Yanwle ma yin odlọ kléwhète tọn de he yè nọ to nukundo dọ e na wá jọ gba. Yanwle jọ yanwle lẹ nọ biọ tito, adàdidiọ, gọna azọ́n sinsinyẹn wiwà, he mẹsusu masọ yiwanna ba.

Yanwle voovo wẹ tin: Yanwle flinflin lẹ (he nọ yí azán kavi osẹ susu), yanwle jlẹmẹ lẹ (osun lẹ), podọ yanwle daho lẹ (owhe dopo kavi humọ). Nado jẹ yanwle daho lẹ kọ̀n, a dona doafọna yanwle jlẹmẹ delẹ.

Yanwle towe lẹ kọ̀n jijẹ gán hẹn we deji dogọ, họntọn towe lẹ na nọ dejido gowe, bọ ayajẹ towe na sudeji.

Jidide: Yanwle flinflin lẹ kọ̀n jijẹ na zọ́n bọ yanwle daho lẹ ma na dobuna we. A nasọ nọ gboadọ to nuhahun egbesọ tọn lẹ nukọn—di apajlẹ to whenue hagbẹ towe lẹ jlo na dọ̀n we do nuhe ma sọgbe mẹ.

Họntọnjiji: Gbẹtọ lẹ nọ jlo nado jihọntọn hẹ mẹhe do yanwle lẹ—mẹhe nọ yọ́n nuhe dín yé te to gbẹ̀mẹ bo nọ dogán nado jẹ e kọ̀n lẹ. Podọ nuhe nọ hẹn họntọn lẹ vẹ́ dogọ wẹ nado wazọ́n dopọ na yanwle dopolọ.

Ayajẹ: Eyin a do yanwle bo jẹ e kọ̀n, homẹ towe na hùn.

“N’yiwanna nado nọ do yanwle. E nọ hẹn alọnu ṣie ján bọ n’nọ to jejeji nado jẹ e kọ̀n. Podọ eyin yè jẹ yanwle de kọ̀n, e nọ vivi namẹ sọmọ bọ yè nọ dọ, ‘N’ma gán yise! N’dọ bo bayi nugbo.’”—Jọja sunnu de he nọ yin Christopher.

AYINAMẸ BIBLU TỌN: “Mẹhe nọ na ayidonugo jẹhọn ma na donú, podọ mẹhe to aslọ lẹ pọ́n ma na gbẹ̀n jinukun.”​—Yẹwhehodọtọ 11:4.

Ze afọdide ehelẹ nado jẹ yanwle towe lẹ kọ̀n.

Do yanwle. Slẹ yanwle delẹ bo ze ayiha do dehe kọ̀n a na jẹ whẹ́ ji, dehe na bọdego lẹ po mọmọ po sọyi.

Bayi tito. Ze afọdide he bọdego lẹ na yanwle dopodopo:

• De ojlẹ he sọgbe nado jẹ e kọ̀n.

• Lẹnnupọndo nuhe e na biọ lẹ ji.

• Lẹnnupọndo nuhahun lẹ po lehe a gán duto yé ji do po ji.

Yinuwa. Ma lẹndọ nulẹpo wẹ na sọgbe whẹpo a nado jẹ vivẹnudo ji na yanwle towe blo. Kanse dewe dọ, ‘Etẹwẹ yin onú tintan he n’gán wà nado jẹ yanwle ṣie kọ̀n?’ Enẹgodo, bayi nulọ. To afọdide dopodopo godo, nọ pọ́n fie a ko yinukọn jẹ to yanwle towe mẹ.

AYINAMẸ BIBLU TỌN: “Tito mẹhe nọ dovivẹnu tọn lẹ nọ tindo kọdetọn dagbe dandan.”​—Howhinwhẹn lẹ 21:5.