1. Nujikudo tẹwẹ mẹjitọ Klistiani lẹ nọ jlo na tindo whẹpo ovi yetọn lẹ nido yí baptẹm?

“NA OSUN lẹ, n’nọ to didọna Papa po Mama po dọ n’jlo na yí baptẹm, bọ yé nọ saba dọhodeji hẹ mi. Yé jlo na hẹn ẹn diun dọ n’yọ́n obá he mẹ nudide ṣie sinyẹn jẹ. To 31 décembre 1934 wẹ azán pé na nujijọ ayidego tọn gbẹzan ṣie tọn ehe.” Lehe mẹmẹyọnnu Blossom Brandt basi zẹẹmẹ nuhe jọ to whenue e basi nudide nado yí baptẹm lẹ tọn do niyẹn. To egbehe, ojlo dopolọ wẹ mẹjitọ Klistiani lẹ nọ tindo dile yé to alọgọna ovi yetọn lẹ nado basi nudide nuyọnẹn tọn lẹ. Nado sẹ̀ baptẹm-yíyí donukọn kavi nado hẹn ẹn dọngbàn na whẹwhinwhẹ́n he ma yin dandan tọn lẹ wutu sọgan hẹn nuhahun lẹ wá to gbigbọ-liho. (Jak. 4:17) Etomọṣo, mẹjitọ lẹ nọ gbọn nuyọnẹn dali jlo na hẹn ẹn diun dọ ovi yetọn lẹ ko wleawufo nado didá azọngban he devi Klisti tọn yinyin bẹhẹn whẹpo do yí baptẹm.

2. (a) Ninọmẹ tẹwẹ nọ duahunmẹna nugopọntọ lẹdo tọn delẹ? (b) Etẹwẹ mí na gbadopọnna to hosọ ehe mẹ?

² Ninọmẹ he nọ duahunmẹna nugopọntọ lẹdo tọn delẹ wẹ yindọ,  yé nọ mọ jọja he ko sẹpọ vivọnu owhe aflanmẹ tọn gọna dehe ko tindo owhe 20 linlán bo yin pinplọn whẹ́n to whẹndo Klistiani tọn mẹ delẹ bọ yé ma tlẹ ko nọ yí baptẹm. Suhugan jọja enẹlẹ tọn wẹ nọ wá opli agun tọn lẹ bosọ nọ tindo mahẹ to lizọnyizọn lọ mẹ. Yé nọ mọ yede di Kunnudetọ Jehovah tọn lẹ. Etomọṣo, na whẹwhinwhẹ́n delẹ wutu, yé to yonu dọ̀n dogodo nado klan gbẹzan yetọn do wiwe hlan Jehovah bo yí baptẹm. Etẹwẹ sọgan ko yin whẹwhinwhẹ́n lọ? To whẹho delẹ mẹ, mẹjitọ lẹ wẹ na yé tuli nado dọngbàn whẹpo do yí baptẹm. To hosọ ehe mẹ, mí na gbadopọnna ahunmẹdunamẹnu ẹnẹ he nọ zọ́n bọ mẹjitọ Klistiani delẹ ma nọ gọalọna ovi yetọn lẹ nado yinukọn jẹ baptẹm kọ̀n.

3. Etẹwẹ to ahunmẹduna mẹjitọ Blossom tọn lẹ?

³ Nuhe to ahunmẹduna mẹjitọ Blossom he yin nùdego to hukan tintan mẹ tọn lẹ wẹ nado hẹn ẹn diun dọ viyọnnu yetọn ko whẹ́n jẹ obá lọ mẹ nado mọnukunnujẹ lehe baptẹm yin nujọnu bosọ yin nudide titengbe de do mẹ, podọ ehe sọgbe. Nawẹ mẹjitọ lẹ sọgan yọnẹn gbọn eyin ovi de ko pegan nado basi klandowiwe nujọnu tọn?

