1, 2. Etẹwẹ ofligọ lọ yin, podọ naegbọn mí do dó hudo etọn?

WHENUE sunnu pipé lọ Adam waylando, e hẹn dotẹnmẹ hundote lọ nado nọgbẹ̀ kakadoi bu, e ma yin na ede kẹdẹ gba, amọ́ na ovi sọgodo tọn etọn lẹ ga. Nudepope ma suwhẹna nue Adam wà. Ewọ lọsu wẹ desọn ojlo mẹ bo waylando. Bọ ovi etọn lẹ lo? Yé ma dù odé mọ yé ma dù amì, amọ́ onù yetọn yẹ̀nfún. (Lom. 5:12, 14) Be nudepope sọgan yin wiwà nado whlẹn yé sọn kú-whẹ̀ he tọgbo yetọn jẹna lọ si ya? Gbau! To ylando Adam tọn godo tlolo, Jehovah dehia vudevude lehe e na whlẹn ovivi Adam tọn livi susu lẹ sọn dẹ̀hodo ylando po okú po tọn si do. (Jen. 3:15) To ojlẹ dide Jehovah tọn mẹ, ewọ do Visunnu etọn hlan sọn olọn mẹ ‘nado ze ogbẹ̀ etọn jo taidi ofligọ de do ota mẹsusu tọn mẹ.’—Malku 10:45; Joh. 6:51.

² Etẹwẹ ofligọ lọ yin? To Owe-wiwe Glẹki tọn lẹ mẹ, ofligọ lọ nọ dlẹnalọdo ahọ́ he Jesu sú nado fli nuhe Adam hẹnbu lẹ gọ̀. (1 Kọl. 15:22) Naegbọn mí do dó hudo ofligọ lọ tọn? Na nujinọtedo whẹdida dodo tọn Jehovah tọn he to Osẹ́n lọ mẹ biọ dọ ogbẹ̀ ni yin yíyí na ogbẹ̀. (Eks. 21:23, 24) Adam hẹn ogbẹ̀ gbẹtọvi tọn pipé etọn bu. Nado yinuwa sọgbe hẹ whẹdida dodo Jiwheyẹwhe tọn, Jesu yí ogbẹ̀ gbẹtọvi tọn pipé etọn do sanvọ́. (Lom. 5:17) Gbọnmọ dali, ewọ lẹzun “Otọ́ Madopodo” de na mẹhe do yise hia to ofligọ lọ mẹ lẹpo.—Isa. 9:6; Lom. 3:23, 24.

3. Sọgbe hẹ Johanu 14:31 gọna 15:13, naegbọn Jesu do desọn ojlo mẹ bo yí ogbẹ̀ gbẹtọvi tọn pipé etọn do sanvọ́?

³ Jesu desọn ojlo mẹ bo yí ogbẹ̀ etọn do sanvọ́ na owanyi daho he e do na Otọ́ olọn mẹ tọn etọn po mílọsu po wutu. (Hia Johanu 14:31; 15:13.) Owanyi enẹ wẹ whàn ẹn nado magbe bo hẹn tenọgli etọn go kakajẹ vivọnu, podọ nado wà ojlo Otọ́ etọn tọn dotana. Jesu wàmọ gbọn nugbonọ-yinyin kakajẹ okú dali.  Taidi kọdetọn de, lẹndai dowhenu tọn Jehovah tọn na gbẹtọvi lẹ, podọ na aigba na mọ hẹndi. To hosọ ehe mẹ, mí na dọhodo nuewutu Jiwheyẹwhe dike bọ Jesu jiya sọmọ whẹpo do kú ji. Mí nasọ dọhodo apajlẹ Biblu-kantọ de tọn ji to kleun mẹ he yọ́n pinpẹn ofligọ lọ tọn sisosiso. Podọ gbọngodo, mí na dọhodo lehe mí sọgan do pinpẹn-nutọn-yinyọnẹn mítọn hia na ofligọ lọ do, gọna lehe mí gán hẹn pinpẹn nutọn enẹ siso deji na avọ́sinsan he Jehovah po Jesu po wleawu etọn na mí do ji.

