NA JỌJA LẸ
11: Azọ́n Sinsinyẹn Wiwà
NUHE E ZẸẸMẸDO
Mẹhe nọ wazọ́n sinsinyẹn ma nọ họ̀nna azọ́n. Kakatimọ, e nọ mọ ayajẹ to azọ́n sinsinyẹn wiwà mẹ nado penukundo ede go bo gọalọna mẹdevo lẹ—eyin e tlẹ yin azọ́n he demẹpò.
NUHEWUTU E YIN NUJỌNU
A jlo po a ma jlo po, azọ́n wẹ yin gbẹtọ. To aihọn de he mẹ mẹsusu ma yiwanna azọ́n sinsinyẹn wiwà te, eyin a nọ wazọ́n sinsinyẹn, a na duale etọn.—Yẹwhehodọtọ 3:13.
“N’wá mọdọ eyin a nọ wazọ́n sinsinyẹn, a na nọ do ayajẹ po pekọ po. Pekọ mọnkọ tintindo ko zọ́n bọ n’wá plọn nado yiwanna azọ́n. Eyin a yiwanna azọ́n, e nasọ gọalọna we nado tindo oyín dagbe.”—Jọja sunnu de he nọ yin Reyon.
AYINAMẸ BIBLU TỌN: “Ale tin to azọ́n sinsinyẹn wunmẹ lẹpo mẹ”—Howhinwhẹn lẹ 14:23.
NUHE A SỌGAN WÀ
Nọ tindo pọndohlan he sọgbe gando azọ́n go gbọn nuhe bọdego lẹ wiwà dali.
Nọ yiwanna nado plọn nulẹ wiwà ganji. Vlavo a to whégbè-zọ́n de wà, to wehọmẹ-zọ́n towe wà, kavi to agbasazọ́n de wà, nọ do ojlo to nuhe wà a te mẹ. Eyin a tlẹ ko yọ́n nude wà ganji, nọ dín aliho lẹ nado wà ẹ ganji dogọ bo nọ wà ẹ po awuyiya po kavi hẹn ẹn pọnte dogọ. Dile a yọ́n azọ́n de sọ, mọ wẹ a na yiwanna azọ́n lọ dogọ do.
AYINAMẸ BIBLU TỌN: “Be a ko mọ dawe azọ́nyọnẹntọ de to azọ́n etọn kọ̀n pọ́n ya? Ahọlu lẹ nukọn wẹ e na nọ nọte te; e ma na nọ nọte to omẹ paa lẹ nukọn.”—Howhinwhẹn lẹ 22:29.
Nọ mọnú zẹ̀ azọ́n towe go. To ninọmẹ susu mẹ, eyin a nọ wà azọ́n towe ganji, e na hẹn ale wá na mẹdevo lẹ. Di apajlẹ, eyin a nọ wà whégbè-zọ́n towe lẹ ganji, a na de azọ́n pò na hagbẹ whẹndo lọ tọn he pò lẹ.
AYINAMẸ BIBLU TỌN: “Ayajẹ sù to nunamẹ mẹ hú to mimọyi mẹ.”—Owalọ lẹ 20:35.
Nọ wà zẹ̀ nuhe yin bibiọ to asi we go. Kakati nado nọ wà nuhe yin bibiọ to asi we poun, nọ wà humọ. Enẹ na dohia dọ, hiẹ lọsu wẹ to anadena gbẹzan towe—bo nọ wà hugan nuhe yin bibiọ to asi we, e ma yin na yè hẹn we gánnugánnu nado wà ẹ wutu gba, amọ́ na hiẹ lọsu wẹ de nado wàmọ.—Matiu 5:41.
AYINAMẸ BIBLU TỌN: “Homẹdagbe didohia towe ma nado yin ehe yè yí huhlọn do hẹnmẹ basi, ṣigba sọn ojlo towe titi mẹ.”—Filemọni 14.
Nọ nọ̀ jlẹkaji. Mẹhe yin azọ́n sinsinyẹnwatọ ma nọ wàdidọ, mọ e masọ nọ yí azọ́n do hù ede. E nọ nọ̀ jlẹkaji bo nọ mọ ayajẹ to azọ́n sinsinyẹn wiwà po gbọjẹ po mẹ.
AYINAMẸ BIBLU TỌN: “Gbọjẹ vude pọnte hú kanvinván zẹjlẹgo po wezundido to jẹhọn godo po.”—Yẹwhehodọtọ 4:6.
A Gán Sọ Pọ́n Hosọ Ehelẹ
FỌ́N!
Lehe A Gán Nọ Zan Whenu Towe po Nuyọnẹn po Do
Aliho dopo nado nọ yí whenu towe zan ganji wẹ nado gbeje adà voovo awe gbẹzan towe tọn delẹ pọ́n. Adà tẹlẹ wẹ?
