pọndohlan etọn gbeje pọ́n. Di apajlẹ, Pita ṣẹṣẹ mọ numimọ de to azọ́njiawu-liho. (Owalọ 10:9-16) Etẹwẹ ewọ mọ? E mọ núzinzan he taidi alavọ de, ehe gọ́ na kanlin mawé lẹ he yin hinhẹn jẹte wá odò to nukọn etọn, bọ ogbè de sọn olọn mẹ dọmọ: “Pita, fọ́n bo hù bosọ dù!” Whla atọ̀n plipli wẹ Pita yí nujikudo do gbẹ́. Whla atọ̀n he e gbẹ́ lẹpo wẹ ogbè he wá sọn olọn mẹ lọ dọna ẹn ma nado “sọ ylọ nuhe Jiwheyẹwhe ko klọ́we lẹ dọ mawé ba blo.” To whenue e fọ́n to numimọ lọ godo, Pita biọ bẹwlu mẹ gando nuhe ogbè he e sè lọ to tintẹnpọn nado dọna ẹn go. Tlolo to enẹgodo, wẹnsagun lẹ wá sọn Kọneliọsi dè. To whenue Pita ko mọ anademẹ yí sọn gbigbọ wiwe dè godo, e yawu setonu bo hodo wẹnsagun lọ lẹ yì owhé Kọneliọsi tọn gbè.

⁴ Eyin Pita ko pọ́n awusọhia gbonu tọn poun do dawhẹ dai wẹ, e ma na ko biọ owhé Kọneliọsi tọn gbè pọ́n gbede. Ju lẹ ma nọ biọ owhé Kosi lẹ tọn gbè paali. Naegbọn Pita do setonu mahopọnna dọ nuvẹun doadọ̀do to ahun etọn mẹ? Numimọ he Pita mọ po jidevọnamẹ he gbigbọ wiwe na ẹn po wẹ yinuwadeji sisosiso. To whenue e ko dotoaina nuhe Kọneliọsi dọ godo, ayihaawe ma tin dọ nuhe e sè lọ whàn ẹn nado dọ to gbọdo glọ dọmọ: “Todin, yẹn ko mọ nugbonugbo dọ Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, mẹhe nọ dibusi i bo nọ wà dodo wẹ e nọ kẹalọyi.” (Owalọ 10:34, 35) Nukunnumọjẹnumẹ yọyọ nankọ die ehe yin na Pita—yèdọ nukunnumọjẹnumẹ ojlofọndotenamẹ tọn de he na tindo kọdetọn he gbloada! Nawẹ nugbo he gando mẹnukuntamahopọn go ehe dù Klistiani lẹpo gbọn?

5. (a) Etẹ mẹ wẹ Jehovah jlo dọ Klistiani lẹpo ni mọnukunnujẹ? (b) Mahopọnna dọ mí yọ́n nugbo lọ, etẹwẹ sọgan gbẹ́ pò to ahun mítọn mẹ?

⁵ Gbọn Pita gblamẹ, Jehovah to alọgọna Klistiani lẹpo nado mọnukunnujẹemẹ dọ Emi ma nọ homẹnukuntapọn. E ma nọ na ayidonugo vogbingbọn sinmẹ agbasa tọn, akọ̀, otò, akọta, kavi ogbè tọn lẹ. Sunnu kavi yọnnu depope he dibusi Jiwheyẹwhe bo nọ wà nuhe sọgbe wẹ e nọ kẹalọyi. (Gal. 3:26-28; Osọ. 7:9, 10) Ayihaawe ma tin dọ a kẹalọyi dọ nugbo wẹ ehe. Ṣigba, etẹwẹ lo eyin a whẹ́n to owhé kavi otò he mẹ nuvẹun sù te de? Dile a tlẹ sọgan nọ lẹndọ emi ma nọ homẹnukuntapọn, nuvẹun sọgan gbẹ́ pò to ahun towe mẹ. Pita lọsu he tlẹ tindo lẹblanulọkẹyi lọ nado dehia dọ Jehovah ma nọ homẹnukuntapọn, wá do nuvẹun hia to nukọn mẹ. (Gal. 2:11-14) Nawẹ mí sọgan dotoaina Jesu bo doalọtena whẹdanamẹ sọgbe hẹ awusọhia gbonu tọn gbọn?