4. Bayi zẹẹmẹ lehe Jesu kú do tọn.

⁴ Yí nukun homẹ tọn do pọ́n lehe azán godo tọn he Jesu yizan to aigba ji na ko yì do. Dile etlẹ yindọ e gán ko bayi oylọna awhànpa angẹli lẹ tọn nado bayi hihọ́na ẹn, e jo ede do bọ awhànfuntọ Lomu tọn lẹ wle e bo doalọ-jagọ e go. (Mat. 26:52-54; Joh. 18:3; 19:1) Yé yí alànbá he nọ tlẹ́n agbasa do hò e bo gbleawuna ẹn wluwlu. To godo mẹ, yé biọ to e si nado ze pòtin pinpẹn de dile etlẹ yindọ e ko gbleawu sọn nẹgbé. Jesu to tintẹnpọn nado hẹn pòtin lọ sọyi fie e na yin hùhù te, amọ́ e madẹn bọ yé degbena aligbọntọ de nado hẹn pòtin lọ na ẹn. (Mat. 27:32) To whenue Jesu jẹ fie e na yin hùhù te, awhànfuntọ lọ lẹ yí oṣó do whè alọ po afọ etọn lẹ po do pòtin lọ go. To whenue yè jlọ pòtin he go e yin zizepla do lọ, ṣópà lọ lẹ jẹ vúnvún ji dogọ. Họntọn Jesu tọn lẹ to awubla bọ onọ̀ etọn to avivi, amọ́ nukọntọ Ju lẹ to ṣinṣàn ẹn kò. (Luku 23:32-38; Joh. 19:25) Jesu nọ alanmanu na gànhiho susu. Aliho he mẹ e yin piplado pòtin go te zọ́n bọ e vẹawuna ẹn taun nado gbọ. Whẹpo e do gbọ gbigbọ godo tọn, e hodẹ̀ awhàngbigba tọn hlan Jehovah. Enẹgodo, e dẹ́ ota do odò bo kú. (Malku 15:37; Luku 23:46; Joh. 10:17, 18; 19:30) Na nugbo tọn, okú awufiẹsa sinsinyẹn tọn po mẹdèpo tọn de po wẹ ehe yin!

5. Na Jesu, etẹwẹ sọ ylan hugan aliho he mẹ e yin hùhù te?

⁵ Na Jesu, aliho he mẹ e yin hùhù te ma yin adà he ylan hugan to whlepọn etọn mẹ. Nue hẹn ayimajai wá na ẹn hugan wẹ whẹwhinwhẹ́n he wutu e do yin hùhù. Yè sawhẹdokọna ẹn dọ e yin nùzantọ, yèdọ mẹde he ma tindo sisi na Jiwheyẹwhe kavi na yinkọ etọn. (Mat. 26:64-66) Nulinlẹnpọn do whẹsadokọnamẹ mọnkọ ji tata dotukla Jesu sọmọ bọ e na ko jlo dọ Otọ́ emitọn ni ma dike emi ni mọ winyan enẹ blo. (Mat. 26:38, 39, 42) Naegbọn Jehovah do dike bọ Visunnu yiwanna etọn do jiya bosọ kú? Mì gbọ mí ni gbadopọnna whẹwhinwhẹ́n atọ̀n delẹ.

6. Naegbọn Jesu dona yin zizepla do yatin de go?

⁶ Tintan, Jesu dona yin zizepla do pòtin go nado tún Ju lẹ dote sọn dẹ̀hodo vonọtaun de glọ. (Gal. 3:10, 13) Yé ko yigbe nado setonuna Osẹ́n Jiwheyẹwhe tọn, amọ́ bo ka gboawupo mlẹnmlẹn nado wàmọ. Taidi kọdetọn de, dẹ̀hodo ehe sọ yidogọna whẹgbledomẹ he yé jẹna taidi ovivi Adam tọn lẹ. (Lom. 5:12) Osẹ́n he Jiwheyẹwhe na Islaeli dọ dọ, eyin mẹde waylando he jẹna okú, ewọ dona yin hùhù. Enẹgodo, oṣiọ etọn dona yin zizepla do pòtin de go. * (Deut. 21:22, 23; 27:26) Enẹwutu, whenue Jesu yin zizepla do pòtin go, e hẹn yọnbayi na akọta enẹ he gbẹ́ ẹ dai nado mọaleyi sọn avọ́sinsan etọn mẹ.

