TO SUHUGAN whẹho lẹ tọn mẹ, bato he nọ bẹ ahisinọ lẹ kẹdẹ de ma tin to ojlẹ Paulu tọn mẹ. To paa mẹ, gbejizọnlinzintọ lẹ nọ kanse mẹdevo lẹ eyin yé yọ́n bato de he nọ bẹ ajọnu lẹ bo jei fie emi jlo na yì, podọ he na jlo nado bẹ ahisinọ lẹ. (Owalọ 21:2, 3) Eyin bato de ma tlẹ jei fie mẹlọ jei pẹẹ, to whenue bato lọ nọte to húnglintẹn de to gbejizọnlin lọ whenu, ewọ sọgan dín bato devo he na ze e sẹpọ fihe e jei.—Owalọ 27:1-6.

Gbejizọnlin bato lẹ tọn nọ saba yin to ojlẹ tangan delẹ mẹ, podọ yé ma nọ hodo tito vonọtaun de. Gbọnvona ninọmẹ aimẹ tọn he ma yọ́n de, bato-kùntọ he yí otàngblo sè lẹ sọgan sọ sẹ̀ ojlẹ gbejizọnlin tọn yetọn donukọn eyin yé mọ ohia ylankan de, taidi whenue ohọ́n de to núdọ to okàn alà lẹ tọn ji, kavi eyin yé mọ bato he gbakija de to huto. Na bato-kùntọ lẹ nọ zọ̀n do jẹhọn he ma sinyẹn gbau go wutu, yé nọ súnhún eyin jẹhọn lọ to yìnyìn pànta fie sọgbe. Eyin gbejizọnlinzintọ de mọ bato he na ze e, ewọ nọ bẹagbàn etọn lẹ bo nọ yì nọte to fie sẹpọ húnglintẹn lọ kakajẹ whenue nulila na yin bibasi dọ bato lọ na sún to madẹnmẹ.

Whenuho-kantọ Lionel Casson dọ dọ “Lomu wleawuna tito dagbe delẹ he nọ de tuklajijẹ pò na gbẹtọ lẹ to huto. Bato-glintẹn etọn tin to bẹbẹnu tọ̀sisa Tibre tọn. Tòpẹvi Ostie tọn he ma dẹn do finẹ tindo nọtẹn gbangba tọn daho de he azọ́nwatẹn susu lẹ yin awuwlena lẹdo. Mẹhe tindo bato he nọ whle bato-glintẹn voovo lẹ wẹ do azọ́nwatẹn ehelẹ: dopo yin mẹhe tindo bato he nọ whle Narbonne [France egbezangbe tọn] lẹ tọn, devo yin mẹhe do bato he nọ whle Carthage [Tunisie egbezangbe tọn] lẹ tọn . . . po mọmọ po sọyi. Nuhe mẹhe jlo na do bato de dona wà poun wẹ nado yì azọ́nwatẹn enẹlẹ bo dindona tòdaho he na tin to ali emitọn ji lẹ.”

Bato-dido nọ zọ́n bọ gbejizọnlinzintọ lẹ ma nọ hẹn whenu gú, ṣigba e sọ tindo avùnnukundiọsọmẹnu etọn lẹ ga. Whlasusu wẹ ohún siọ Paulu to gbejizọnlin mẹdehlan tọn etọn lẹ whenu.—2 Kọl. 11:25.