4. Nawẹ gbedide Jesu tọn he tin to Matiu 28:19, 20 mẹ sọgan gọalọna mẹjitọ lẹ to ovi yetọn lẹ pinplọn mẹ gbọn?

⁴ Hia Matiu 28:19, 20. Dile hosọ he jẹnukọn dohia do, Biblu ma dọ owhe tangan he mẹde dona tindo whẹpo do yí baptẹm. Ṣigba, e sọgan yin alenu na mẹjitọ lẹ nado lẹnnupọndo nuhe e zẹẹmẹdo nado hẹn mẹde zun devi ji. Hogbe Glẹkigbe tọn he yin lilẹdo “hẹn . . . zun devi” to Matiu 28:19 mẹ, sọgan zẹẹmẹdo nado plọnnumẹ po linlẹn lọ po nado hẹn mẹlọ zun nuplọntọ kavi devi. Devi de yin mẹde he plọnnu bo mọnukunnujẹ nuplọnmẹ Jesu tọn lẹ mẹ bosọ magbe nado nọgbẹ̀ sọgbe hẹ yé. Enẹwutu, yanwle mẹjitọ Klistiani lẹpo tọn dona yin nado plọn ovi yetọn lẹ sọn ovu whenu po linlẹn lọ po nado gọalọna yé nado lẹzun devi Klisti tọn he yí baptẹm lẹ. E họnwun dọ ovivu de ma na pegan nado yí baptẹm. Etomọṣo, Biblu dohia dọ jọja he ma tlẹ ko whẹ́n sọmọ lẹ sọgan mọnukunnujẹ nugbo Biblu tọn lẹ mẹ bosọ yọ́n pinpẹn yetọn.

5, 6. (a) Sọgbe hẹ zẹẹmẹ he Biblu basi do Timoti ji, tadona tẹ kọ̀n wẹ mí sọgan wá gando baptẹm etọn go? (b) Nawẹ mẹjitọ he tindo wuntuntun lẹ sọgan gọalọna ovi yetọn lẹ po kọdetọn dagbe po gbọn?

⁵ Timoti yin devi de he hẹn nugbo lọ zun edetiti tọn to whenue e gbẹ́ yin jọja. Apọsteli Paulu dọ dọ Timoti ko plọn nugbo Biblu tọn lẹ sọn ovu whenu. Dile etlẹ yindọ Timoti yin pinplọn whẹ́n to whẹndo he klan to sinsẹ̀n-liho de mẹ, onọ̀ po onọ̀-daho etọn he yin Juvi lẹ po gọalọna ẹn nado wleawuna pinpẹn-nutọn-yinyọnẹn na Owe-wiwe lẹ, sọgbe hẹ nukunnumọjẹnumẹ Ju lẹ tọn. Taidi kọdetọn de, e tindo yise he dolido. (2 Tim. 1:5; 3:14, 15) To whenue Timoti sẹpọ vivọnu owhe aflanmẹ tọn kavi tindo owhe 20 linlán, ewọ lẹzun devi Klisti tọn de he ji yè sọgan lẹnnupọndo na lẹblanulọkẹyi vonọtaun lẹ to agun mẹ.—Owalọ 16:1-3.

⁶ Na nugbo tọn, ovi lẹ nọ gbọnvo, ovi de sọgan yawu whèwhín jẹnukọnna devo, podọ obá voovo mẹ wẹ yé nọ whèwhín jẹ. Ovi delẹ nọ mọnukunnujẹ nugbo lọ mẹ, nọ basi nudide nuyọnẹn tọn lẹ bosọ nọ do ojlo hia nado yí baptẹm to jọja whenu. Ovi devo lẹ sọgan nọma wleawufo na baptẹm kakajẹ whenue yé ko whẹ́n. Enẹwutu, mẹjitọ he tindo wuntuntun lẹ ma nọ gbidikọna ovi yetọn lẹ nado yí baptẹm. Kakatimọ, yé nọ gọalọna ovi dopodopo nado yinukọn to gbigbọ-liho sọgbe hẹ owhe po nukọnyiyi etọn po. Mẹjitọ lẹ sọgan jaya eyin ovi de nọ hẹn nunọwhinnusẹ́n he tin to Howhinwhẹn lẹ 27:11 mẹ do ayiha mẹ. (Hia.) Etomọṣo, yé ma dona wọnji yanwle yetọn go gbede—enẹ wẹ nado hẹn ovi yetọn lẹ zun devi Klisti tọn lẹ. Po ehe po to ayiha mẹ, e na yọ́n dọ mẹjitọ lẹ ni lẹnnupọndo kanbiọ  lọ ji dọ, ‘Be ovi ṣie ko tindo oyọnẹn jẹ obá lọ mẹ nado basi klandowiwe hlan Jiwheyẹwhe bo yí baptẹm ya?’