7. Etẹwẹ yin whẹwhinwhẹ́n awetọ he wutu Jiwheyẹwhe do dike bọ Visunnu etọn jiya?

⁷ Lẹnnupọndo whẹwhinwhẹ́n awetọ he wutu Jiwheyẹwhe dike bọ Visunnu etọn jiya ji. Ewọ to azọ́nplọn Jesu, na azọngban sọgodo tọn etọn taidi Yẹwhenọ Daho mítọn. Jesu do numimọ lehe e vẹawu sọ nado setonuna Jiwheyẹwhe to whenue yè tin to whlepọn he kàn  dẹpẹ biọ de glọ do tọn. Jesu yin kọgbidina sọmọ bọ e yí “avi sinsinyẹn po dasin lẹ po” do hodẹ̀ nado biọ alọgọ. Na Jesu lọsu jugbọn ayimajai sinsinyẹn mẹ wutu, e nọ mọnukunnujẹ nuhudo mítọn lẹ mẹ, bosọ ‘penugo nado gọalọna mí’ whenue mí “to yinyin whiwhlepọn.” Lehe mí yọ́n pinpẹn etọn do sọ dọ Jehovah de Yẹwhenọ Daho lẹblanunọ de do mí ji, mẹhe sọgan “vẹawu madogán mítọn lẹ”!—Heb. 2:17, 18; 4:14-16; 5:7-10.

8. Etẹwẹ yin whẹwhinwhẹ́n atọ̀ntọ he wutu Jiwheyẹwhe do dike bọ Jesu yin whiwhlepọn jẹ obá sinsinyẹn mọnkọ mẹ?

⁸ Atọ̀ntọ, Jehovah dike bọ Jesu mọ awufiẹsa sọmọ nado sọgan na gblọndo kanbiọ titengbe de tọn: Be gbẹtọvi lẹ gán do mẹdezejo na Jiwheyẹwhe hia eyin yé tlẹ to whlepọn sinsinyẹn glọ ya? Satani dọ dọ lala wẹ yin gblọndo lọ! E sọalọakọ́n dọ whẹwhinwhẹ́n ṣejannabi tọn lẹ wẹ zọ́n bọ gbẹtọvi lẹ to Jiwheyẹwhe sẹ̀n. Podọ, e kudeji dọ taidi tọgbo yetọn Adam, yé ma yiwanna Jehovah. (Jobu 1:9-11; 2:4, 5) Na Jehovah dejido nugbonọ-yinyin Visunnu etọn tọn go wutu, e dike bọ Jesu yin whiwhlepọn jẹ obá he mẹ gbẹtọvi gán doakọnnanu jẹ. Jesu hẹn tenọgli etọn go bo dohia dọ lalonọ wẹ Satani yin.

9. Apajlẹ tẹwẹ apọsteli Johanu zedai na mí?

⁹ Nuplọnmẹ ofligọ lọ tọn ko hẹn yise Klistiani susu lẹ tọn lodo. Yé zindonukọn nado to yẹwhehodọ mahopọnna nukundiọsọmẹ bo ko sọ doakọnna whlepọn wunmẹ lẹpo kakajẹ yọnhowhe yetọn mẹ. Lẹnnupọndo apajlẹ apọsteli Johanu tọn ji. E yí nugbonọ-yinyin do dọyẹwheho nugbo he gando Klisti po ofligọ lọ po go tọn na nudi owhe 60 linlán. To whenue e ko tindo nudi owhe 100, gandudu Lomu tọn nọ pọ́n ẹn hlan taidi owùnu sọmọ bọ e yin súsú do gànmẹ to lopo Patmos tọn ji. Owhẹ̀ tẹwẹ e ka hù? “Na hodidọ gando Jiwheyẹwhe go, podọ na kunnudide gando Jesu go wutu.” (Osọ. 1:9) Apajlẹ ayidego tọn nankọ die na nue dù yise po akọndonanu po!

10. Nawẹ kandai Johanu tọn lẹ dohia gbọn dọ ewọ yọ́n pinpẹn ofligọ lọ tọn?

¹⁰ To wekanhlanmẹ gbọdo Johanu tọn lẹ mẹ, ewọ dohia dọ emi tindo owanyi sisosiso na Jesu bosọ yọ́n pinpẹn ofligọ lọ tọn taun. Wekanhlanmẹ lọ lẹ donù ofligọ lọ kavi ale he e hẹn yọnbayi lẹ go hugan whla 100. Di apajlẹ, Johanu wlan dọ: “Eyin mẹdepope waylando, mí tindo alọgọtọ de to Otọ́ dè, yèdọ Jesu Klisti, dodonọ de.” (1 Joh. 2:1, 2) Wekanhlanmẹ Johanu tọn lẹ sọ zinnudo nujọnu-yinyin “kunnudide gando Jesu go” tọn ji. (Osọ. 19:10) Na nugbo tọn, Johanu yọ́n pinpẹn ofligọ lọ tọn sisosiso. Nawẹ mí gán dohia dọ mílọsu nọ wà nudopolọ gbọn?