6. (a) Etẹlẹ wẹ sọgan gọalọna mí nado họ̀nadọna ayilinlẹn nuvẹun tọn lẹ sọn ahun mítọn mẹ? (b) Etẹwẹ sọawuhia to linlin he mẹho agun tọn de na mẹ?

⁶ Mí dona yí Ohó Jiwheyẹwhe tọn do gbeje míde pọ́n po sọwhiwhe po, nado yọnẹn eyin mí gbẹ́ tindo linlẹn kavi numọtolanmẹ nuvẹun tọn depope. (Salm. 119:105) Humọ, mí gán do hudo alọgọ owanyinọ mẹdevo lẹ tọn he sọgan doayi walọyizan nuvẹun tọn he mí tindo lẹ go, eyin mílọsu ma tlẹ yọnẹn. (Gal. 2:11, 14) E sọgan yindọ walọyizan enẹlẹ ko doadọ̀do to ahun mítọn mẹ sọmọ bọ mílọsu ma nọ doayi e go. Di apajlẹ, lẹnnupọndo mẹho agun tọn de ji he na linlin hlan alahọ mẹ gando asu po asi po apajlẹ dagbenọ he to sinsẹ̀nzọn whenu-gigọ́ tọn mẹ de go. Asu lọ wá sọn akọ̀  pẹvi he mẹsusu nọ saba yí nukunpẹvi do pọ́n de mẹ. E taidi dọ mẹho agun tọn lọ ma yọnẹn dọ emi tindo nuvẹun gando akọ̀ ehe go. To linlin etọn mẹ, e dọ nudagbe susu gando asu lọ go; ṣigba e dotana dole: “Mahopọnna dọ [otò le-le] mẹ wẹ e wá sọn, nuyiwa etọn lẹ po aliho gbẹninọ tọn etọn po nọ gọalọna mẹdevo lẹ nado mọnukunnujẹemẹ dọ eyin mẹde wá [sọn akọ̀ ehe mẹ], enẹ ma dohia dandan dọ mẹlọ kudiho, bo ma hunnukun dile susu mẹhe wá sọn akọ̀ [ehe] mẹ lẹ tọn te.” Be a mọ nuagokun lọ ya? Mahopọnna azọngban depope he mí tindo, mí dona nọ yí sọwhiwhe do gbeje míde pọ́n, bo wleawufo nado kẹalọyi alọgọ; gbọnmọ dali, mí sọgan doayi nuvẹun depope he gbẹ́ pò to ahun mítọn mẹ go. Nudevo tẹwẹ mí sọgan wà?

7. Nawẹ mí sọgan dohia dọ mí to ahun mítọn hùndonuvo gbọn?

⁷ Eyin mí hùn ahun mítọn donuvo, mí na na dotẹnmẹ owanyi nado diọtẹnna nuvẹun. (2 Kọl. 6:11-13) Be a tindo aṣa lọ nado nọ dogbẹ́ pẹkipẹki hẹ mẹhe tindo sinmẹ agbasa tọn towe, wá sọn akọ̀ kavi otò towe mẹ, kavi nọ do ogbè towe lẹ kẹdẹ wẹ ya? Eyin mọ wẹ, nọ hùndonuvo. Naegbọn a ma na basi oylọna mẹhe wá sọn otò he gbọnvona towe mẹ lẹ nado wazọ́n hẹ we to lizọnyizọn lọ mẹ kavi ylọ yé wá owhé towe gbè nado dùnú dopọ hẹ we kavi na nuwiwa pọmẹ tọn de? (Owalọ 16:14, 15) Eyin a nọ wàmọ, a na hẹn ahun towe gọ́ na owanyi sọmọ bọ nuvẹun ma na mọtẹn. Ṣigba, adà devo lẹ tin he mẹ mí nọ pọ́n awusọhia gbonu tọn mẹdevo lẹ tọn do dawhẹna yé te. Todin, mì gbọ mí ni dọhodo adọkunnu agbasa tọn lẹ ji.

