Be A Do Nuvẹun Wẹ A?
Nuvẹun taidi azọ̀n. Mẹdepope wẹ e gán bẹpla to mayọnẹn mẹ.
E ma yin mẹhe otò, akọ̀, aṣa kavi ogbè yetọn gbọnvo lẹ kẹdẹ sin nú wẹ nọ vẹna mẹlẹ gba, amọ́ mẹhe sinsẹ̀n yetọn gbọnvo kavi ma to ohá dopolọ ji po yé po lẹ lọsu sin nú nọ vẹna yé, e gán sọ yin na mẹlọ yin sunnu kavi yọnnu wutu. Yè ma nọ yí nukun-jọ-nukun do pọ́n mẹdelẹ na owhe, wemase, oblọ kavi nukunmẹ yetọn wutu. Mẹlẹ nọ to nuyiwa domọ bo ma nọ yọnẹn dọ emi o do nuvẹun.
Be vlavo a do nuvẹun wẹ ya? Mí nọ saba mọdọ mẹdevo lẹ wẹ do nuvẹun bọ mílẹ ma do. Amọ́, eyin mí na dọ hójọhó, mímẹpo wẹ nọ do nuvẹun. Weyọnẹntọ David Williams he nọ plọnnumẹ gando walọ gbẹtọvi lẹ tọn go dohia dọ eyin gbẹtọ wunmẹ delẹ tin bọ yè ma nọ hia yé gọnu bọ yè wá dukosọna omẹ mọnkọtọn lẹ, “aliho he mẹ yè nọ yinuwa hẹ yé te nọ gbọnvo bọ mẹlọsu ma tlẹ nọ yọnẹn.”
Di apajlẹ, to otò he mẹ Jovica nọ nọ̀ to hùwaji Europe tọn, akọ̀ pẹvi de tin he mẹlẹ ma nọ hia gọnu. Nue Jovica dọ die: “N’nọ lẹndọ gbẹtọ-jọ-gbẹtọ de ma to mẹ enẹlẹ mẹ. Etomọṣo, n’nọ lẹndọ n’ma do nuvẹun, na nukun e mẹlẹpo nọ yí do pọ́n yé niyẹn.”
Tohọluduta lẹ nọ de sẹ́n voovo lẹ tọ́n nado doalọtena akọ̀-ṣinṣinyan po nuvẹun po. Amọ́, e ma o pà yé. Etẹwutu? Na osẹ́n lọ lẹ ma nọ yì adọ̀ nuhahun lọ tọn ji. Osẹ́n lọ lẹ ma nọ họ̀nadọna nue to gbẹtọ homẹ, ahun mẹ wẹ nuvẹun ka nọ bẹsọn. Din, be enẹ dohia dọ yè ma gán sukúndona nuvẹun wẹ ya? Be nuvẹun na wá vọ̀ gbèdopo ya?
To hosọ he bọdego lẹ mẹ, mí na mọ nú voovo atọ́n delẹ he gọalọna mẹsusu nado de nuvẹun sẹ̀ sọn ahun yetọn mẹ.