11. Etẹwẹ gán gọalọna mí nado nọavùnte sọta whlepọn?

¹¹ Nọ nọavùnte sọta mẹtẹnpọn lọ nado waylando. Eyin mí yọ́n pinpẹn ofligọ lọ tọn nugbonugbo, mí ma na nọ lẹndọ: ‘E ma yin dandan dọ ma dovivẹnu sinsinyẹn ma nado waylando to whenue n’yin whiwhlepọn. N’gán waylando bo wá biọ jona to enẹgodo.’ Kakatimọ, eyin mí yin whiwhlepọn nado wà nue ma sọgbe, mí na dọ dọ: ‘Lala! Po nue Jehovah po Jesu po ko wà na mi lẹpo po, nawẹ n’gán wà onú mọnkọ gbọn?’ Po enẹ po, mí gán biọ huhlọn Jehovah bo vẹ̀ ẹ dọmọ: ‘A dike n’joawuna whlepọn blo.’—Mat. 6:13.

12. Nawẹ mí sọgan yí ayinamẹ he tin to 1 Johanu 3:16-18 mẹ do yizan mẹ gbọn?

¹² Nọ yiwanna mẹmẹsunnu po mẹmẹyọnnu towe lẹ po. Eyin mí nọ do owanyi mọnkọ hia, e nọ dohia ga dọ mí yọ́n pinpẹn ofligọ  lọ tọn. Etẹwutu? Na Jesu ze ogbẹ̀ etọn jo, e ma yin na míwlẹ kẹdẹ amọ́ na mẹmẹsunnu po mẹmẹyọnnu mítọn lẹ po ga. Eyin ewọ wleawufo nado kú do ota yetọn mẹ, enẹ dohia hezeheze dọ yé họakuẹ to nukun etọn mẹ. (Hia 1 Johanu 3:16-18.) Mí nọ do owanyi he mí do na mẹmẹsunnu po mẹmẹyọnnu mítọn lẹ po hia to aliho he mẹ mí nọ yinuwa hẹ yé te mẹ. (Efe. 4:29, 31–5:2) Di apajlẹ, mí nọ gọalọna yé whenue yé to azọ̀njẹ kavi to jujugbọn whlepọn sinsinyẹn lẹ mẹ, ehe bẹ nugbajẹmẹji jọwamọ tọn lẹ hẹn. Amọ́, nawẹ mí dona yinuwa gbọn whenue yisenọ hatọ de wà kavi dọ nude he gbleawuna mí?

13. Naegbọn mí dona nọ jonamẹ?

¹³ Be a do aṣa lọ nado nọ hẹn yisenọ hatọ towe lẹ do homẹ wẹ ya? (Lev. 19:18) Eyin mọ wẹ, bo hodo ayinamẹ ehe: “Mì nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii eyin mẹde tlẹ tindo whẹwhinwhẹ́n nado wọ́ po mẹdevo po. Kẹdẹdile Jehovah jona mì sọn ojlo mẹ wá do, mọ wẹ mì dona nọ wà do ga.” (Kol. 3:13) Whedepopenu he mí jona mẹmẹsunnu kavi mẹmẹyọnnu mítọn, mí nọ dohia Otọ́ olọn mẹ tọn mítọn dọ mí yọ́n pinpẹn ofligọ lọ tọn nugbonugbo. Nawẹ mí gán hẹn pinpẹn nutọn mítọn siso dogọ na nunina he wá sọn Jiwheyẹwhe dè ehe gbọn?

14. Etẹwẹ yin dopo to aliho he mẹ mí gán hẹn pinpẹn nutọn mítọn na ofligọ lọ siso deji te lẹ mẹ?

¹⁴ Nọ dopẹna Jehovah na ofligọ lọ. Mẹmẹyọnnu Joanna he do owhe 83 bo nọ nọ̀ Inde dọ dọ: “N’lẹndọ nujọnu wẹ e yin nado nọ donù ofligọ lọ go egbesọegbesọ to odẹ̀ ṣie lẹ mẹ bosọ nọ dopẹna Jehovah gandego.” To odẹ̀ mẹdetiti tọn towe lẹ mẹ, nọ lẹnnupọndo onú taun-taun he a ṣiwà to azán lọ gblamẹ lẹ ji bo nọ biọ Jehovah dọ ni jona we. Na nugbo tọn, eyin ylando sinsinyẹn de wẹ a wà, e nasọ biọ dọ a ni dín alọgọ mẹho agun tọn lẹ tọn. Yé na dotoaina we bo nasọ na we ayinamẹ owanyinọ sinai do Ohó Jiwheyẹwhe tọn ji. Yé na hodẹ̀ hẹ we, bo biọ Jehovah dọ ni zindonukọn nado to nuhọakuẹ-yinyin avọ́sinsan Jesu tọn yizan do ota towe mẹ, ‘na a nido yin azọ̀nhẹngbọna to gbigbọ-liho.’—Jak. 5:14-16.