8. To kọndopọ mẹ hẹ Levitiku 19:15, nawẹ adọkunnọ kavi wamọnọ he mẹde yin sọgan yinuwado pọndohlan he mí nọ tindo gandego ji gbọn?

⁸ Adọkunnu agbasa tọn lẹ yin onú devo he sọgan yinuwado pọndohlan mítọn gando mẹdevo lẹ go ji. Levitiku 19:15 dọmọ: “Hiẹ ma dona do mẹnukuntahopọn hia wamọnọ kavi do nukundagbe hia adọkunnọ. Hiẹ dona nọ yí dodowiwa do dawhẹ gbẹtọ hatọ towe tọn.” Ṣigba, nawẹ adọkunnọ kavi wamọnọ he mẹde yin sọgan yinuwado nukun he mí nọ yí do pọ́n ẹn ji gbọn?

9. Nugbo he blawu tẹwẹ Sọlomọni kàn, podọ etẹwẹ ehe plọn mí?

⁹ Gbigbọ wiwe whàn Sọlomọni nado kàn nugbo he blawu de gando gbẹtọvi mapenọ lẹ go. To Howhinwhẹn lẹ 14:20 mẹ, e dọmọ: “Wamọnọ nọ yin wangbẹna etlẹ yin gbọn kọmẹnu etọn lẹ dali, ṣigba, họntọn adọkunnọ tọn lẹ nọ sù.” Etẹwẹ howhinwhẹn ehe plọn mí? Eyin mí ma to aṣeji, mí sọgan nọ jlo nado jihọntọn hẹ mẹmẹsunnu adọkunnọ lẹ bo nọ dapana mẹmẹsunnu he yin wamọnọ lẹ. Naegbọn e do yin owùnu sọmọ nado nọ ze nukun he mí nọ yí do pọ́n mẹdevo lẹ sinai do adọkunnu agbasa tọn he yé tindo lẹ kẹdẹ ji?

10. Nuhahun tẹ go wẹ Jakọbu doayi?

¹⁰ Eyin mí nọ dawhẹna mẹdevo lẹ sọgbe hẹ adọkun yetọn, mí sọgan hẹn kinklan wá agun mẹ. Devi Jakọbu na avase dọ nuhahun ehe to kinklan hẹnwa agun delẹ mẹ to owhe kanweko tintan whenu. (Hia Jakọbu 2:1-4.) Mí dona to aṣeji ma nado na dotẹnmẹ ayilinlẹn enẹ nado yinuwado agun mítọn lẹ ji to egbehe. Nawẹ mí sọgan hoavùn sọta whẹdanamẹ mọnkọtọn lẹ he nọ sinai do awusọhia gbonu tọn ji gbọn?