7. Be mẹde dona yọ́n nulẹpo do Biblu ji whẹpo do yí baptẹm wẹ ya? Basi zẹẹmẹ.

⁷ Taidi mẹplọntọ lẹ to whẹndo mẹ, e sọgbe dọ mẹjitọ lẹ nọ jlo dọ ovi yetọn lẹ ni tindo oyọnẹn he dolido, yèdọ dodonu de he ji klandowiwe yetọn na sinai do. Etomọṣo, e ma biọ dọ mẹde ni yọ́n nulẹpo whẹpo do basi klandowiwe hlan Jiwheyẹwhe bo yí baptẹm. To baptẹm godo, devi lẹpo wẹ dona to nukọnzindo to oyọnẹn he pegan tintindo mẹ. (Hia Kolosinu lẹ 1:9, 10.) Enẹwutu, etẹlẹ wẹ e biọ dọ mẹde ni yọnẹn jẹnukọn?

8, 9. Etẹlẹ wẹ mí sọgan plọn sọn kandai he gando Paulu po gàntọ-ṣọ́tọ lọ po go mẹ?

⁸ Mẹjitọ lẹ sọgan plọnnu sọn numimọ whẹndo owhe kanweko tintan whenu tọn de tọn mẹ. (Owalọ 16:25-33) Paulu dla Filipi pọ́n to gbejizọnlin mẹdehlan tọn etọn awetọ whenu to nudi owhe 50 W.M. To finẹ, ewọ po gbẹdohẹmẹtọ etọn Sila po yin owhẹ̀ agọ̀ sadokọna bo yin wiwle do gànmẹ. To zánmẹ, aigba sisọsisọ de whàn dodonu gànpa lọ tọn lẹ bọ ohọ̀n lẹpo hùndonuvo. Gàntọ-ṣọ́tọ lọ dibu dọ gàntọ lẹ ko họnyi, podọ e ko dibla hù ede whenue Paulu dawhá ylọ ẹ. Paulu po Sila po penugo nado dekunnu na gàntọ-ṣọ́tọ lọ po whẹndo etọn po to aliho dagbe mẹ. Afọdide tẹwẹ pinpẹn-nutọn-yinyọnẹn he yé tindo na nugbo he yé plọn gando Jesu go lẹ whàn yé nado ze? Yé yí baptẹm madọngbàn. Etẹwẹ mí sọgan plọn sọn kandai ehe mẹ?

⁹ Sọgbe hẹ aṣa ojlẹ lọ mẹ tọn, gàntọ-ṣọ́tọ lọ sọgan ko yin awhànfuntọ numimọnọ de he ko biọ gbọjẹ whenu gaa tọn mẹ. Ewọ ma jẹakọ hẹ Owe-wiwe lẹ. Enẹwutu, nado tindo oyọnẹn Owe-wiwe lẹ tọn he dolido de, e na biọ dọ ewọ ni plọn nugbo dodonu tọn Biblu tọn lẹ, mọnukunnujẹ nuhe devizọnwatọ Jiwheyẹwhe tọn de yinyin bẹhẹn mẹ bo magbe nado nọ setonuna nuplọnmẹ Jesu tọn lẹ. To ojlẹ vude godo, nugbo dodonu tọn Owe-wiwe lẹ tọn he e plọn lẹ po pinpẹn-nutọn he e tindo na yé po whàn ẹn nado yí baptẹm. Matin ayihaawe, e zindonukọn nado to oyọnẹn etọn hẹn jideji to baptẹm godo. Po apajlẹ ehe po, etẹwẹ a sọgan wà to whenue hodidọ ovi towe tọn lẹ dohia dọ ewọ tindo pinpẹn-nutọn ahundopo tọn na nuplọnmẹ dodonu tọn Owe-wiwe lẹ tọn, ehe bẹ zẹẹmẹ gọna nujọnu-yinyin klandowiwe po baptẹm po tọn hẹn? Taidi mẹjitọ Klistiani lẹ, mì sọgan wá tadona kọ̀n dọ ewọ sọgan dọnsẹpọ mẹho agun tọn lẹ na yé nido pọ́n eyin e pegan na baptẹm. * Taidi devi devo he ko yí baptẹm lẹ, ewọ na zindonukọn nado to oyọnẹn etọn gando lẹndai Jehovah tọn go hẹn jideji to gbẹzan etọn mẹ, etlẹ yin kakadoi.—Lom. 11:33, 34.