15. Naegbọn mí dona nọ de whenu dovo nado hianu gando ofligọ lọ go bosọ lẹnayihamẹpọn deji?

¹⁵ Nọ lẹnayihamẹpọn do ofligọ lọ ji. Mẹmẹyọnnu Rajamani he do owhe 73 dọ dọ, “Eyin n’hianu gando yajiji Jesu tọn lẹ go, nukun ṣie lẹ nọ hlá dasin.” E sọgan nọ biọlanmẹna hiẹ lọsu sisosiso eyin a lẹnnupọndo obá he mẹ Visunnu  Jiwheyẹwhe tọn jiya jẹ ji. Amọ́, lehe a to ayihamẹlẹnpọn do avọ́sinsan he Jesu bayi lọ ji sọ, mọ wẹ owanyi towe na ewọ podọ na Otọ́ etọn na siso dogọ do niyẹn. Nado penugo bo lẹnayihamẹpọn do ofligọ lọ ji, naegbọn a ma na bayi tito vonọtaun nado plọnnu do hosọ ehe ji?

16. Nawẹ nupinplọn mẹdevo lẹ gando ofligọ lọ go gán hẹn ale wá na mí gbọn? (Pọ́n yẹdide he to wepa ji.)

¹⁶ Nọ plọnnu mẹdevo lẹ gando ofligọ lọ go. Whedepopenu he mí dọhona mẹdevo lẹ gando ofligọ lọ go, pinpẹn-nutọn-yinyọnẹn mítọn gandego na nọ jideji. Mí do azọ́nwanu dagbedagbe delẹ he mí gán yizan nado plọnnu mẹdevo lẹ gando nuewutu Jesu dona kú do ota mítọn mẹ go. Di apajlẹ, mí gán yí nupinplọn 4tọ alọnuwe lọ Wẹndagbe de sọn Jiwheyẹwhe Dè! tọn zan. Hosọ nupinplọn lọ tọn wẹ “Mẹnu Wẹ Jesu Klisti?” Kavi mí gán sọ yí weta 5tọ owe lọ Etẹwẹ Biblu Sọgan Plọn Mí? tọn zan. Hosọ weta enẹ tọn wẹ “Ofligọ lọ—Nunina Daho Hugan Jiwheyẹwhe Tọn.” Podọ to whemẹwhemẹ, mí nọ hẹn pinpẹn nutọn mítọn na ofligọ lọ siso deji whenue mí yì Oflin okú Jesu tọn bosọ yí zohunhun do bayi oylọna mẹdevo lẹ nado kọnawudopọ hẹ mí. Lẹblanulọkẹyi nankọ die he Jehovah na mí nado plọnnu mẹdevo lẹ gando Visunnu etọn go!

17. Naegbọn ofligọ lọ do yin nunina daho hugan Jiwheyẹwhe tọn na gbẹtọvi lẹ?

¹⁷ Matin ayihaawe, mí do whẹwhinwhẹ́n dagbe nado wleawuna pinpẹn nutọn sisosiso na ofligọ lọ bosọ to mọwà zọnmii. Na ofligọ lọ wutu, mí gán tindo haṣinṣan pẹkipẹki de hẹ Jehovah dile etlẹ yindọ mí yin mapenọ. Na ofligọ lọ wutu, azọ́n Lẹgba tọn lẹ na yin gbigbà hányán mlẹnmlẹn. (1 Joh. 3:8) Na ofligọ lọ wutu, lẹndai dowhenu tọn Jehovah tọn na aigba na mọ hẹndi. Aigba lọ blebu na lẹzun paladisi. Mẹdepope he a dukosọna wẹ na yiwanna Jehovah bosọ nọ sẹ̀n ẹn. Enẹwutu, mì gbọ mí ni nọ dín dotẹnmẹ lẹ egbesọegbesọ nado do pinpẹn-nutọn-yinyọnẹn mítọn hia na ofligọ lọ—yèdọ nunina daho hugan Jiwheyẹwhe tọn na gbẹtọvi lẹ!