11. Be nutindo agbasa tọn mẹde tọn lẹ nọ yinuwado haṣinṣan etọn hẹ Jehovah ji wẹ ya? Basi zẹẹmẹ.

¹¹ Mí dona nọ pọ́n mẹmẹsunnu mítọn lẹ dile Jehovah nọ wà do. Jehovah ma nọ pọ́n mẹde di mẹhe họakuẹ na adọkunnọ kavi wamọnọ he e yin wutu. Haṣinṣan mítọn hẹ Jehovah ma na sinai do lehe agbasanu he mí tindo lẹ sù kavi whè sọ do ji gbede. Dile etlẹ yindọ Jesu dọ dọ, “e na vẹawuna adọkunnọ de nado biọ Ahọluduta olọn tọn mẹ,” e ma dọ dọ enẹ ma na yọnbasi gba. (Mat. 19:23) To alọ devo mẹ, Jesu sọ dọmọ: “Ayajẹnọ wẹ mì wamọnọ lẹ, na mìtọn wẹ Ahọluduta Jiwheyẹwhe tọn.” (Luku  6:20) Ṣigba, ehe ma zẹẹmẹdo dọ wamọnọ lẹpo wẹ yin didona to aliho vonọtaun de mẹ bo kẹalọyi nuplọnmẹ Jesu tọn lẹ gba. Wamọnọ susu ma kẹalọyi. Nuagokun lọ wẹ yindọ, Mí ma dona nọ pọ́n nutindo agbasa tọn he mẹde tindo lẹ do dawhẹna ẹn gando haṣinṣan etọn hẹ Jehovah go.

12. Anademẹ tẹwẹ Owe-wiwe lẹ na adọkunnọ lẹ po wamọnọ lẹ po?

¹² Dona de wẹ e yin na mí nado tindo mẹmẹsunnu gọna mẹmẹyọnnu susu he yin wamọnọ po adọkunnọ po, bo yiwanna Jehovah bosọ nọ sẹ̀n ẹn po ahun lẹpo po lẹ. Owe-wiwe lẹ na ayinamẹ mẹhe yin adọkunnọ lẹ “ma nado ze todido yetọn sinai do adọkun he ma tindo jidide lẹ ji, ṣigba do Jiwheyẹwhe ji.” (Hia 1 Timoti 6:17-19.) To ojlẹ dopolọ mẹ, Ohó Jiwheyẹwhe tọn dotuhomẹna omẹ Jiwheyẹwhe tọn lẹpo, yèdọ adọkunnọ po wamọnọ po, nado payi ma nado yiwanna akuẹ. (1 Tim. 6:9, 10) Na nugbo tọn, eyin mí hùn nukun mítọn lẹ bo pọ́n mẹmẹsunnu mítọn lẹ dile Jehovah nọ pọ́n yé do, mí ma na yin whiwhlepọn nado dawhẹna yé na yé tindo agbasanu lẹ kavi ma tindo poun wutu. Ṣigba, etẹwẹ dogbọn owhe mẹde tọn dali? Be dodonu he sọgbe de wẹ enẹ yin nado dawhẹna mẹdevo lẹ ya? Mì gbọ mí ni pọ́n.

13. Etẹwẹ Owe-wiwe lẹ plọn mí gando sisi didohia mẹhomẹ lẹ go?

¹³ Owe-wiwe lẹ nọ saba plọn mí nado nọ do sisi he sọgbe hia mẹhomẹ lẹ. Levitiku 19:32 dọmọ: “Mì dona nọ fọnṣite to mẹhe tindo owhà nukọn, podọ mì dona nọ gbògbéna mẹhe yin mẹhomẹ, podọ mì dona nọ dibusi Jiwheyẹwhe mìtọn.” Howhinwhẹn lẹ 16:31 plọn mí nudopolọ dọ, “jẹgbakun whanpẹ tọn de wẹ owhà yin to whenuena mẹde tindo e to aliho dodo tọn ji.” Enẹgodo, Paulu lọsu dotuhomẹna Timoti ma nado gbẹnuna sunnu mẹhomẹ de sinsinyẹn, ṣigba nado nọ pọ́n mẹmẹsunnu mẹhomẹ lẹ hlan taidi otọ́. (1 Tim. 5:1, 2) Dile etlẹ yindọ Timoti tindo aṣẹpipa do mẹmẹsunnu mẹhomẹ enẹlẹ ji jẹ obá de mẹ, ewọ dona yí awuvẹmẹ po sisi po do yinuwa hẹ yé.