10, 11. (a) Tadona tẹ kọ̀n wẹ mẹjitọ delẹ ko wá? (b) Etẹwẹ dona nọ duahunmẹna mẹjitọ de jẹnukọn?

¹⁰ Mẹjitọ delẹ ko mọdọ e na yọ́n hugan dọ ovi yetọn ni dọngbàn whẹpo do yí baptẹm, na e nido sọgan plọnwe yinukọn dogọ bo tindo agbasazọ́n he pekuẹ de whẹ́. Pọndohlan mọnkọtọn sọgan yin ahundopo tọn, amọ́ be ehe na gọalọna ovi yetọn nado wá tindo kọdetọn dagbe nujọnu tọn ya? Humọ, be ehe sọgbe hẹ Owe-wiwe lẹ ya? Gbẹzan tẹwẹ Ohó Jehovah tọn na tulimẹ nado doafọna?—Hia Yẹwhehodọtọ 12:1.

¹¹ Nujọnu wẹ e yin nado flindọ aihọn ehe po nuhe to e mẹ lẹpo po wẹ jẹagọdo ojlo po linlẹn Jehovah tọn lẹ po. (Jak. 4:7, 8; 1 Joh. 2:15-17; 5:19) Haṣinṣan pẹkipẹki de tintindo  hẹ Jehovah wẹ yin avùnhonu dagbe hugan lọ he na gọalọna ovi de nado nọavùnte sọta Satani gọna aihọn lọ po linlẹn ylankan etọn lẹ po. Eyin mẹjitọ de nọ na tuli ovi etọn nado doafọna yanwle agbasa tọn lẹ jẹnukọn, enẹ sọgan hẹn ovi lọ biọ bẹwlu mẹ bosọ ze haṣinṣan etọn hẹ Jehovah do owù mẹ. Be mẹjitọ Klistiani owanyinọ lẹ na jlo nugbonugbo dọ aihọn ehe ni deanana pọndohlan he ovi yetọn tindo gando kọdetọn dagbe tintindo go ya? Nugbo lọ wẹ yindọ, mí nọ tindo ayajẹ po kọdetọn dagbe nujọnu tọn po, kiki eyin mí ze Jehovah do otẹn tintan mẹ to gbẹzan mítọn mẹ.—Hia Salmu lẹ 1:2, 3.

12. Naegbọn mẹjitọ delẹ nọ jlo dọ ovi yetọn ni sẹ̀ baptẹm-yíyí donukọn?

¹² Onọ̀ Klistiani de basi zẹẹmẹ nuhewutu e ma do jlo dọ viyọnnu etọn ni yí baptẹm tọn dọmọ: “E huwinyan nado dọ, amọ́ whẹwhinwhẹ́n titengbe lọ wẹ whẹho mẹdidesẹ sọn agun mẹ tọn.” Taidi mẹmẹyọnnu enẹ, mẹjitọ delẹ ko lẹndọ e pọnte dọ ovi yetọn ni sẹ̀ baptẹm-yíyí donukọn kakajẹ whenue ewọ na zẹ̀ owhe he mẹ ayilinlẹn ovu whenu tọn nọ sisẹ́ mẹ nado yinuwa po nulú po te go. (Jen. 8:21; Howh. 22:15) Yé sọgan nọ wá tadona kọ̀n dọ, ‘Dẹnsọ lehe ovi ṣie ma na ko yí baptẹm, e ma gán yin didesẹ sọn agun mẹ.’ Naegbọn aliho nulẹnpọn tọn ehe ma do sọgbe?—Jak. 1:22.