14. Ninọmẹ tẹ mẹ wẹ e sọgan sọgbe dọ mí ni na ayinamẹ he jẹ kavi domẹplọnlọ mẹhe yin mẹho na mí de go te?

¹⁴ Ṣigba, obá tẹ mẹ wẹ mí na hodo nunọwhinnusẹ́n enẹ jẹ? Di apajlẹ, be mí dona mọdọ mí tin to dandannu glọ nado kọngbedopọ hẹ mẹhomẹ de, eyin e nọ desọn ojlo mẹ bo nọ waylando kavi nọ nọgodona nude he Jehovah gbẹwanna wẹ ya? Jehovah ma na pọ́n awusọhia gbonu tọn do dawhẹ, podọ eyin mẹde waylando sọn ojlo mẹ wá, Ewọ ma na suwhẹna mẹlọ na e yin mẹhomẹ de wutu poun gba. Doayi nunọwhinnusẹ́n he tin to Isaia 65:20 mẹ go: “Ylandonọ na kú na dẹ̀hodo wutu, eyin ewọ tlẹ tindo owhe kanweko.” Nunọwhinnusẹ́n mọnkọtọn de yin zẹẹmẹ-basina to numimọ Ezekiẹli tọn mẹ. (Ezek. 9:5-7) Enẹwutu, nuhe dona nọ duahunmẹna mí hugan to whelẹponu wẹ nado do sisi hia Mẹhe Ko Tin sọn Hohowhenu lọ, yèdọ Jehovah Jiwheyẹwhe. (Dan. 7:9, 10, 13, 14) Eyin mí nọ wàmọ, mí ma na nọ dibu nado wọhẹ mẹhe do hudo ayinamẹ tọn de, mahopọnna owhe mẹlọ tọn.—Gal. 6:1.

15. Etẹwẹ mí plọn sọn apajlẹ apọsteli Paulu tọn mẹ gando sisi didohia mẹmẹsunnu jọja lẹ go?

¹⁵ Etẹwẹ lo na nuhe dù mẹmẹsunnu jọja lẹ to agun mẹ? Nukun tẹwẹ a nọ yí do pọ́n yé? Apọsteli Paulu wlan hlan jọja Timoti dọmọ: “A dike mẹdepope yí nukunpẹvi do pọ́n jọja-yinyin towe gbede blo. Kakatimọ, lẹzun apajlẹ de na nugbonọ lẹ to hodidọ mẹ, to walọyizan mẹ, to owanyi mẹ, to yise mẹ, to walọ wiwe mẹ.” (1 Tim. 4:12) To ojlẹ he mẹ Paulu kàn hogbe ehelẹ te, Timoti sọgan ko tindo nudi owhe 30. Etomọṣo, Paulu ze azọngban pinpẹn lẹ do alọmẹ na ẹn. Mahopọnna whẹwhinwhẹ́n tangan he wutu ayinamẹ ehe do yin nina, nuagokun lọ họnwun. Mí ma dona nọ pọ́n owhe he mẹmẹsunnu jọja lẹ tindo  poun do dawhẹna yé. Mí na wà dagbe nado nọ flindọ nudi owhe 30 wẹ Oklunọ mítọn Jesu lọsu tindo to whenue e bẹ lizọnyizọn aigba ji tọn etọn jẹeji.

16, 17. (a) Nawẹ mẹho lẹ nọ wá tadona kọ̀n dọ mẹmẹsunnu de pegan nado yin pipà taidi devizọnwatọ kavi mẹho agun tọn gbọn? (b) Nawẹ pọndohlan mẹdetiti tọn kavi aṣa tọn mítọn lẹ sọgan jẹagọdo Owe-wiwe lẹ gbọn?

¹⁶ Vlavo to aṣa he mẹ mí wá sọn, gbẹtọ lẹ tindo ayilinlẹn lọ nado nọ yí nukunpẹvi do pọ́n jọja sunnu lẹ. Eyin mọ wẹ, mẹho agun tọn lẹ sọgan nọ whleawu nado nọ pà jọja he pegan lẹ taidi devizọnwatọ kavi mẹho. E na yọ́n dọ mẹho agun tọn lẹpo ni nọ flindọ Owe-wiwe lẹ ma dọ owhe tangan he sunnu de dona tindo nado yin pipà taidi devizọnwatọ kavi mẹho. (1 Tim. 3:1-10, 12, 13; Titu 1:5-9) Eyin mẹho agun tọn de do osẹ́n de ai sọgbe hẹ aṣa he mẹ e wá sọn, ewọ ma to nuyiwa sọgbe hẹ Owe-wiwe lẹ. Jọja sunnu lẹ dona nọ yin gbigbejepọn, e ma yin to dodonu pọndohlan mẹdetiti tọn kavi aṣa tọn ji gba, ṣigba sọgbe hẹ nujinọtedo Ohó Jiwheyẹwhe tọn lẹ tọn.—2 Tim. 3:16, 17.

¹⁷ Lẹnnupọndo lehe pọndohlan aṣa tọn he ma sinai do Owe-wiwe ji enẹlẹ sọgan dọ̀n mẹmẹsunnu he pegan lẹ dogodo do ji. To otò de mẹ, azọngban pinpẹn lẹ yin zizedo alọmẹ na devizọnwatọ he pegan ganji de. Dile etlẹ yindọ mẹho he to agun etọn mẹ lẹ kẹalọyi dọ mẹmẹsunnu jọja lọ jẹ nubiọtomẹsi Owe-wiwe lẹ tọn na mẹho agun tọn lẹ kọ̀n jẹ obá he sọgbe hẹ lẹnpọn dagbe mẹ, e ma yin zizedo hukan ji nado yin pipà di mẹho. Mẹho agun tọn delẹ he owhe yetọn hú mẹho agun tọn he pò lẹ tọn tẹkudeji dọ, e taidi dọ mẹmẹsunnu jọja lọ gbẹ́ whè gbau nado yin pinpọnhlan di mẹho agun tọn. E blawu dọ mẹmẹsunnu lọ ma yin pipà, na awusọhia etọn poun wutu. Dile etlẹ yindọ numimọ dopo poun wẹ ehe yin, linlin lẹ dohia dọ aliho nulẹnpọn tọn ehe nọ yinuwado mẹsusu ji to awà voovo aihọn lọ tọn lẹ ji. Lehe e yin nujọnu do sọ nado nọ ganjẹ Owe-wiwe lẹ go kakati nido yin pọndohlan mẹdetiti tọn kavi aṣa tọn mítọn lẹ! Aliho dopo gee lọ niyẹn nado setonuna Jesu bo doalọtena whẹdanamẹ sọgbe hẹ awusọhia gbonu tọn.

18, 19. Etẹwẹ e nọ biọ to mí si nado nọ pọ́n mẹdevo lẹ hlan dile Jehovah nọ wà do?

¹⁸ Mahopọnna dọ mí yin mapenọ, mí sọgan plọn nado nọ pọ́n mẹdevo lẹ hlan matin mẹnukuntahihopọn dile Jehovah nọ wà do. (Owalọ 10:34, 35) Ṣigba, enẹ nọ biọ dọ mí ni to vivẹnudo madoalọte bosọ nọ to nuflinmẹ lẹ mọyi sọn Ohó Jiwheyẹwhe tọn mẹ gbọzangbọzan. Eyin mí nọ yí nuflinmẹ enẹlẹ do yizan mẹ, mí na to tonusena gbedide Jesu tọn lọ nado doalọtena awusọhia gbonu tọn pinpọn do dawhẹ.—Joh. 7:24.

¹⁹ To madẹnmẹ, Ahọlu mítọn Jesu Klisti na dawhẹna gbẹtọvi lẹpo, e ma yin sọgbe hẹ nuhe sọawuhia to nukunta kavi nuhe otó etọn lẹ sè gba, ṣigba e na yí dodo do dawhẹ. (Isa. 11:3, 4) Lehe enẹ na yọ́n do sọ!