13. Be gbàndindọn nado yí baptẹm na zọ́n bọ mẹde ma na dogbè na Jehovah ya? Basi zẹẹmẹ.

¹³ E sọgbe dọ mẹjitọ Klistiani lẹ ma nọ jlo dọ ovi yetọn ni yí baptẹm kakajẹ whenue e whèwhín jẹ obá lọ mẹ nado basi klandowiwe nujọnu tọn de. Ṣigba, nuṣiwa wẹ e na yin nado wá tadona kọ̀n dọ eyin ovi de ma yí baptẹm, e ma na dogbè na Jehovah. Naegbọn mí do dọ mọ? Gbedido na Jehovah ma sinai do baptẹm-yíyí ji. Kakatimọ, ovi de na dogbè na Jiwheyẹwhe eyin ewọ mọnukunnujẹ nuhe yọ́n gọna nuhe ylan to nukun Jehovah tọn mẹ lẹ mẹ. (Hia Jakọbu 4:17.) Enẹwutu, kakati nado hù awàkan na ovi de ma nado yí baptẹm, mẹjitọ nuyọnẹntọ lẹ nọ dovivẹnu nujọnu tọn nado ze apajlẹ dagbe dai. Yé nọ jlo na gọalọna ovi yetọn sọn ovu whenu nado wleawuna pinpẹn-nutọn-yinyọnẹn ahundopo tọn na nujinọtedo yiaga walọ dagbe tọn Jehovah tọn lẹ. (Luku 6:40) Pinpẹn-nutọn mọnkọtọn wẹ yin hihọ́ dagbe hugan lọ, na enẹ na whàn ovi lọ nado tẹdo aliho dodowiwa tọn Jehovah tọn go.—Isa. 35:8.

14. Nawẹ mẹho lẹ sọgan yidogọna vivẹnudido mẹjitọ he to alọgọna ovi yetọn nado yinukọn jẹ baptẹm kọ̀n lẹ tọn gbọn?

¹⁴ Taidi lẹngbọhọtọ gbigbọmẹ tọn lẹ, mẹho agun tọn lẹ sọgan yidogọna vivẹnudido mẹjitọ lẹ tọn gbọn ohó dagbe lẹ didọ gando yanwle gbigbọmẹ tọn lẹ go dali. Mẹmẹyọnnu de he sẹ̀n taidi gbehosọnalitọ na owhe 70 linlán, tindo owhe ṣidopo to whenue e dọho hẹ Mẹmẹsunnu Charles T. Russell, amọ́ ewọ gbẹ́ nọ flin nuyiwadomẹji hodọdopọ enẹ tọn. Mẹmẹyọnnu lọ dọmọ: “E yí nukunwhiwhe 15 zan do dọho hẹ mi do yanwle gbigbọmẹ tọn ṣie lẹ ji.” Na nugbo tọn, hogbe dagbe podọ tulinamẹ tọn lẹ sọgan yinuwadomẹji na ojlẹ dindẹn. (Howh. 25:11) Mẹho lẹ sọgan sọ biọ to mẹjitọ lẹ po ovi yetọn lẹ po si nado tindo mahẹ to tito he gando Plitẹnhọ Ahọluduta tọn go lẹ mẹ, bo nọ deazọ́nna jọja lẹ sọgbe hẹ owhe po nugopipe yetọn lẹ po.

15. Etẹwẹ yin delẹ to aliho he mẹ mẹdevo lẹ to agun lọ mẹ sọgan na tuli jọja lẹ te mẹ?

¹⁵ Hagbẹ agun tọn lẹ sọgan gọalọ gbọn ojlo didohia to jọja lẹ mẹ to aliho he sọgbe mẹ dali. Ehe na biọ dọ yé ni nọ doayi ohia nukọnyiyi gbigbọmẹ tọn jọja lọ lẹ tọn go. Be jọja de na gblọndo ahundopo tọn he do lẹnpọn dagbe hia kavi tindo mahẹ to adà opli osẹ ṣẹnṣẹn tọn de mẹ ya? Be jọja de ko pehẹ whlepọn tenọgligo-hinhẹn tọn de po kọdetọn dagbe po kavi ko yí dotẹnmẹ hundote de zan  nado dekunnu to wehọmẹ ya? Nọ yawu pà ẹ po ahundopo po. Naegbọn a ma na yí do basi yanwle nado nọ dọho hẹ jọja de—jẹnukọnna opli de kavi to vivọnu etọn—nado do ojlo ahundopo tọn he a tindo to ewọ mẹ hia? To aliho enẹ po devo lẹ po mẹ, jọja lẹ sọgan mọ to yede mẹ dọ emi yin apadewhe “agun daho” de tọn.—Salm. 35:18.

16, 17. (a) Nawẹ baptẹm tindo kanṣiṣa hẹ todido mẹde tọn nado mọ ogbẹ̀ to sọgodo gbọn? (b) Ayajẹ nankọ wẹ mẹjitọ Klistiani lẹpo nọ dovivẹnu nado duvivi etọn? (Pọ́n yẹdide he tin to bẹjẹeji hosọ ehe tọn.)

¹⁶ Ovi de go pinpọn whẹ́n to “mẹplọnlọ po tudohomẹnamẹ Jehovah tọn po” mẹ yin dopo to lẹblanulọkẹyi daho hugan he mẹjitọ Klistiani de sọgan tindo lẹ mẹ. (Efe. 6:4; Salm. 127:3) To vogbingbọn mẹ na ovi he nọ akọta Islaeli hohowhenu tọn mẹ lẹ, ovi he mẹjitọ yetọn yin Klistiani lẹ ma yin jiji do akọta he yin kinklandowiwe na Jehovah de mẹ. Humọ, yè ma nọ dugu owanyi na Jiwheyẹwhe po nugbo lọ po tọn. Sọn gbeegbe mẹjitọ lẹ jivi yetọn, linlẹn yetọn dona yin nado hẹn ẹn zun devi gbọn alọgigọna ẹn nado basi klandowiwe bo yí baptẹm taidi devizọnwatọ Jehovah tọn de dali. Nudevo tẹwẹ sọ sọgan yin nujọnu humọ? To popolẹpo mẹ, mẹdopodopo sin klandowiwe mẹdetiti tọn, baptẹm etọn po sinsẹ̀nzọn nugbonọ-yinyin tọn etọn na Jiwheyẹwhe po wẹ na hẹn yọnbasi na ẹn nado yin hiadogona na whlẹngán to nukunbibia daho he ja lọ whenu.—Mat. 24:13.

¹⁷ To whenue Blossom Brandt basi dide nado yí baptẹm, mẹjitọ budisi Jiwheyẹwhe tọ́ etọn lẹ jlo nado hẹn ẹn diun whẹ́ dọ e ko wleawufo nado ze afọdide titengbe hugan ehe to gbẹzan etọn mẹ. Tlolo he yé kudeji dọ ewọ ko wleawufo, yé nọgodona nudide etọn. To ozán he jẹnukọnna baptẹm etọn mẹ, otọ́ etọn wà nude he fọnjlodotenamẹ taun. Blossom dọmọ: “E biọ to mímẹpo si nado jẹklo, podọ e hodẹ̀. E dọna Jehovah dọ homẹ emitọn hùn taun dọ viyọnnu emitọn pẹvi basi nudide nado klan gbẹzan etọn do wiwe hlan Ẹn.” To owhe 60 linlán godo, Blossom wá dọmọ: “Mì sọgan kudeji dọ n’ma na wọn ozán enẹ gbedegbede!” Odẹ̀ mítọn wẹ yindọ, mìwu mẹjitọ lẹ ni duvivi ayajẹ po pekọ po tọn dile mì to mimọ bọ ovi mìtọn lẹ klan yede do wiwe bo yí baptẹm nado lẹzun devizọnwatọ Jehovah tọn lẹ.